ហើយក្នុងថ្ងៃប្រធានបទ១ថ្ងៃ Healthy Cambodia នឹងលើកឡើងនូវអត្ថប្រយោជន៍បន្ថែមជូនទៅកាន់បងប្អូននារីៗនឹងទទួលបាន បន្ទាប់ពីផឹកទឹកដោះគោល្មៀត១កែវមុនចូលគេងជារៀងរាល់យប់៖

១. ជួយជំរុញការគេង៖ ការផឹកទឹកដោះគោល្មៀតក្តៅឧណ្ហៗ មុនចូលគេង វានឹងអាចជះឥទ្ធិពលកាន់តែប្រសើរ ជួយធ្វើឱ្យខួរក្បាលបានស្ងប់ ចរន្តឈាមរត់ស្រួល ធ្វើឱ្យកោសិការាងកាយឆាប់សម្រាក ដែលជាហេតុជួយពន្លឿនដល់ការគេងលក់បានលឿន និងគេងលក់បានស្កប់ស្កល់ទល់ភ្លឺ។ សម្រាប់ក្នុងកម្រិតសីតុណ្ហភាព ដែលត្រូវកម្តៅទឹកដោះគោលាយនឹងម្សៅល្មៀត មិនឱ្យក្តៅពេកទេ កម្តៅត្រឹមចន្លោះពី៦០ ទៅ៧០% គឺអាចយកមកទទួលទានហើយ ពីព្រោះថាបើកម្តៅដល់ពុះអាចនឹងធ្វើឱ្យសារជាតិចិញ្ចឹមមួយចំនួនត្រូវបានបាត់បង់។

២. ធ្វើឱ្យអារម្មណ៍ប្រសើរឡើង៖ សារធាតុសកម្មនៅក្នុងល្មៀតដែលគេហៅថា curcumin បូករួមជាមួយនឹងសារធាតុ វីតាមីន D ដែលមាននៅក្នុងទឹកដោះគោ នឹងដើរតួនាទីព្រមគ្នាចូលទៅជំនួយដល់សុខភាពផ្លូវចិត្ត ធ្វើឱ្យអារម្មណ៍ឆាប់ស្ងប់ កាត់បន្ថយបញ្ហាស្ត្រេសតានតឹងក្នុងអំឡុងពេលយប់ និងការពារសុខភាពផ្លូវចិត្តចេញពីជំងឺធ្លាក់ទឹកចិត្ត។

៣. ជំនួយដល់មុខងារខួរក្បាល និងបង្កើនការចងចាំ៖ សារជាតិ glutathione និងសមាសធាតុផ្សេងទៀតក្នុងទឹកដោះគោ ផ្សំជាមួយនឹងសារជាតិប្រឆាំងអុកស៊ីតកម្មក្នុងល្មៀត អាចជួយជម្រុញដល់មុខងារខួរក្បាលឱ្យមានដំណើរការល្អ បង្កើនអង្គចងចាំ និងកាត់បន្ថយនៃបញ្ហាជំងឺភ្លេចភ្លាំង វង្វេង ដាច់សរសៃឈាមខួរក្បាលផងដែរ។

៤. ជំនួយស្បែក៖ សមាសធាតុសកម្មនៅក្នុងល្មៀតមានអង់ទីអុកស៊ីដង់ដ៏ខ្លាំងក្លា ដែលមានលក្ខណៈសម្បត្តិជួយប្រឆាំងនឹងរ៉ាឌីកាល់សេរី ការពារស្បែកមិនប្រឈមមុខនឹងបញ្ហារលាកផ្សេងៗ។ ចំណែកឯនៅក្នុងទឹកដោះគោវិញ ក៏មានប្រយោជន៍បន្ថែមផងដែរ ក្នុងការជួយដល់កោសិកាស្បែក និងជួសជុលកោសិកាខូចខាតដែលមាននៅក្នុងស្រទាប់ស្បែក ជួយសុខភាពស្បែកឱ្យមានសភាពម៉តរលោង ភ្លឺថ្លា និងក្មេងជាងវ័យថែមទៀត។

ដោយឡែក ទាក់ទិនទៅនឹងការទទួលទានប្រភេទទឹកដោះគោល្មៀតជាប្រចាំ មានបងប្អូនមួយចំនួនលើកឡើងថា វាធ្វើឱ្យធ្មេញលឿង ចំណុចនឹងអាចមកពីបងប្អូនប្រើម្សៅល្មៀតខ្លាំងពេក ​ជាទូទៅចំពោះម្សៅល្មៀតប្រើក្នុងទឹកដោះគោ១កែវ គេប្រើតែបរិមាណ១ស្លាបព្រាកាហ្វេប៉ុណ្ណោះ៕