ស្រ្ដីគ្រប់រូបទាំងអស់សុទ្ធសឹងតែមានឱកាសប្រឈមមុខនឹងបញ្ហាស្រុតស្បូន បើសិនជាមានទម្លាប់អង្គុយចោងហោង លើករបស់ធ្ងន់ៗលើសកម្លាំង មិនហាត់ប្រាណ និងបណ្តោយឱ្យខ្លួនឯងធាត់លើសគីឡូជាដើម។
ជាក់ស្ដែងយោងតាមការលើកឡើងរបស់អ្នកឧកញ៉ាវេជ្ជបណ្ឌិត គួច ម៉េងលី បានឲ្យដឹងថា ជាទូទៅស្រ្ដីខ្មែរយើងមួយចំនួនមានបញ្ហាស្រុតស្បូនមិនដឹងខ្លួនជាច្រើន ជាពិសេសគឺស្រ្ដីដែលអង្គុយចោងហោងញឹកញាប់ ឬក៏ជាប្រចាំដែលធ្វើឱ្យសាច់ដុំទ្របាទ ឬហៅថាសាច់ដុំអាងត្រគាគខ្សោយ យារ ជាហេតុបណ្ដាលឱ្យស្បូនស្រុតចុះមកមាត់ទ្វាមាស ហើយដំណាក់កាលធ្ងន់ធ្ងរស្បូននោះធ្លាក់ចេញមកក្រៅទ្វារមាសក៏មានដែរ។
ផលវិបាកនៃការស្រុតស្បូននេះគឺតែងតែធ្វើទុក្ខបុកម្នេញជានិច្ចធ្វើឲ្យស្រ្ដីងាយឈឺនោម លេចលាមក ឈឺចាប់នៅពេលបត់ជើងតូច ពេលបត់ជើងធំម្ដងម្កាលអាចនឹងឃើញស្បូនស្រុតចុះមក ឈឺចាប់ពេលរួមភេទ ជាពិសេសបណ្តាលឱ្យទ្វារមាសរបស់អ្នកដំបៅ និងប្រឈមមុខខ្លាំងទៅនឹងជំងឺមហារីកមាត់ស្បូន។
ដើម្បីជាសារដាស់តឿននឹងចែករំលែកដល់ស្រ្ដីគ្រប់ឲ្យចៀសឆ្ងាយពីជំងឺស្រុតស្បូននេះអ្នកឧកញ៉ាវេជ្ជបណ្ឌិត គួច ម៉េងលី បានណែនាំវិធីសាស្រ្ដមួយចំនួនដូចជា៖
១. ហាត់ប្រាណតាមវិធី Kegel៖ ហាត់ប្រាណបែបនេះ គឺមានសារសំខាន់ណាស់សម្រាប់ជួយដល់សាច់ដុំអាងត្រគាកប្លោកនោម ទ្រទ្រង់ស្បូន ពោះវៀនតូច រួមទាំងរន្ធគូទផងដែរ។ដោយហេតុថាភាពខ្សោយរបស់ស្បូនដោយសារ អាយុ ទម្ងន់ ការសម្រាលកូនច្រើន ក៏បង្កឱ្យស្រ្តីងាយមានបញ្ហាលេចនោម នៅពេលក្អក ពេលកណ្ដាស់ ពេលសើចជាដើម។ ការហាត់ប្រាណបែបkegel អាចជួយឱ្យអាការរបស់ស្រ្តីទាំងប៉ុន្មាននេះបានធូរស្រាលច្រើន ជួយទៅបន្ដឹងទ្វារមាសស្រ្តីឡើងវិញ។
២. កុំអង្គុយចោងហោង៖ នៅត្រង់ចំណុចនេះការអង្គុយចោងហោងបើសិនជាអ្នកអង្គុយនៅលើកៅអី ឬក៏អង្គុយលើវត្ថុណាមួយទ្របាតគឺមិនមានបញ្ហាអ្វីនោះទេ។ ប៉ុន្តែបើអ្នកអង្គុយចោងហោងដោយទទេគឺងាយនឹងស្រុតស្បូន យារ នឹងខ្សោយស្បូន។ ដូច្នេះស្រ្តីមិនគួរទម្លាប់អង្គុយចោងហោងនោះទេ។
ជាចុងក្រោយនេះបន្ថែមពីលើនេះទៀត ស្រ្តីអាចចំណាំរោគសញ្ញាស្រុតស្បូនបាន ប្រសិនបើអ្នកមានបញ្ហាស្រុតស្បូននោះវានឹងមានអាការមួយចំនួនដូចជា មានអារម្មណ៍ ណែននៅត្រង់ទ្វារមាស មានដុំពកនៅត្រង់ទ្វារមាស ឈឺខ្នងផ្នែកខាងក្រោមនៅពេលអ្នកអង្គុយ បត់ជើងតូចញឹកញាប់ ការហូរឈាមខុសធម្មតាតាមទ្វារមាស លេចនោម...នៅពេលដែលមនុស្សស្រីម្នាក់មានបញ្ហាស្រុតស្បូនដំណាក់កាលដំបូងធ្វើឱ្យពួកគេឈឺចាប់នៅពេលបត់ជើងតូច ហើយងាយនឹងឆ្លងមេរោគតាមផ្លូវទឹកនោម ៕