មន្ទីរពេទ្យគួរតែជាកន្លែងដែលអ្នកជំងឺចូលទៅព្យាបាលប្រកបដោយទំនុកចិត្តបំផតនៅពេលត្រូវការជំនួយ ប៉ុន្តែមិនមានគ្រប់មន្ទីរពេទ្យទាំងអស់ទេដែលអាចធ្វើឱ្យអ្នកជំងឺមានទំនុកចិត្តក្នុងការទទួលយកសេវាកម្មព្យាបាល។ ជាក់ស្តែងនៅអាស៊ីយើង គ្រប់គ្នាចាប់អារម្មណ៍ទៅលើសេវាកម្មព្យាបាលរបស់មន្ទីរពេទ្យនៅឯប្រទេសថៃ ថាតើមានមូលហេតុអ្វីទើបមន្ទីរពេទ្យនៅថៃអាចលក់អារម្មណ៍ ធ្វើឱ្យអ្នកជំងឺជាតិនិងអន្តរជាតិទទួលការព្យាបាលបានយ៉ាងមានទំនុកចិត្ត។
តាមរយៈការសម្ភាសជាមួយ លោក ជឿត ចំណាន ដែលជាទីប្រឹក្សាទីផ្សារនៅមន្ទីរពេទ្យល្បីមួយនៅប្រទេសថៃ បានប្រាប់ក្រុមការងារយើងពីមូលហេតុចម្បងមួយដែលមន្ទីរពេទ្យថៃបានអនុវត្តន៏ នោះគឺ ការសិក្សាពីចំណង់ចំណូលចិត្ត តម្រូវការ និងទំនៀមទម្លាប់របស់អ្នកជំងឺមកពីគ្រប់ប្រទេស។
ជាឧទាហរណ៍ មន្ទីរពេទ្យល្បីឈ្មោះមួយដែលលោកធ្លាប់បានបម្រើការ, គេហ្វឹកហាត់បុគ្គលិកឱ្យស្គាល់ពីទំនៀមទម្លាប់និងចំណូលចិត្តរបស់ជនជាតិខ្មែរ ដើម្បីពួកគេអាចទទួលសេវាកម្មបានល្អត្រូវតាមចិត្តរបស់អ្នកជំងឺ ពួកគេជឿថាការធ្វើដូចនេះនឹងធ្វើឱ្យបុគ្គលិកមន្ទីរពេទ្យនិងអ្នកជំងឺមានអារម្មណ៍ថាស្និតស្នាលគ្នានិងមានទំនុកចិត្តក្នុងការព្យាបាល។
ការស្រាវជ្រាវមួយក៏បានបង្ហាញដែរថា អ្នកជំងឺដែលមានផ្លូវចិត្តល្អនឹងឆាប់ជាសះស្បើយពីជមងឺជាងអ្នកជំងឺដែលមានផ្លូវចិត្តទន់ខ្សោយ ការព្យាបាលត្រូវចំណាយពេលយូរ។ នេះគឺជាការលក់អារម្មណ៍របស់មន្ទីរពេទ្យល្បីៗទាំងនោះ ដែលតែងតែទាញពលរដ្ឋខ្មែរទៅព្យាបាលបាន លើសតែពីការធ្វើឱ្យអ្នកជំងឺមានអារម្មណ៍ល្អៗហើយ គុណភាពការព្យាបាលរបស់មន្ទីរពេទ្យទាំងនោះក៏ខ្លាំងដែរ តែអ្វីដែលគួរឱ្យសរសើរគឺ គេពូកែទាំងគុណភាពនិងសេវាកម្ម។
ក្រឡេកមកមើលប្រទេសកម្ពុជាយើងវិញក៏មានពេទ្យមួយចំនួនដែឡយកចិត្តទុកដាក់លើការថែទាំសេវាកម្មអតិថិជនដែរ ប៉ុន្តែជាមួយគ្នានេះក៏មិនមានពេទ្យច្រើនណាស់ណាដែរ ដែលគិតដល់ចំណុចលក់អារម្មណ៍នេះ ពោលគឺរវល់ផ្តោតលើការព្យាបាលជំងឺជាងការមើលថែផ្លូវចិត្តរបស់អ្នកជំងឺ។
បច្ចុប្បន្ននេះគឺជាឱកាសដែលមន្ទីរពេទ្យកម្ពុជាគួរធ្វើរឿងទាំងនេះដើម្បីទាញយកអ្នកជំងឺឱ្យព្យាបាលនៅក្នុងស្រុកវិញ ព្រោះការទៅព្យាបាលនៅប្រទេសក្រៅមានតម្លៃថ្លៃ ហើយថែមទាំងពិបាកចេញចូលដោយសារបញ្ហាកូវីដទៀត បើសិនជាអាចឆ្លៀតឱកាសពង្រឹងការយកចិត្តទុកដាក់លើផ្លួវចិត្តអ្នកជំងឺបន្ថែមនោះ អតិថិជននិងពេញចិត្តក្នុងការចំណាយលុយព្យាបាលនៅក្នុងស្រុកមិនខានឡើយ៕
អត្ថបទដោយ៖ អឿ ស្រីហួយ