ការរស់នៅរបស់លោកយាយមានភាពសាមញ្ញ តែមានភាពឡូយឆាយបែបរស់ទំនើបដោយគាត់យល់ថា បើកាយមិនមាំទេ ចិត្តក៏មិនមាំដូចគ្នា ថែកាយដូចជាថែចិត្ត។ មានមនុស្សភាគច្រើនមិនសូវខ្វល់ពីសុខភាពប៉ុន្មានទេ ខំធ្វើការខ្លាំងរហូតដេកឈឺ រស់បែបនេះជាការប្រើជីវិតខុសផ្លូវលំហូរចិត្តហើយ។ ដូចជាលោកយាយខំថែសុខភាពតាំងពីក្មេងដើម្បីតាមប្រមាញ់ក្តីស្រមៃជាអ្នកច្នៃម៉ូតឱ្យក្លាយជាការពិត។ គាត់ធ្លាប់ជាអ្នករចនាម៉ូតក្នុងសេតវិមានប្រធានាធិបតីអាម៉េរិកចំនួន ៩រូប រហូតមានរហ្សនាមថា First Lady Of Fabric ។

សម្រាប់លោកយាយ អាចរស់នៅតាមលំហូរចិត្តស្ទើរពេញមួយជីវិត មកពីគាត់ស្គាល់ខ្លួនឯង រស់ក្នុងក្តីស្រមៃ មិនមែនរស់តាមគំនិតអ្នកដទៃនោះទេ។ ទោះបីមានគេរិះគន់មកលើគាត់ថា ចាស់ហើយ! នៅតែងខ្លួនដូចក្មេងអត់ចេះខ្មាស់គេទេ បើនិយាយពីសំលៀកបំពាក់លេងពណ៌ឆើតពេកហើយ អាក្រក់មើលណាស់។ មានលុយរាប់សិបលានដុល្លារហើយមិនព្រមចូលនិវត្តន៍ដេកចាយលុយខ្លះទៅ...។ ចូលនិវត្តន៍ធ្វើអី្វបើគាត់កំពុងតែរីករាយជាមួយការងារក្នុងពេលសព្វថ្ងៃនេះ? ប្រសិនបើឱ្យគាត់ឈប់ពីការងារដែលខ្លួនស្រឡាញ់ដូចជាដកបេះដូងរបស់គាត់ចេញពីកាយ វាមិនខុសពីស្លាប់ទាំងរស់នោះទេ។ តាមលោក Norman Cousin ជាអ្នកការសែតដ៏ល្បីបានពោលថា “សោកនាដកម្មសម្រាប់ជីវិតនេះ មិនមែនការស្លាប់នោះទេ ប៉ុន្ដែវាជាអ្វីដែលអ្នកបានអនុញ្ញាតឲ្យការស្លាប់ចូលមកក្នុងខ្លួនរបស់អ្នក ពេលដែលអ្នកកំពុងតែមានជីវិតរស់នៅ”។

ចំណុចខ្លាំងរបស់លោកយាយអត់ខ្វល់សម្តីរិះគន់ទាំងនេះទេ គាត់រស់ក្នុងលំហូរចិត្តរស់ក្នុងក្តីស្រមៃ ហើយរីករាយក្នុងការងារជាអ្នកច្នៃម៉ូត។ គាត់បាននិយាយថា “ខ្ញុំបានរកឃើញការងារធ្វើតាមក្តីស្រមៃរបស់ខ្ញុំ ខ្ញុំគ្មានថ្ងៃចូលនិវត្តន៍នោះទេ”។ តាម Dan Buttner ជាអ្នកនិពន្ធសៀវភៅ “តំបន់ខៀវ” ពីអ្នកមានអាយុវែងបានបញ្ជាក់ថា មានប្រជាជនអាមេរិកមួយចំនួនបានចូលនិវត្តន៍ ស្លាប់ក្នុងឆ្នាំដំបូងព្រោះតែឈប់ពីការងារដោយសារតែមានកត្តាធំមួយ មកពីអស់កម្លាំងចិត្តក្នុងការរស់នៅបន្តទៀត។” ខ្ញុំជឿថា បើមនុស្សម្នាក់ៗ រស់តាមលំហូរចិត្តរបស់ខ្លួន កម្រមានបញ្ហាផ្លូវចិត្តនិងអស់សង្ឃឹមក្នុងជីវិតណាស់។ ដូចជាលោកយាយ អារីស ជាមនុស្សមានសំណាងបានរកឃើញលក្ខណៈជាខ្លួនឯងហើយគាត់ភ្ញាក់ពីគេងជាមួយអារម្មណ៍ស្រេកឃ្លានក្នុងការឌីហ្សាញម៉ូតសំលៀកបំពាក់បែបថ្មីៗ ជារាល់រៀងថ្ងៃ។ ហើយនៅឆ្នាំ២០២៤នេះ គាត់បានទទួលមរណៈភាពតាមក្តីស្រមៃជាច្នៃម៉ូតពេញមួយជីវិត៕ អ្នកអាចអានសៀវភៅ លំហូរចិត្ត បន្ថែម ដើម្បីដឹងសាច់រឿងលម្អិតពីគាត់៕ អត្ថបទដោយ៖ ទ្រ សុភាព

អ្នកអាចទិញសៀវភៅ លំហូរចិត្ត តាមនេះ👉https://t.me/BusinessCambodiaBook