ក្នុងរយៈពេលជិត ២០ ឆ្នាំ នៅក្នុងឧស្សាហកម្មកម្សាន្ត សមាជិកក្រុម Girls’ Generation រូបនេះ បានបន្តទាក់ទាញអ្នកគាំទ្រជាមួយសម្រស់ធម្មជាតិនិងភាពឆ្លាតវៃ។ ប្រសិនបើអ្នកចាប់អារម្មណ៍ និងចង់បានស្បែកស្អាតដូច Yoona  អ្នកគួរអានអត្ថបទនេះ ។ យោងតាមគេហរទំព័រ Lifestyle Asia Yoona បានចែករំលែកអំពី ទម្លាប់ថែរក្សាស្បែកសាមញ្ញៗរបស់នាង ដែលអ្នកអាចអនុវត្តតាមបានងាយ។ ទាំងនេះគឺជាទម្លាប់ថែរក្សាស្បែក និងសម្រស់របស់ Yoona ដែលនាងតែងតែអនុវត្តជាប្រចាំថ្ងៃ

១. ប្រើប្រាស់ឡេការពារកម្ដៅថ្ងៃ (Sunscreen)៖ តើអ្នកដឹងទេថា កាំរស្មី UVA/UVB គឺជាមូលហេតុធំបំផុតនាំឱ្យស្បែកចាស់លឿន និងស្នាមជ្រីវជ្រួញ។ ហើយឡេការពារកម្ដៅថ្ងៃគឺជាមិត្តដ៏ល្អរបស់ Yoona ។ ដោយសារនាងត្រូវចំណាយពេលច្រើននៅក្រោមកម្ដៅព្រះអាទិត្យ ដែលធ្វើឱ្យនាងមានការប្រុងប្រយ័ត្នធ្វេរដងក្នុងការធានាថាស្បែករបស់នាងមានសុខភាពល្អ ។ នាងត្រូវការលាបឡេការពារកម្ដៅថ្ងៃជាប្រចាំមុនពេល Makeup ។ ស្រីស្អាតរូបនេះបន្ថែមថា ឡេការពារកម្ដៅថ្ងៃជួយធ្វើឱ្យស្បែករបស់នាងមានសុខភាពល្អមិនងាយចាស់ ការពារការឡើងកម្ដៅថ្ងៃ ពន្យាភាពចាស់មុនអាយុ និងស្នាមអុចខ្មៅ និងកាត់បន្ថយហារនិភ័យនៃការកើតឡើនូវជំងឺមហាររីកស្បែក។

២. ការលាងមុខ ២តង់៖ ការលាងមុខ ២ តង់មិនមានន័យថាតម្រូវឱ្យអ្នកត្រូវលាងមុខនឹងទឹកទទេ ឬជាមួយ Foam ២ ដងនោះទេ ប៉ុន្តែក្នុងន័យនេះគឺអ្នកត្រូវសម្អាតផ្ទៃមុខដោយធ្វើជាជំហ៊ានៗ។ ជំហ៊ានទី ១ គឺលាងមុខដោយប្រើជា Cleansing Oil ឬ Cleansing Balm ជ្រើសរើសទៅតាមប្រភេទស្បែកមុខ ដើម្បីលុប Makeup និងសំអាតជាតិខ្លាញ់ក៏ដូចជាធូលីដីដែលមាននៅលើផ្ទៃមុខ។ ជំហ៊ានទី ២ គឺប្រើ Cleansing Foam ឬ Gel ដើម្បីលាងស្អាតស្បែកឱ្យបានជ្រៅ។ ចំពោះតារាស្រី Yoona ក៏ដូចគ្នា នាងតែងតែធ្វើការសម្អាតផ្ទៃមុខរបស់នាងបែបនេះជាប្រចាំ នាងធ្លាប់ផ្ដល់បទសម្ភាសន៍ថា ការលាងសម្អាតផ្ទៃមុខឱ្យបានស្អាតល្អ វាធ្វើឱ្យនាងមានអារម្មណ៍ស្រស់ស្រាយ ហើយកាលដែលធ្វើបែបនេះគឺជួយបញ្ឍប់ការកកស្ទះរន្ធញើស កាត់បន្ថយការកើតមុន និងរក្សាស្បែកឱ្យស្អាតភ្លឺថ្លា។

