តើអ្នកដឹងទេ ថាហេតុអ្វីអ្នកមិនអាចបំភ្លេចសង្សារចាស់របស់អ្នកបាន? គឺដោយសារតែអ្នកស្រឡាញ់គេខ្លាំងពេក អ្នកមើលឃើញតែពីចំណុចល្អរបស់គេ អ្នកនៅតែព្យាយាមរំលឹកពីគេ អ្នកនៅតែគិតថាគេ​នៅតែស្រឡាញ់អ្នកដូចដែលអ្នកស្រឡាញ់គេ ឬអាចថាពេលខ្លះមកពីអនុស្សាវរីយ៍របស់អ្នកនឹងរូបគេវាមានច្រើនដែលធ្វើឱ្យអ្នកមិនអាចបំភ្លេចបាន។

ពិតមែនហើយ នៅពេលអ្នកចាប់ផ្ដើមស្រឡាញ់នរណាម្នាក់ វាប្រៀបបីដូចអ្នកបានឆ្លាក់រូបនិងឈ្មោះរបស់គេក្នុងបេះដូងរបស់អ្នកអញ្ចឹង ហើយរាល់សកម្មភាព ពាក្យសម្ដីរវាងអ្នកនឹងរូបគេគឺ បានថតនិងរក្សាទុកក្នុងខួរក្បាលរបស់អ្នកជានិច្ចមិនថាជារឿងល្អ ឬរឿងអាក្រក់នោះទេ។​ ម្យ៉ាង ប្រសិនបើអ្នកនឹងរូបគេស្រឡាញ់គ្នាក្នុងរយៈពេលយូរ នោះអនុស្សាវរីយ៍និងការចងចាំក៏មានច្រើនផងដែរ ហើយវាប្រាកដជាពិបាកនឹងបំភ្លេច ក៏ប៉ុន្តែអ្នកអាចធ្វើវាបានដោយសន្សឹមៗ។ ក្នុងនោះ ខ្ញុំបានលើកយកចំណុចខ្លឹមៗចំនួន៤ចំណុចដែលអាចជួយបន្ធូរចិត្តអ្នកឱ្យឈប់គិត ឈប់នឹកនាពីសង្សារចាស់របស់អ្នកបាន៖

១.លុបរូបភាពរវាងអ្នកនិងសង្សារចាស់៖ មិនថារូបនោះអ្នកស្រឡាញ់ប៉ុណ្ណា រូបនោះធ្លាប់ផ្ដល់ក្ដីសុខដល់ចំណីចក្ខុរបស់អ្នកយ៉ាងណាក៏ដោយ គឺអ្នកត្រូវតែលុបវាចេញឱ្យអស់ ដើម្បីកុំឱ្យអ្នកឃើញនាថ្ងៃក្រោយ។ អ្នកត្រូវចាំថា រូបភាពទាំងនោះវានឹងលងបន្លាចចិត្តអ្នកគ្រប់ពេលវេលាដែលអ្នកសម្លឹងមើលវា វានឹងផ្ដល់ការចងចាំដល់ខួរក្បាលរបស់អ្នក វានឹងភ្ញោចឱ្យចិត្តនិង អារម្មណ៍របស់អ្នកចេះតែនឹករលឹកដល់រូបគេ ដែលធ្វើឱ្យអ្នកកាន់តែនឹកគេខ្លាំងលើសដើម និងគ្មានថ្ងៃបំភ្លេចគេបាន។

២.លុបសារដែលធ្លាប់លេងជាមួយសង្សារចាស់៖ សារដែលធ្លាប់លេងជាមួយគេ សម្លេងសារដែលធ្លាប់ឆ្លើយឆ្លងជាមួយគេ គឺត្រូវតែលុបចេញពីទូរសព្ទ ឬកុំព្យូទ័រអ្នកឱ្យអស់។ នៅពេលអ្នកព្យាយាមទុកសារទាំងនេះ ថ្ងៃណាមួយដែលអ្នកនឹកគេខ្លាំង អ្នកនឹងចាប់ផ្ដើមទៅលួចស្ដាប់សារសម្លេងចាស់ៗ អានសារចាស់ៗពីមុនៗដែលធ្វើឱ្យអារម្មណ៍ និងចិត្តរបស់អ្នកនៅតែអន្ទោងនឹកនាដល់គេធ្វើឱ្យខួរក្បាល និងអារម្មណ៍របស់អ្នករវើរវាយនឹកឃើញតែមុខរបស់គេ ដូច្នេះរាល់សារចាស់ៗដែលទាក់ទងនឹងគេ គឺគួរតែលុបចោលឱ្យអស់។

៣.ធ្វើខ្លួនឱ្យរវល់៖ អ្នកអាចចំណាយពេលគិតឱ្យបានច្រើនទៅលើការងារ ការសិក្សា កិច្ចការងារផ្ទះ ហាត់ប្រាណ ដើរលេង និយាយលេងជាមួយមិត្តភក្ត អានសៀវភៅលើកទឹកចិត្ត ឬធ្វើអ្វីផ្សេងៗទៀតដែលអាចជួយឱ្យអ្នកមានភាពរីកចម្រើនជាងមុន ក្លាហានជាងមុន និងជាមនុស្សគួរឱ្យស្រឡាញ់ជាងមុ​ន។ នៅពេលអ្នករវល់ច្រើន ខួរក្បាល និងអារម្មណ៍របស់អ្នកគ្មានពេលគិតពីរឿងរ៉ាវផ្សេងនោះទេ ដូចនេះនឹងជួយឱ្យអ្នកអាចបំភ្លេចសង្សារចាស់លឿន។

