កង្វះវីតាមីន និងសារធាតុចិញ្ចឹម អាចធ្វើឱ្យអ្នកមានហានិភ័យសុខភាពភ្នែកខ្សោយចុះ មើលមិនសូវច្បាស់ ប្រឈមមុខនឹងជំងឺស្ងួតភ្នែក ភ្នែកឡើងបាយ ទឹកដក់ក្រោមភ្នែកជាដើម។ តាមការសិក្សាបានបង្ហាញថា វីតាមីនអាចជួយប្រឆាំង និងពន្យឺតការវិវត្តនៃជំងឺភ្នែកបានផងដែរ នេះបើផ្អែកតាមការឱ្យដឹងពីmedicalnewstoday​។ ខាងក្រោមនេះជាសារធាតុរ៉ែ និងវីតាមីនសំខាន់ៗ ដែលជំនួយដល់កែវភ្នែករបស់អ្នក គួរបន្ថែមវាឱ្យបានច្រើនក្នុងរបបអាហារជាប្រចាំថ្ងៃ។

១ វីតាមីនA៖ យោងតាមបណ្ឌិតសភារបស់សហរដ្ឋអាមេរិកបានឱ្យដឹងថា ភាពកង្វះវីតាមីនA បានធ្វើឱ្យភ្នែកមើលមិនច្បាស់នៅពេលយប់។ វីតាមីនA ជំនួយដល់ការមើលឃើញច្បាស់ ហើយវាក៏មានសមាសធាតុ rhodopsin ដែលអាចធ្វើឱ្យភ្នែកមើលឃើញទោះនៅក្នុងកន្លែងមានពន្លឺតិចក៏ដោយ។ វីតាមីនA ជួយការពារមុខងារកែវភ្នែក និងការពារផ្នែកខាងក្រៅនៃភ្នែក រួមទាំងការពារកុំឱ្យភ្នែកស្ងួតថែមទៀត។

ប្រភពអាហារដែលសម្បូរវីតាមីនA មានដូចជា ល្ពៅ ការ៉ុត ដំឡូងជ្វាឬដំឡូងផ្អែម ម្រេចក្រហមជាដើម។

២ វីតាមីនE៖ វីតាមីនE មានសារធាតុប្រឆាំងនិងអុកស៊ីតកម្ម ក៏ដូចជាប្រឆាំងរ៉ាឌីកាល់សេរីដែលបំផ្លាញប្រូតេអ៊ីននៅក្នុងភ្នែក ធ្វើឱ្យភ្នែកងាយឡើងបាយ ក៏ដូចជាបំផ្លាញជាលិកាពាសពេញរាងកាយផងដែរ។ តាមការវិភាគរបស់ meta-analyses ក្នុងឆ្នាំ២០១៥ បានសិន្នដ្ឋានថាការទទួលវីតាមីនE អាចជួយពន្យឺតការវិវត្តនៃភ្នែកឡើងបាយបាន។

ប្រភពអាហារដែលសម្បូរវីតាមីនE មានក្នុងគ្រាប់ធញ្ញជាតិដូចជា៖ គ្រាប់ផ្កាឈូករ័ត្ន គ្រាប់អាល់ម៉ុន សណ្ដែកដី សណ្ដែកសៀង ពោត ស្រូវសាឡីជាដើម។

៣ វីតាមីនC៖ តាមការសិក្សាមួយគេបានរកឃើញថា អ្នកដែលទទួលទាន អាហារវីតាមីនEច្រើន អាចកាត់បន្ថយហានិភ័យនៃជំងឺភ្នែកឡើងបាយបានបាន៣៣%។ ហើយវាក៏បានដើរតួនាទីយ៉ាងសំខាន់ ការពារប្រឆាំងនឹងការបំផ្លាញពីកាំរស្មីUV។

ប្រភពអាហារដែលសម្បូរវីតាមីនC មានដូចជា៖ ពពួកផ្លែក្រូច ខាត់ណាខៀវ Spinach កូនស្ពៅក្ដោប ពពួកផ្លែប៊ឺរី ជាដើម។

ជារួមមកដើម្បីការពារភ្នែករបស់អ្នកជំងឺផ្សេងៗ ក៏ដូចជាការខ្សោយចុះនៃការមើល គួរបន្ថែមអាហារដែលសម្បូរវីតាមីនឱ្យបានច្រើន ចូលក្នុងរបបអាហារប្រចាំថ្ងៃរបស់អ្នក។ ក្រៅពីវីតាមីន៣ប្រភេទនេះ នៅមានវីតាមីនB សង្ក័សី និងអាស៊ីតខ្លាញ់អូមេហ្គា៣ សុទ្ធតែជាសារធាតុសំខាន់ដែលជំនួយដល់រាងកាយ ក៏ដូចជាភ្នែកផងដែរ។ គួរព្យាយាមកាត់បន្ថយការមើលអេក្រង់អេឡិចត្រូនិច យូរៗពេក ជាពិសេសមើលនៅកន្លែងងងឹត ដើម្បីឱ្យភ្នែករបស់អ្នកមានសុខភាពល្អ មើលឃើញច្បាស់ល្អ កែវភ្នែកមិនចាស់មុនអាយុ៕

អត្ថបទដោយ៖ Senghong