មិនខុសពីរប្រកួតកីឡាអាស៊ានប៉ារ៉ាហ្គេម លើកទី១១ ដែលបានធ្វើនៅទីក្រុងសូឡូ ប្រទេសឥណ្ឌូនេស៊ី កីឡាការិនី វ៉ិត ចន្ថា ជាអត្តពលិកជនពិការម្នាក់ នៅតែឈរលេខរៀងលំដាប់លេខ១ ដោយការប្រកួតកីឡាប៉ារ៉ាហ្គេមលើកទី១២នេះ ដែលកម្ពុជាកំពុងតែធ្វើជាម្ចាស់ផ្ទះកីឡាការិនីបានប្រជែងយកមេដាសមាសចំនួន២គ្រឿងជូនជាតិ។
ចំពោះមេដាយដែលកីឡាការិនី វ៉ិត ចន្ថា ប្រជែងបានមេដាយប្រាក់១គ្រឿងលើវិញ្ញាសាលោតចម្ងាយ ព្រឹត្តិការណ៍ អាស៊ានប៉ារ៉ាហ្គេម លើកទី១២ ហើយបន្ទាប់មកកីឡាការិនីរូបនេះ ប្រជែងបានមេដាយមាស ១គ្រឿងបន្ថែមទៀត លើវិញ្ញាសាលោតចម្ងាយដដែល ខណៈនៅថ្ងៃទី៥ ខែមិថុនា វ៉ិត ចន្ថា ប្រជែងបានមេដាយមាស ១គ្រឿងបន្ថែមទៀត លើវិញ្ញាសារត់ចម្ងាយ៤០០ម៉ែត្រ ក្នុងប្រភេទពិការ T44។
គួរជម្រាបដែរថា កីឡាការិនីពិការជើងស្តាំ វ៉ិត ចន្ថា ធ្លាប់បានបង្កើតកំណត់ត្រាប្រវត្តិសាស្រ្តថ្មី ដែលមិនទាន់មានអត្តពលិកជនពិការកម្ពុជារូបណាធ្វើបានដូចនោះទេ គឺការដណ្តើមបានមេដាយមាសចំនួន ២ និងមេដាយប្រាក់ ១ ពីការប្រកួតកីឡាអាស៊ានប៉ារ៉ាហ្គេម លើកទី១១ ដែលបានធ្វើនៅទីក្រុងសូឡូ ប្រទេសឥណ្ឌូនេស៊ី ៕