អ្នកណាខ្លះកំពុងតែជួបបញ្ហាមុនខ្នង? ធុនទ្រាន់ណាស់មែនទេ? មុនខ្នងខ្លះធំៗដូចបូសអញ្ចឹង មិនត្រឹមតែបង្ករឱ្យការឈឺចាប់ទេ គឺធ្វើឱ្យយើងខ្មាសគេថែមទៀតផង។ ពេលខ្លះចង់ពាក់ខោអាវវាលខ្នងក៏មិនហ៊ានដោយសារតែមុនច្រើនពេក ហើយស្នាមឡើងពេញខ្នង និយាយទៅគឺគ្មាទំនុកចិត្តលើខ្លួនឯងតែម្ដង។

ក៏ប៉ុន្តែឥឡូវនេះ ខ្ញុំនឹងលើកយកមូលហេតុដែលធ្វើឱ្យកើតមុនខ្នង ហើយនឹងប្រភេទមុនដែលកើត បន្ថែមពីនេះខ្ញុំដកស្រង់យកដំណោះស្រាយល្អៗសម្រាប់លោកអ្នក ទាំងអស់នោះរួមមាន៖

១.មុនក្បាលស

មុនប្រភេទនេះ ពេលកើតម្ដងៗធ្វើឱ្យស្បែកដំបៅនៅត្រង់មុខមុន ហើយមានរូបរាងក្បាលពណ៌ផ្កាឈូកតូចៗនៅលើស្បែកខ្នង វាកើតឡើងពីការផលិតខ្លាញ់លើសនៅលើស្បែកខ្នង ប៉ះជាមួយខ្យល់អាក្រក់ពីខាងក្រៅ ធ្វើឱ្យវាបង្កជាមុន។ ម្យ៉ាងវិញទៀត វាអាចបណ្ដាលមកពីកត្តាបម្រែបម្រួលអរម៉ូនរបស់អ្នកផងដែរ។

២.មុនក្បាលខ្មៅ

មុនប្រភេទនេះ គឺមានរូបរាងជាំខ្មៅនៅលើស្បែកត្រង់រន្ធរោម វាកើតឡើងដោយសារបាក់តេរី ដី ធូលី ដែលធ្វើឱ្យបិទស្ទះគល់រោមត្រង់រន្ធរោម ដែលអ្នកមិនបានសម្អាតបានស្អាតនៅពេលអ្នកងូតទឹក។ ដូចនេះ ដំណោះស្រាយល្អបំផុត គឺពេលងូតទឹកគួរយកស្បៃឬ ប្រដាប់ដុសខ្លួនមកត្រដុសខ្នងឱ្យជ្រះជាតិដី ក្អែលខ្នងឱ្យអស់ពីរន្ធរោម ទើបគ្មានហានិភ័យនៃមុនខ្នងប្រភេទនេះ។

៣.មុនខ្ទុះ ឬមុនCyst Cyst

មុនប្រភេទនេះ គឺមានទំហំធំៗណាស់ ហើយមានខ្ទុះច្រើនទៀតផង។ មុនប្រភេទនេះ គឺភាគច្រើនបណ្ដាលមកពីពពួកបាក់តេរី ដែលមានជាប់នៅលើសក់ កម្រាលគេង ភួយខ្នើយ​ ដែលពោពេញដោយមេរោគផ្សិត មកប៉ះជាមួយស្បែកខ្នងអ្នក បង្ករជាការរលាកស្បែកខ្នង និងធ្វើឱ្យខ្នងបង្កជាមុនខ្ទុះ។ ក្រៅពីកត្តាកង្វះអនាម័យ ក្នុងនោះមានកត្តាអម៉ូនដែលជាកត្តាជំរុញឱ្យកើតមុននេះផងដែរ នៅពេលអរម៉ូនប្រែប្រួលខ្លាំង។

ទន្ទឹមនឹងនេះ លោកវេជ្ជបណ្ឌិត គួច ម៉េងលី ក៏បានលើកឡើងស្រដៀងគ្នាថា​ ប្រសិនកូនក្មួយទាំងអស់គ្នាចង់បានផ្ទៃមុខស ស្បែកខ្នងរលោង គឺត្រូវ បោកកម្រាលពូក ស្រោមខ្នើយ ភួយឱ្យបានស្អាត, កក់សក់រៀងរាល់ថ្ងៃ ដើម្បីកម្ចាត់បាក់តេរី មេរោគផ្សិតដែលមាននៅជាប់នឹងរបស់ប្រើប្រាស់ទាំងនេះ។ ម្យ៉ាងទៀត ហាមដាច់ខាតយកក្រចកដៃ មកកេះមុខមុន ដែលនាំផ្ទៃដំបៅ ចេញឈាម ចម្លងមេរោគទៅកន្លែងផ្សេងទៀត៕