នៅថ្ងៃទី៤ ខែឧសភា មុននេះបន្តិចសម្តេចហ៊ុន សែន បានចេញសេចក្តីណែនាំចំនួន១៤ចំណុច ដើម្បីទប់ស្កាត់ការឆ្លងរីករាលដាលជំងឺកូវីដ១៩នៅទូទាំងប្រទេស ខណៈជំងឺកាចសាហាវនេះ កំពុងឆ្លងកាន់តែច្រើនឡើង។
យោងតាមសេចក្តីប្រកាស សម្តេចហ៊ុន សែន បានបញ្ជាក់ថា ក្នុងព្រឹត្តិការណ៍សហគមន៍២០ កុម្ភៈ រាជរដ្ឋាភិបាលបានសម្រេចបិទខ្ទប់រយៈពេល១៤ថ្ងៃ។ ហើយការបិទខ្ទប់នេះ បានជួយកាត់ផ្តាច់ការឆ្លងរាលដាលក្នុងទ្រង់ទ្រាយធំ និងល្បឿនលឿននៃជំងឺនេះក្នុងសហគមន៍ក្នុងភូមិសាស្ត្របិទខ្ទប់ ព្រមទាំងកាត់ផ្តាច់ការឆ្លងរាលដាលជំងឺនេះទៅតំបន់ផ្សេងទៀតនៅទូទាំងប្រទេស ជាពិសេសបានបង្កលក្ខណៈដល់អាជ្ញាធរមានសមត្ថកិច្ចអាចខ្ទប់ការឆ្លងរាលដាលនៃជំងឺនេះឱ្យស្ថិតនៅដាច់ដោយដុំៗ ទៅតាមភូមិសាស្ត្រនីមួយៗ។
ដោយសារស្ថានភាពជំងឺឆ្លងកាន់តែច្រើន អាជ្ញាធរបន្តបិទខ្ទប់រយៈពេល៧ថ្ងៃបន្តទៀតរហូតដល់ថ្ងៃទី៥ ខែឧសភា ឆ្នាំ២០២១ និងបានបែងចែកតំបន់បិទខ្ទប់រួមមួយ៖ មានតំបន់ក្រហម តំបន់លឿងទុំ និងតំបន់លឿង។
ទន្ទឹមនេះ ដើម្បីការពារអាយុជីវីត និងសុខភាពប្រជាពលរដ្ឋ ក៏ដូចជាដើម្បីធានាស្ថិរភាពនៅក្នុងដំណើរការជាប្រក្រតីផ្នែកសង្គម និងសេដ្ឋកិច្ច និងបិទខ្ទប់ការឆ្លងកាន់តែធ្ងន់។ រាជរដ្ឋាភិបាលបានដាក់ចេញនូវយុទ្ធនាការជាតិចាក់វ៉ាក់សុំាងនៅភូមិសាស្ត្រក្រុងភ្នំពេញ ខេត្តកណ្តាល និងតាមបណ្តាខេត្តផ្សេងទៀត។
គួររំលឹកថា កាលពីម្សិលមិញនេះ រាជរដ្ឋាភិបាលបានចេញសេចក្តីសម្រេចបញ្ចប់តំបន់នៅក្រុងភ្នំពេញ និងក្រុងតាខ្មៅ តែនៅអនុវត្តវិធានការចាំបាច់ដដែល។
ហើយដើម្បីពង្រឹងការអនុវត្តវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ១៩ រាជរដ្ឋាភិបាលសូមធ្វើការណែនាំបន្ថែមដល់ក្រសួងស្ថាប័នមានសមត្ថកិច្ច ព្រមទាំងគណៈអភិបាលរាជធានី ខេត្ត នូវវិធានការចាំបាច់មួយចំនួនខាងក្រោម៖