បញ្ហាស្ទះឬដាច់សរសៃឈាមមួយភាគធំគឺដោយសារមានការរួមចំណែកនៃការញុំា និងទម្លាប់រស់នៅប្រចាំថ្ងៃរបស់បងប្អូន។នៅពេលការដឹកជញ្ជូនឈាមមានបញ្ហា សារធាតុចិញ្ចឹម ពិសេសអុកស៊ីសែន មិនអាចផ្គត់ផ្គង់គ្រប់គ្រាន់ទៅកាន់សរីរាង្គកាយរបស់បងប្អូនពេញលេញទេជាហេតុនាំឱ្យកើតបញ្ហាសុខភាពផ្សេងៗ។

ហេតុនេះដើម្បីឱ្យឈាមដើរស្រួល មិនមានភាពកកស្ទះបងប្អូនអាចបង្កើនទម្លាប់ញុំាអាហារខាងក្រោមនេះបន្ថែមបាន៖

-ផ្លែទទឹម

ពណ៌ក្រហម នៃផ្លែឈើនេះគឺជាសញ្ញាមួយដែលមានផ្ទុកទៅដោយសារធាតុប្រឆាំងអុកស៊ីតកម្មដូចជាផ្លែប៊ឺរី។ គ្រាប់ផ្លែទទឹមមានផ្ទុកសារធាតុ polyphenols ដែលមានអត្ថប្រយោជន៍ជាច្រើនចំពោះសុខភាព ។ ផ្លែទទឹមតែមួយអាចផ្គត់ផ្គង់ ៤០% នៃតម្រូវការវីតាមីន C ប្រចាំថ្ងៃរបស់អ្នកបាន។ សូមប្រយ័ត្ន ប្រសិនបើអ្នកកំពុងប្រើថ្នាំបញ្ចុះសម្ពាធឈាម ឬកូលេស្តេរ៉ុល ព្រោះវាអាចមានប្រតិកម្មមិនល្អចំពោះផ្លែឈើ។

វាមានអត្ថប្រយោជន៍ផងដែរសម្រាប់ការបញ្ចុះសម្ពាធឈាម ប្រឆាំងនឹងជំងឺមហារីកក្រពេញប្រូស្តាត លក្ខណៈសម្បត្តិប្រឆាំងនឹងការរលាក (ជាពិសេសវាមានប្រយោជន៍សម្រាប់ប្រព័ន្ធរំលាយអាហារ) ។នេះបើតាមការឱ្យដឹងពីmedical-news.org។

-ផ្លែប៊ឺ

សម្បូរដោយជាតិសរសៃនិង មានសារធាតុប្រឆាំងអុកស៊ីតកម្មជាច្រើន ហើយជាពិសេសមានប៉ូតាស្យូមខ្ពស់ ដែលជួយកាត់បន្ថយសម្ពាធឈាម។កាត់បន្ថយជាតិខ្លាញ់ "អាក្រក់" កូលេស្តេរ៉ុលក្នុងឈាមនិងបង្កើនកូលេស្តេរ៉ុល "ល្អ" ដែលជួយសម្អាតការស្ទះសរសៃឈាម។

-ប្រេងអូលីវ

ពិតណាស់ប្រសិនបើបងប្អូនជ្រើសប្រើជាប្រចាំនូប្រេងឬខ្លាញ់ដែលមិនល្អ អាចជះផលមិនល្អឡើយដល់សរសៃឈាម និងសុខភាពទូទៅផ្សេងទៀត។ប៉ុន្តែប្រេងអូលីវត្រូវបានចាត់ទុកជាប្រេងល្អមួយជួយដល់សុខភាពទូទៅច្រើន ហើយងាយលាយជាមួយម្ហូបអាហារផ្សេងៗ។មានប្រេងអូលីវក៏មានផ្ទុកសារធាតុប្រឆាំងអុកស៊ីតកម្មខ្ពស់ និងមានវីតាមីន E និង K បូកនឹងអាស៊ីតខ្លាញ់ល្អ។ ប្រេងអូលីវមានលក្ខណៈសម្បត្តិប្រឆាំងនឹងការរលាក ដែលអាចជួយរក្សាសរសៃឈាមរបស់អ្នកឱ្យរឹងមាំមិនងាយដាច់ឬផ្ទុះ និងដំណើរការល្អ។

