ជំងឺបេះដូងត្រូវបានសង្កេតឃើញថា កើតឡើងញឹកញាប់ ទៅលើមនុស្សយើងមិនថាភេទស្រី ឬប្រុសនោះទេ ជាពិសេសមនុស្សដែលមានវ័យចំណាស់ ហើយវាក៏ជាប្រភេទជំងឺមួយដ៏គ្រោះថ្នាក់ អាចបង្កឲ្យមានផលវិបាកជាច្រើនដល់សុខភាព ឬនាំឲ្យគ្រោះថ្នាក់ដល់អាយុជីវិតបានទៀតផង ។ ខាងក្រោមនេះ ជាវិធីសាស្រ្តទាំង៦ ដែលអាចជួយកាត់បន្ថយហានិភ័យនៃការកើតជំងឺបេះដូងបាន ។
១. កុំជក់បារី៖ សារធាតុគីមីនៅក្នុងផ្សែងបារី បានធ្វើឲ្យប៉ះពាល់ដល់សុខភាពបេះដូងនិងសរសៃឈាមយ៉ាងធ្ងន់ធ្ងរ ។ សារធាតុគីមីទាំងនេះ បានកាត់បន្ថយអ៊ុកស៊ីសែននៅក្នុងចរន្តឈាម ដែលជាមូលហេតុនាំឲ្យឡើងសម្ពាធឈាម និងចង្វាក់បេះដូងដើរញាប់។
២. ហាត់ប្រាណឲ្យបាន៣០នាទីក្នុងមួយថ្ងៃ៖ ការហាត់ប្រាណបានទៀតទាត់ត្រឹមរយៈពេល៣០នាទីក្នុងមួយថ្ងៃ បានជួយឲ្យបេះដូងមានសុខភាពល្អ តាមរយៈការកាត់បន្ថយជាតិខ្លាញ់មិនល្អក្នុងចរន្ដឈាម បន្ថយកម្រិតសម្ពាធឈាម និងជំងឺទឹកនោមផ្អែមជាដើម។
៣. មានរបបអាហារសុខភាព៖ ការមានទម្លាប់ញ៉ាំអាហារសុខភាព បានជួយឲ្យបេះដូងមានសុខភាពល្អ ។ លោកអ្នកគួរមានទម្លាប់ញ៉ាំបន្លែ ផ្លែឈើ សាច់ត្រី គ្រាប់ធញ្ញជាតិ ហើយគួរកាត់បន្ថយការញ៉ាំអាហារដែលមានជាតិខ្លាញ់មិនល្អ អាហារប្រៃខ្លាំង អាហារមានជាតិស្ករខ្ពស់ និងអាហារដែលមានផ្ទុកសារធាតុរក្សាទុកជាដើម ។
៤. គេងឲ្យបានគ្រប់គ្រាន់៖ ការគេងមិនបានគ្រប់គ្រាន់ បានផ្ដល់ផលអវិជ្ជមានជាច្រើនចំពោះសុខភាព ក្នុងនោះក៏មានសុខភាពបេះដូងផងដែរ ។ លោកអ្នកគួរមានទម្លាប់គេងឲ្យបានចន្លោះពី ៧ ទៅ៨ម៉ោងក្នុងមួយថ្ងៃ ទើបជាការប្រសើរចំពោះសុខភាព ។
៥. កាត់បន្ថយអារម្មណ៍ស្រ្តេស៖ អារម្មណ៍មានទំនាក់ទំនងយ៉ាងជិតស្និទ្ធជាមួយសុខភាព ដូចនេះ លោកអ្នកគួរចំណាពេលវេលាខ្លះដើម្បីកម្សាន្ត ដើរលេងជួបជុំជាមួយគ្រួសារ និងការធ្វើសមាធិជាដើម ។
៦. ពិនិត្យសុខភាពជាប្រចាំ៖ ការពិនិត្យសុខភាពជាប្រចាំ ពិតជាសំខាន់ណាស់ចំពោះសុខភាពលោកអ្នក ជាពិសេសលោកអ្នកដែលមានបញ្ហាលើសទម្ងន់រាងកាយ លើសជាតិខ្លាញ់ (Cholesterol ) មានជំងឺលើសសម្ពាធឈាម និងអ្នកជំងឺទឹកនោមផ្អែមជាដើម ៕
អត្ថបទដោយ៖ ហួ ភារ៉ា
ប្រភព៖ www.mayoclinic.org