យោងតាមការចុះផ្សាយពីក្រសួងសុខាភិបាល កាលពីថ្ងៃទី២០ ខែឧសភា ឆ្នាំ២០២៣ កន្លងទៅនេះ រាជរដ្ឋាភិបាលបានសម្រេចបង្កើតមន្ទីរពេទ្យថ្មីមួយដែលមានឈ្មោះថា UHS ដែលមានឈ្មោះពេញថា (University of Healthy Science Teaching Hospital )។ មន្ទីពេទ្យថ្មីនេះបង្កើតឡើង ដើម្បីអប់រំ និងបណ្ដុះបណ្ដាលនិស្សិតវិទ្យាសាស្ដ្រសុខាភិបាលលើផ្នែកវេជ្ជសាស្រ្ដ និងផ្នែកគ្លីនិក ក៏ដូចជាការព្យាបាលអ្នកជំងឺផងដែរ។
ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាលបានអោយដឹងថា “អគារតេជោអភិវឌ្ឍន៍”នេះ ជាអគារថ្មី ដែលត្រូវបានសាងសង់ឡើង ដោយបំពាក់នូវឧបករណ៍វេជ្ជសាស្ត្រទំនើបៗ ដែលនាំចូលមកពីប្រទេសអាលឺ្លម៉ង់ និងសហរដ្ឋអាមេរិក ដើម្បីឆ្លើយតបទៅនឹងតម្រូវការ ក៏ដូចជាក្តីរំពឹងរបស់ប្រជាពលរដ្ឋកម្ពុជា លើសេវាសុខភាពសាធារណៈនៅកម្ពុជា។ អគារមជ្ឈមណ្ឌលពហុឯកទេសនេះ ត្រូវបានធ្វើពិធីបញ្ចុះបឋមសិលាបើកការដ្ឋានសាងសង់កាលពីដើមខែមីនា ឆ្នាំ២០១៨ កន្លងទៅ។
អគារទំនើបថ្មីមួយនេះមានប្រមាណ៤៦៥គ្រែ និងមានបន្ទប់វះកាត់ចំនួន១០ ដោយបំពាក់បច្ចេកវិទ្យាវេជ្ជសាស្ត្រឈានមុខដែលប្រមូលផ្តុំទៅដោយឯកទេសវេជ្ជសាស្ត្រ និងសល្យសាស្ត្រសំខាន់ៗទាំងអស់ រួមទាំងផ្នែកសង្គ្រោះបន្ទាន់ ផ្នែកប្រពោធនកម្មពហុឯកទេសទំនើបទៀតផង។
ជាក់ស្ដែងតាមរយៈវីដេអូដែលមានរយៈពេលជាង ២នាទី របស់ក្រសួងសុខាភិបាល បានបញ្ជាក់ថា មន្ទីរពេទ្យ UHS ត្រូវបានបង្កើតឡើងក្រោមផែនការអភិវឌ្ឍន៍ជាតិ មានកម្ពស់៧ជាន់ ដែលផ្ដល់សេវាវេជ្ជសាស្ដ្រ និងឧបករណ៍ទំនើបៗ ការអប់រំនិស្សិតវិទ្យាសាស្ដ្រសុខាភិបាល ជាមួយនឹងការបណ្ដុះបណ្ដាលជាប្រព័ន្ធ និងផ្នែកគ្លីនិក។
លោករដ្ឋមន្ត្រី ម៉ម ប៊ុនហេង បានឱ្យដឹងដែរថា «អគារតេជោអភិវឌ្ឍន៍» នេះ អាចផ្តល់សេវាសុខាភិបាលជូនអ្នកជំងឺប្រមាណ ២៥០,០០០នាក់ក្នុងមួយឆ្នាំ។ លើសពីនេះ អគារតេជោអភិវឌ្ឍន៍ នឹងក្លាយជាមជ្ឈមណ្ឌលបណ្តុះបណ្តាលដល់និស្សិតសម្រាប់ធ្វើការសិក្សា និងស្រាវជ្រាវផ្នែកវេជ្ជសាស្ត្រតាមប្រព័ន្ធឌីជីថលដ៏ទំនើបឈានមុខក្នុងប្រទេស ៕
អត្ថបទដោយ៖ ស្រីណុច