៤.ឈប់តាមដានសកម្មភាពសង្សារចាស់៖ អ្នកអាចឈប់បាន​គឺ ឈប់តាមដានសកម្មភាពរបស់គេ ការរស់នៅរបស់គេ និងរឿងរ៉ាវដែលពាក់ព័ន្ធនឹងគេទាំងអស់ ឈប់សួរនាំនរណាម្នាក់ពីរូបគេ។ ដើម្បីបញ្ឈប់រឿងទាំងនេះបាន គឺអ្នកត្រូវតែឈប់តាមដានគេតាមរយៈហ្វេសប៊ុក អ៊ីនស្រ្តាក្រាម ឈប់តាមដានStory ឈប់លួចចូលមើលប្រូហ្វាល់របស់គេ។ ដូច្នេះជម្រើសល្អបំផុតគឺ អ្នកគួរតែឈប់Follow facebookឬ Instargramរបស់គេទាំងអស់ ពេលនោះអ្នកនឹងលែងបានឃើញទង្វើ ឬសកម្មភាពរបស់គេទៀតហើយ ហើយវានឹងជួយឱ្យអ្នកឆាប់នឹងភ្លេចគេបានលឿន។

ត្រូវចាំថា មនុស្ស២នាក់បែកគ្នា គឺំមិនមែនមកពីភាគីតែម្ខាងនោះទេ ពេលខ្លះអ្នកជាមនុស្សល្អហើយ ហើយគេក៏ជាមនុស្សល្អដូចគ្នា ក៏ប៉ុន្តែអាចថាមកពីកត្តាអត្តចរិក អាកប្បកិរិយារវាងអ្នកនឹងរូបគេ មិនសមស្របគ្នា ឬមិនចុះសម្រុងគ្នា។ សង្សារចាស់ មិនមែនជាសត្រូវនោះទេ ដូចនេះសូមកុំស្អប់ កុំចងគំនុំ ឬនិយាយអាក្រក់ពីគ្នា​បើទោះអ្នកបានគ្នាហើយក៏ដោយ។ ការនិយាយដើមពីសង្សារចាស់ប្រាប់នរណាម្នាក់ សបញ្ជាក់ឱ្យឃើញថា អ្នកជាមនុស្សអាត្មានិយម​ ជាមនុស្សទាមទារចំណាប់អារម្មណ៍ ការអាណិត ឬចង់ឱ្យអ្នកដទៃគិតអាក្រក់ទៅសង្សារចាស់អ្នក ម្យ៉ាងវាធ្វើឱ្យអ្នកបាត់បង់ភាពថ្លៃថ្នូរជាខ្លួនឯង។ ដាច់ខាតកុំដើរនិយាយហែរហូរ ពីសង្សារចាស់ប្រាប់ទៅអ្នកដទៃ អ្នកគួរតែចេះរក្សាសិទ្ធឱ្យបុគ្គលម្នាក់ៗ ជាពិសេសសង្សាររបស់អ្នក ហើយថាមិនត្រូវអ្នកនឹងរូបគេអាចនឹងត្រឡប់មកស្រឡាញ់គ្នាវិញក៏ថាបាន។

សូមកុំព្យាយាមបំភ្លេចរូបគេខ្លាំងពេក កាលណាតែអ្នកព្យាយាមបំភ្លេចនរណាម្នាក់ខ្លាំងពេក ខួរក្បាលរបស់អ្នកនឹងផុសតែរូបម្នាក់នោះមកក្នុងខួរក្បាល រុញច្រាណឱ្យអារម្មណ៍របស់អ្នកដិតដាម និងពោរពេញទៅដោយរូបគេ និងនឹកនារូបគេលើសដើម។ អ្នកត្រូវចាំថា អ្នកបានចំណាយពេលយូរក្នុងការស្រឡាញ់រូបគេ ហើយគេក៏ជាមនុស្សម្នាក់ដែលធ្លាប់ត្រូវបានអ្នកឆ្លាក់ឈ្មោះក្នុងបេះដូងរបស់អ្នក រយៈពេលនៃការស្រឡាញ់វាយូរ ដូច្នេះស្នាមឈ្មោះកាន់តែដក់ជាប់ចូលជ្រៅ ដូច្នេះការកាត់ចិត្តភ្លាមៗ គឺមិនអាចទៅរួចនោះទេ។ អ្វីដែលអ្នកត្រូវធ្វើបន្តបន្ទាប់នោះ គឺត្រូវចេះស្រឡាញ់ខ្លួនឯង ខិតខំប្រឹងប្រែងធ្វើការ ខំរៀន ពង្រឹងសមត្ថភាព ទាំងចំណេះដឹង និងថែទាំសុខភាពរបស់អ្នកឱ្យរឹងមាំ ថែសម្រស់និងរូបរាងរបស់អ្នកឱ្យស្អាត ធ្វើខ្លួនឱ្យក្លាយជាមនុស្សម្នាក់ដែលមានតម្លៃ និងទទួលយកការពិតចំពោះអ្វីដែលកើតឡើង។

ប្រភព៖ STYLECRAZE

អត្ថបទដោយ៖ កញ្ញា​តឹក ស៊ីថា​