៣. ផ្ដល់សំណើមស្បែក៖ ស្បែកគឺពិតជាត្រូវការជាតិទឹក និងសារធារចិញ្ចឹមបន្ថែម ហើយដើម្បីឱ្យស្បែកមានសុខភាពល្អដូច Yoona គន្លឹះសំខាន់គឺការផ្ដល់សំណើមដល់ស្បែកឱ្យបានត្រឹមត្រូវ។ Yoona គឺជាឯករដ្ឋទូតរបស់ម៉ាក Innisfree ហើយនាងតែងប្រើប្រាស់សេរ៉ូមបៃតងដែលលក់ដាច់បំផុតរបស់ម៉ាកដើម្បីផ្ដល់សំណើមដល់ស្បែក ទោះជាយ៉ាងណា នាងក៏មានបច្ចេកទេសថែរក្សាស្បែកផ្ទាល់ខ្លួន ដើម្បីរក្សាជាតិទឹកដល់ស្បែករបស់នាងដែរ។ បច្ចេកទេសនេះគឺនាងលាយសេរ៉ូម ក្រែម និងប្រេង ជាសមាមាត្រផ្សេងៗគ្នា អាស្រ័យទៅលើស្ថានភាពអាកាសធាតុ និងស្បែករបស់នាងដូចជា៖ ក្នុងករណីដែលអាកាសធាតុសើម នាងនឹងប្រើប្រាស់សេរ៉ូមច្រើន ហើយប្រើក្រែមតិច តែនៅក្នុងករណីស្បែករបស់នាងស្ងួត នាងនឹងប្រើសេរ៉ូមតិច ហើយបន្ថែមក្រែម និងប្រេងលាបមុខ។ ក្រៅពីនេះ Yoona ក៏មានទម្លាប់បិតម៉ាស់ដើម្បីរក្សាជាតិទឹកនៅពេលនាងមានអារម្មណ៍ថាស្បែករបស់នាងមានសភាពស្ងួតខ្លាំងដែរ។

៤. ប្រើសេរ៉ូមពេលយប់មុនចូលគេង៖ នៅក្នុងបទសម្ភាសន៍ជាមួយ AsiaOne Yoona បានប្រាប់ថានាងមានទម្លាប់ប្រើសេរ៉ូមមុនពេលចូលគេង ហើយធ្វើការម៉ាស្សាវាថ្នមៗនៅលើមុខដើម្បីឱ្យវាជ្រាបចូលក្នុងស្បែកបានជ្រៅ និងធ្វើឱ្យស្បែកទន់រលោង។

៥. ប្រើទម្លាប់រស់នៅប្រកបដោយសុខភាពល្អ៖ នៅក្នុងបទសម្ភាសន៍ដដែល Yoona បានសង្កត់ធ្ងន់ថារបៀបរស់នៅគឺជាគន្លឹះសំខាន់នៃការថែរក្សាស្បែកឱ្យមានសុខភាពល្អ។ នៅពេលនាងឆ្លើយសំណួរជាមួយ AsiaOne Yoona បានរៀបរាប់ពីសារៈសំខាន់នៃទម្លាប់នៃការញុំា ។ ហើយនាងបានបន្ថែមថា ការប៉ះពាល់ស្បែកមុខញឹកញាប់ ឬមានទម្លាប់ចូលគេងយប់ៗជ្រៅ អាចធ្វើឱ្យស្បែកវិវត្តន៍កាន់តែអាក្រក់ៗទៅ។ នាងបានណែនាំឱ្យផ្ដោតលើ ការគ្រប់គ្រងរបបអាហារ ផ្ដល់សំណើម និងធ្វើការសម្អាតផ្ទៃមុខឱ្យបានស្អាត បើចង់រក្សាស្បែកឱ្យមានសុខភាពល្អ។ ជាពិសេស នាងចូលចិត្តញុំាផ្លែឈើស្រស់ ហើយព្យាយាមផឹកទឹកឱ្យបានច្រើន និងគេងឱ្យបានគ្រប់គ្រាន់ ទើបធ្វើឱ្យអារម្មណ៍របស់នាងស្រស់ស្រាយ ហើយស្បែករបស់នាងក៏ស្រស់ថ្លាដែរ៕ កញ្ញាសារ៉ួ