កុមារតូចៗជាច្រើន ជួបបញ្ហារលាកត្រចៀកផ្នែកខាងក្នុង ឬអំបៅអំបែក។ បញ្ហានេះអាចកើតឡើងដោយសារក្មេងយកដៃមិនស្អាតឆ្កឹះឬលូកត្រចៀក រីឯកត្តា១ទៀត មកពីឳពុកម្ដាយមានទម្លាប់ខ្វារឬត្បារ ឆ្កឹះយកអាចម៍ត្រចៀកកូនចេញ។ ប្រសិនមានទម្លាប់នេះ សូមឈប់ជាបន្ទាន់ព្រោះវាអាចធ្វើឱ្យរលាក ឬខូចត្រចៀកកូនរបស់អ្នក។

ផ្អែកតាមការចែករំលែករបស់លោកវេជ្ជបណ្ឌិត ហ៊ាង រតនា បានប្រាប់ឱ្យដឹងថា ជាធម្មតាមិនតម្រូវឱ្យខ្វារ ត្បារ ឬលូកឆ្កឹះយកអាចម៍ត្រចៀកកូនតូចៗចេញនោះទេ។ មូលហេតុនោះគឺ សម្រាប់ក្មេងអាចម៍ត្រចៀកមានប្រយោជន៍ដូចជា៖

-     ការពារសត្វចូលត្រចៀក បើមាន ស្រមោច ឬសត្វល្អិតផ្សេងៗចូល ពេលធុំក្លិនឬប៉ះអាចម៍ត្រចៀកវានឹងចេញមកក្រៅវិញ។

-     ពេលទឹកចូល អាចម៍ត្រចៀកអាចជួយសម្ងួតបាន

-     ការពារនិងសម្លាប់មេរោគដែលចូលក្នុងត្រចៀកបាន

លោកវេជ្ជបណ្ឌិតបានបន្ថែមថា ប្រសិនបើដកអាចម៍ត្រចៀកចេញ ប្រៀបដូចជាការដកប្រដាប់ការពារត្រចៀកក្មេង បើក្នុងករណីខ្វារឬត្បារ មិនបានស្អាតត្រឹមត្រូវ អាចរលាកបណ្ដាលឱ្យមានមេរោគ ក្លាយជាអំបៅអំបែក ប្រសិនបើមិនបានព្យាបាលត្រឹមត្រូវអាចខូចត្រចៀក ស្ដាប់មិនឮ ថ្លង់ជាដើម។ ការសំអាតត្រចៀកក្មេង គួរសំអាតតែផ្នែកខាងក្រៅ មិនមែនលូកចូលក្នុងត្រចៀកកូននោះទេ ករណីដែលអាចម៍ត្រចៀកពេញញុកណែន(ជាករណីកម្រ) គួរតែនាំទៅសម្អាតជាមួយគ្រូពេទ្យជំនាញ។

ជាមួយគ្នានេះដែរ ផ្អែកតាមគេហទំព័រ pregnancybirthbaby បានឱ្យដឹងថា អាចម៍ជាធម្មជាតិរបស់វានិងចេញមកក្រៅដោយខ្លួនឯង មិនគួរយកសំឡី ឬម្រាមដៃលូកចូលក្នុងត្រចៀកក្មេងឡើយ។ ចំពោះការសម្អាត អាចប្រើប្រភេទសំឡី ឬក្រណាត់ទន់ៗ ជ្រលក់ទឹកក្រៅឧណ្ហៗ ក្រោម៣៧អង្សាសេ ជូតសំអាតថ្មមៗបរិវេណខាងក្រៅ និងខាងក្រោយត្រចៀកក្មេង គឺគ្រប់គ្រាន់ហើយ។ គួរចៀសវាងការប្រើថ្នាំផ្សេងៗលាបក្នុងត្រចៀកកូន ដោយគ្មានការណែនាំពីគ្រូពេទ្យ ករណីក្មេងមានបញ្ហាត្រចៀកផ្សេងៗគួរតែនាំកូនទៅជួបជាមួយគ្រូពេទ្យជំនាញ។

គួរឱ្យដឹងផងដែរ លោកវេជ្ជបណ្ឌិត ហ៊ាង រតនា ជាវេជ្ជបណ្ឌិតឯងទេសជំងឺទូទៅនិងកុមារ ព្រមទាំងជាស្ថាបនិក បន្ទប់ពិគ្រោះនិងព្យាបាលជំងឺមេត្តាសំណង់១២។ បន្ទប់ពិគ្រោះនិងព្យាបាលជំងឺមេត្តាសំណង់១២ មានទទួលពិនិត្យ ព្យាបាល ជំងឺទូទៅ មនុស្សចាស់ កុមារនិងទារក ដែលមានទីតាំងនៅ ផ្លូវ២៦៥ ផ្លូវ៦៤L សង្កាត់ទឹកល្អក់៣ ខណ្ឌទួលគោ រាជធានីភ្នំពេញ។ ករណីមានចម្ងល់ឬបញ្ហាសុខភាពផ្សេងអាចទំនាក់ទំនង​តាមរយៈផេកផ្លូវការ វេជ្ជ. ហ៊ាង រតនា ឬតាមរយៈលេខទូរស័ព្ទ ០៨១ ៣០​ ១៧៧០ ឬ ០៧៧ ៥៣ ៦០ ៤៣ ៕

អត្ថបទដោយ៖ Senghong