ស្ត្រីមានផ្ទៃពោះ មួយចំនួនត្រូវបានអ្នកជំនាញរកឃើញថា មានការលើសជាតិស្ករដោយមិនដឹងខ្លួន ដូច្នេះហើយទើបបានជាក្រុមគ្រូពេទ្យ ច្រើនណែនាំឱ្យស្ត្រីមានផ្ទៃពោះត្រូវតេស្តជាតិស្ករតាំងពីត្រីមាសដំបូង ដើម្បីបង្ការបញ្ហាប្រឈមនឹងជំងឺទឹកនោមផ្អែម និង​ព្យាបាល​បាន​ទាន់​ពេល​វេលា។

ផ្អែកតាមប្រភពចេញផ្សាយរបស់គេហទំព័រ mayoclinic​ ជំងឺទឹកនោមផ្អែមពេលមានគភ៌ គឺជាជំងឺទឹកនោមផ្អែមដែលត្រូវបានគេធ្វើរោគវិនិច្ឆ័យឃើញជាលើកដំបូងអំឡុងពេលមានផ្ទៃពោះ (មានផ្ទៃពោះ) ដោយបណ្ដាលមកពីផលប៉ះពាល់នៃដំណើរការសារជាតិស្ករខ្ពស់ក្នុងឈាម (គ្លុយកូស)។

អ្នកមានជំងឺទឹកនោមផ្អែមអំឡុងពេលមានផ្ទៃពោះ ជាទូទៅជាតិស្ករក្នុងឈាមនឹងត្រលប់ទៅកម្រិតធម្មតាវិញភ្លាមៗបន្ទាប់ពីការសម្រាល។ ប៉ុន្តែប្រសិនបើអ្នកមានជំងឺទឹកនោមផ្អែមពេលមានគភ៌ អ្នកមានហានិភ័យខ្ពស់ក្នុងការកើតជំងឺទឹកនោមផ្អែមប្រភេទទី២ ហេតុនេះហើយ គ្រូពេទ្យជំនាញរមែងណែនាំឱ្យអ្នកជំងឺប្រភេទនេះ​ព្យាយាមថែសុខភាព និងគោរពតាមបទបញ្ជាររបស់ក្រុមគ្រូពេទ្យជាចាំបាច់។

ដោយឡែក ក្នុងលក្ខខណ្ឌបង្ការ ប្រសើរជាងព្យាបាល ប្រភព mayoclinic ដដែល ក៏បានលើកឡើងនូវគន្លឹះថែសុខភាពចំនួន៤ អាចកាត់បន្ថយហានិភ័យនៃការកើតជំងឺទឹកនោមផ្អែមនៅពេលមានផ្ទៃពោះ និងបង្ការកុំឱ្យកើតវិវត្តទៅជាជំងឺទឹកនោមផ្អែមប្រភេទទី 2 នាពេលអនាគត៖

១​. បរិភោគអាហារដែលមានសុខភាពល្អ៖ ជ្រើសរើសអាហារសម្បូរជាតិសរសៃ និងខ្លាញ់ទាប និងកាឡូរី ដោយស្ត្រីពពោះ ឬមានគម្រោងយកបុត្រធីតាគ្រប់រូប គួរផ្តោតលើការញុំា ផ្លែឈើ បន្លែ និងគ្រាប់ធញ្ញជាតិ និងមាននូវអាហារូបត្ថម្ភជាជំនួយបន្ថែមផងដែរ។

២. រក្សាសកម្មភាព៖ លំហាត់ប្រាណមុន និងអំឡុងពេលមានផ្ទៃពោះ អាចជួយការពារស្ត្រីពីការវិវត្តនៃជំងឺទឹកនោមផ្អែមពេលមានគភ៌បាន។ ហេតុនេះ គួរដាក់គោលដៅសម្រាប់សកម្មភាពប្រចាំថ្ងៃ គិតជាមធ្យម ៣០នាទី និងហាត់យ៉ាងហោចណាស់ឱ្យបាន ៣ ទៅ៤ក្នុង១សប្តាហ៍។ សកម្មភាពទាំងនោះមិនមែនតម្រូវឱ្យធ្វើជាលំហាត់ប្រាណធ្ងន់ៗទេ គឺគ្រាន់តែធ្វើលំហាត់ប្រាណដើរ រត់តិច ឬធ្វើលំហាត់ប្រាណបែបយូហ្គា...ជាដើម។

៣. រក្សាទម្ងន់មុនពេលមានផ្ទៃពោះឱ្យល្អ៖ ប្រសិនបើមានគម្រោងមានផ្ទៃពោះ ការសម្រកការថែរក្សាទម្ងន់ឱ្យមានតុល្យភាពគឺជារឿងចាំបាច់បំផុត ព្រោះវាអាចជួយសុខភាពអ្នកមួយផ្នែកនៅពេលមានគភ៌ និងងាយស្រួលក្នុងការតាមដានគីឡូនៅពេលមានទម្ងន់ផងដែរ។

៤. កុំឡើងទម្ងន់លើសពីការណែនាំ៖ ការឡើងទម្ងន់ខ្លះអំឡុងពេលមានផ្ទៃពោះ គឺជារឿងធម្មតា និងល្អសម្រាប់សុខភាពម្តាយ ជាមួយទារកក្នុងផ្ទៃ។ ប៉ុន្តែការឡើងទម្ងន់លឿនពេក អាចបង្កើនហានិភ័យនៃជំងឺទឹកនោមផ្អែមពេលមានគភ៌ផងដែរ ហេតុនេះ ស្ត្រីមានផ្ទៃពោះ គ្រប់រូបគួរតែយកចិត្តទុកដាក់ក្នុងការស្តាប់តាមការណែនាំរបស់គ្រប់គ្រូពេទ្យ និងកុំបណ្តោយខ្លួនឱ្យលើសទម្ងន់ហួសហេតុពេក ដោយនេះជាហេតុធ្វើឱ្យកើតជំងឺដោយមិនដឹងខ្លួន។

ជារួមមកវិញ សម្រាប់ស្ត្រីមានផ្ទៃពោះ ការថែទាំសុខភាពពិតជាចាំបាច់ខ្លាំងណាស់ ដោយហេតុថា ការថែទាំសុខភាពនេះ គឺមិនត្រឹមតែជួយដល់ម្តាយនោះទេ គឺថែមទាំងជួយទៅដល់សុខភាពទារកក្នុងផ្ទៃឱ្យមានសុខភាពល្អផងដែរ។ អាស្រ័យ ហេតុនេះហើយសូមអ្នកម្តាយគ្រប់រូបគួរយកចិត្តទុកដាក់ក្នុងការថែទាំសុខភាពរាងកាយ ក៏ដូចជាសុខភាពផ្លូវចិត្ត ដើម្បីជួយឱ្យបុត្រធីតាកើតមកមានសុខភាពល្អទាំងព្រម៕

អត្ថបទដោយ៖ ប៉ាវ ភក្តី