សម្រស់ដ៏សែនលេចធ្លោមិនចេះចាស់របស់តារាសម្តែងថៃ aum patcharapa បានធ្វើឱ្យមហាជនគាំទ្រទាំងក្មេងចាស់ប្រុសស្រីតាមដានឆ្កឹះរករូបមន្តក្មេងជាងវ័យរបស់នាង ដោយចោទសញ្ញាសួរគ្រប់ទិសទី ខណៈពេលដែលចូលមកដល់ពេលបច្ចុប្បន្នតារាសម្តែងរូបនេះ មានអាយុ ៤៣ផ្លាយទៅហើយ តែបើក្រឡេកទៅប្រជាប្រិយភាពវិញ កាន់តែល្បីល្បាញលើសដើម។

យោងទៅតាមប្រភពចេញផ្សាយ newsdirectory3.com បានឱ្យដឹងភាពស្រស់ស្អាត កើតឡើងមកបានពីទម្លាប់ប្រចាំថ្ងៃរបស់នាង ដោយចំណុចសំខាន់ដំបូងនោះ គឺ aum patcharapa មិនចោលទម្លាប់គេងឱ្យបានគ្រប់គ្រាន់ផងដែរ។ ជាងនេះទៅទៀត ទម្លាប់ដែលធ្វើឱ្យបណ្ដាអ្នកគាំទ្រ កោតសរសើរនាងកាន់តែខ្លាំងនោះ គឺ aum patcharapa ពេលចូលគេង នាងមានទម្លាប់ដាក់ផ្ទៃមុខឡើងលើជានិច្ច ដើម្បីកុំឱ្យប៉ះទៅនឹងខ្នើយកើយ។ ព្រោះថានៅពេលយប់បើមានទម្លាប់គេងដាក់មុខផ្អឹបជាប់នឹងខ្នើយ ឬត្រដុសនឹងខ្នើយ អាចធ្វើឱ្យស្បែកមុខមានស្នាមផ្សេងៗ ជាពិសេសគឺអាចកើតស្នាមជ្រីវជ្រួញបានដោយងាយ។

ចំណែកឯចំណុចពិសេសបន្ទាប់ តារាស្រីរូបនេះ មានទម្លាប់ប្រើឡេការពារកម្តៅថ្ងៃ ពីព្រោះថា​ឡេការពារកម្តៅថ្ងៃពិតជាចាំបាច់ខ្លាំងណាស់សម្រាប់ស្បែក ជាពិសេសអ្នកដែលចេញក្រៅ ឬត្រូវកម្តៅថ្ងៃញឹក ព្រោះថាប្រមាណជា ៩០% ភាពចាស់នៃស្បែកគឺបណ្តាលមកពីពន្លឺព្រះអាទិត្យជាពិសេសចំពោះមនុស្សដែលមានស្បែកស្តើង ហើយបើនិយាយពីហានិភ័យដែលកាន់តែគួរឱ្យខ្លាចនោះគឺប្រឈមនឹងការកើតជំងឺស្បែកឡើងសរសៃក្រហម ឬអាចឈានទៅដល់មហារីកស្បែក។ ហេតុនេះហើយ Aum- Patcharapa តែងប្រើប្រភេទSUNSCREEN ដែលមានកម្រិតSPF50+ PA +++ ជំនួយស្បែកមុខជានិច្ច។

ជាងនេះទៀតសោតអ្វីដែលខ្វះមិនបាននោះប្រើទឹក Toner ទុកជូតសម្អាត ដោយហេតុថា មនុស្សស្រីសម័យថ្មី ពិតណាស់តែងមានគ្រឿងសម្អាងមួយចំនួនលើស្បែកមុខដើម្បីបង្កើនទំនុកចិត្តមុននឹងចេញទៅណាម្តងៗ។ តែពេលវិលត្រលប់មកផ្ទះវិញ បញ្ហាបរិយាកាសរួមផ្សំជាមួយនឹងប្រភេទគ្រឿងសម្អាងទាំងនោះនឹងបង្កបាក់តេរីបំផ្លាញកោសិកាស្បែក ប្រសិនណាមិនសម្អាតឱ្យស្អាតទេ មុខជាឡើងមុនជាមិនខាន។ ហេតុនេះ ហើយទើប Aum- Patcharapa តែងតែប្រើប្រភេទទឹក Toner ជូតសម្អាតមុខជានិច្ចមុនពេលលុបមុខនឹង Foamលាងមុខ។

រីឯលក្ខណៈពិសេសចុងក្រោយនោះ គឺការបន្ថែមនូវអាហារបំប៉នដល់ស្បែក ដោយភាគច្រើន Aum- Patcharapa មានប្រភេទផលិតដែលផ្តល់នូវវីតាមីន C និង សារធាតុចិញ្ចឹមដល់ស្បែកដូចជាប្រភេទខូឡូជែន ដែលវាមានអត្ថប្រយោជន៍ជួយបន្តឹងស្បែកមុខ ពន្យារភាពចាស់ បណ្តុះកោសិកាស្បែកឱ្យកាន់តែមានសភាពម៉ត់រលោងជានិច្ច។

បន្ថែមពីនេះទៅទៀត Aum- Patcharapa ក៏មានរបបអាហារ និង ការហាត់ប្រាណជាប្រចាំដូចគ្នាដែរ ព្រោះវាជារឿងដែលខ្វះមិនបានក្នុងការថែរក្សារូបរាង និងសម្ជស្សចាប់តាំងពីខាងក្នុងមកដល់ក្រៅ៕