-ទឹកក្រូច​ច្របាច់

ទឹកក្រូចគឺជាការបន្ថែមដ៏ងាយស្រួល និងសាមញ្ញដើម្បីធ្វើឱ្យរបបអាហាររបស់អ្នកកាន់តែមានសុខភាពល្អ។ទឹកក្រូចគឺជាប្រភព នៃវីតាមីន C និងផ្តល់នូវសារធាតុចិញ្ចឹម និងសារធាតុប្រឆាំងអុកស៊ីតកម្មជាច្រើនដូចជា ប៉ូតាស្យូម ហ្វូឡាត និងជាតិ thiamine ។ ជាពិសេស សារធាតុប្រឆាំងអុកស៊ីតកម្មនៅក្នុងទឹកក្រូចហៅថា hesperidin គឺជាសមាសធាតុ flavonoid ដែលធ្វើអោយប្រសើរឡើងនូវសុខភាពនៃកោសិកា endothelial ដែលជំនួយដល់សរសៃឈាម ហើយការពារការគាំងបេះដូង និងជំងឺដាច់សរសៃឈាមខួរក្បាលផងដែរ។តែសូមចាំថាបើចង់បានប្រសិទ្ធភាពខ្ពស់គួរកុំបន្ថែមស្ករទៅក្នុងទឹកក្រូច។

-រមៀត

គ្រឿងផ្ទះបាយមួយមុខនេះមិនត្រឹមតែផ្ដល់ពណ៌ស្រស់ស្អាតដល់អាហារទេ រមៀតក៏ដើរតួសំខាន់ក្នុងការសម្រួលចរន្តឈាម កាត់បន្ថយខ្លាញ់មិនល្អក្នុងសរសៃឈាមផងដែរ។ ប្រសិនបើអ្នកមិនមែនជាអ្នកមិនចូលចិត្តសម្លបែបគ្រឿង ឬការី ទេ បងប្អូនអាចញុំាជាម្សៅរមៀតឆុងក្ដៅៗក៏បាន។

-ផ្លែឪឡឹក

 មានផ្ទុកអាស៊ីតអាមីណូមួយហៅថា L-citrulline ។ផ្លែឈើមួយនេះក៏ល្អ សម្រាប់អ្នកដែលចង់សម្រកទម្ងន់។ ជាពិសេសគឺសុខភាពបេះដូង វាជួយបំពេញជាតិទឹកបានល្អនិងសម្រួលដល់ចរន្តឈាមរត់ និងបន្ថយសម្ពាធឈាមផងដែរ។

-គ្រាប់សណ្ដែក

សណ្ដែកជារុក្ខជាតិមួយដែលស្រួលរកនិងមានដាំដុះក្នុងប្រទេសយើង ហើយគ្រាប់ធញ្ញជាតិនេះក៏ដើរតួជួយសុខភាពរាងកាយបានច្រើនដែរ មិនត្រឹមតែជួយមិនឱ្យស្ទះឈាមទេ សណ្ដែកក៏ជួយដល់សុខភាពខួរក្បាលបានល្អ និងជួយទប់ជាតិស្ករបានថែមទៀតផង។សណ្ដែកមានផ្ទុកទៅដោយជាតិសរសៃ ប្រូតេអ៊ីន ផងដែរ។

-ជីរប្រហើរៗនិងគ្រឿងទេសផ្សេង (Spices and herbs)

គ្រឿងទេសឬជីរប្រហើរៗ ជាគ្រឿងថែមតិចៗក្នុងម្ហូបអាហារប្រចាំថ្ងៃរបស់អ្នក ក៏ដើរតួសំខាន់ជួយចរន្តឈាមអ្នកដែរ។ហេតុនេះសូមកុំរំលងប្រសិនបើអាហារអ្នកអាចបន្ថែមនូវគ្រឿងទាំងនេះបាន។

ក្រៅពីការញុំាអាហារដែលល្អដល់សុខភាពបងប្អូនក៏ត្រូវកែសម្រួលទម្លាប់មិនល្អទាំងការញុំាអាហារនិងទម្លាប់ខុសៗផ្សេងទៀតដែរ ដើម្បីទប់ស្កាត់ការឈឺមកក្នុងខ្លួន ដែលរួមមាន កាត់បន្ថយការញុំាប្រៃ ផ្អែម គ្រឿងផ្អាប់ គ្រឿងអាហារកែច្នៃ ស្រា បារី បន្ថែមពីនេះក៏ត្រូវគេងឱ្យបានគ្រប់គ្រាន់ កុំបណ្ដោយឱ្យសម្ពាធផ្លូវចិត្តកើនខ្ពស់ពេក(មានបញ្ហាត្រូវឆាប់រកផ្លូវដោះស្រាយ) ញុំាទឹកឱ្យបានគ្រប់ ទំហំការងារត្រូវមានកម្រិតសមល្មមនឹងកម្លាំងកាយនិងស្មារតីរបស់បងប្អូន ពិសេសប្រសិនបើបង្កើនទម្លាប់ហាត់ប្រាណបែកញើសតិចៗរាល់ថ្ងៃទៀតកាន់តែប្រសើរ។ “យកចិត្តទុកដាក់ថែសុខភាព​ឱ្យបានល្អ ស្របពេលដែលបងប្អូនចង់សម្រេចក្ដីប្រាថ្នាដ៏ធំ មួយសម្រាប់ជីវិត នោះទើបបងប្អូនអាចសម្រេចវាដោយភាពរីករាយ និងមិនមានទុក្ខនៅថ្ងៃមុខ”

អត្ថបទដោយ៖ ភោគ ម៉ារី