យើងសង្កេតឃើញថា ឳពុកម្តាយដែលមានកូនអាយុ ៣ ទៅ ៦ឆ្នាំដែលបានបញ្ចូនកូនទៅសាលារៀនមុនពេល សាលារៀនទាំងអស់ត្រូវបានបិទជាបណ្តោះអាសន្ន ភាគច្រើនបានសម្រេចចិត្តឱ្យកូនឈប់សិក្សាជាបណ្ដោះអាសន្ន ដោយសារកត្តាមួយចំនួនដូចជា ពុំមានពេលវេលានៅជាមួយកូនកំឡុងពេលរៀនអនឡាញ, កត្តាជីវភាព, មិនចង់ឱ្យកូនប្រើប្រាស់អេក្រង់ (Screen time) ច្រើន ដែលជាហេតុធ្វើឱ្យប៉ះពាល់ភ្នែកជាដើម។

បើទោះបីជាឪពុកម្តាយសម្រេចចិត្តឱ្យកូនរៀនតាមអនឡាញ ឬមិនរៀនក៏ដោយ ប៉ុន្ដែការជួយកូននៅផ្ទះពិតជាមានសារៈសំខាន់ណាស់ពិសេសសម្រាប់កុមារតូចដែលមានអាយុក្រោម ៦ឆ្នាំ។

តើឪពុកម្តាយគួរជួយអ្វីខ្លះដល់កូនតូចៗ ដើម្បីឱ្យពួកគេបានរៀន និងរីករាយក្នុងពេលពួកគេនៅផ្ទះអំឡុងពេលបិទខ្ទប់?

ជាការពិត លោកស្រី សែម ចាន់ថុន ដែលជាសហស្ថាបនិក និងនាយិកាសាលារៀនផ្លេបេសត៍លើននីង (Play-based Learning Academy) មានប្រសាសន៍ថា ការបិទខ្ទប់បានធ្វើឱ្យឳពុកម្តាយជាច្រើនមានភាពមមាញឹកយ៉ាងខ្លាំងលើ ការធ្វើការតាមអនឡាញ ការធ្វើការងារផ្ទះ ការបង្រៀន និងថែទាំកូន។ ឪពុកម្តាយគ្រប់រូប អាចចាប់ផ្តើមពីការបែងចែកពេលវេលាធ្វើការអនឡាញរបស់ខ្លួន និងសកម្មភាពនៅផ្ទះដោយ៖

១‑រៀបចំសកម្មភាពតូចៗដែលត្រូវធ្វើស្របនឹងការអភិវឌ្ឍផ្នែកទាំង ៤ របស់កុមារតូច ឱ្យមានលក្ខណៈសប្បាយ និងមានសុវត្ថិភាព។ ការអភិវឌ្ឍទាំង ៤ រួមមានៈ

ក.ការអភិវឌ្ឍរូបរាងកាយ និងសុខភាព

ខ.ការអភិវឌ្ឍសង្គម និងអារម្មណ៍

គ.ការអភិវឌ្ឍភាសា និងការទំនាក់ទំនង

ឃ.ការអភិវឌ្ឍការយល់ដឹង

លោកស្រី សែម ចាន់ថុន៖ អំឡុងកូវីដ កូនមិនបានទៅសាលា ឪពុកម្ដាយត្រូវធ្វើរឿង ៤សំខាន់នេះ

២‑បញ្ចូលសកម្មភាពតូចៗទាំងនោះចូលក្នុងកាលវិភាគប្រចាំថ្ងៃរបស់ខ្លួន និងកូន ហើយអនុវត្តវាឱ្យទៅជាទម្លាប់

ដូចដែលយើងបានដឹងហើយថាកុមារតូចត្រូវ ការរចនាសម្ព័ន្ធ និងដែនកំណត់ ពិសេសក្នុងពេលបិទខ្ទប់ក្នុងអំឡុងពេលកូវីដ-១៩ (Lockdown)។ ការរៀបចំកាលវិភាគ និងធ្វើឱ្យវាក្លាយទៅជាទម្លាប់តាមយៈការធ្វើផែនការប្រចាំថ្ងៃ ឬប្រចាំសប្ដាហ៍ រួមបញ្ចូលគ្នាក៏បាន ហើយឱ្យអនុញ្ញាតឱ្យកុមារតូច បញ្ចូលផែនការរបស់ខ្លួនផងដែរដូចជា ពេលរៀន ពេលញុំា ពេលសម្រាក ពេលជួយការងារផ្ទះ និងពេលលេងជាដើម។ នេះជាគំរូកាលវិភាគ មួយក្នុងចំណោមកាលវិភាគដ៏ល្អជាច្រើន សម្រាប់ឪពុកម្តាយ ឬអ្នកថែ ទាំប្រើប្រាស់សម្រាប់រៀបចំផែនការសកម្មភាពក្នុងកាលវិភាគរបស់ខ្លួន។ កាលវិភាគដែលល្អ គឺជាបញ្ចូលគ្នារវាងគំនិតឳពុកម្តាយ និងកូន និងតាមស្ថានភាពជាក់ស្តែងរបស់គ្រួសារនីមួយៗ។ ភាពបត់បែន និងកែតម្រូវ ពិតជាមាន នៅពេលអនុវត្តផ្ទាល់ មានតែឪពុកម្តាយ និងកូនៗទេទើបដឹងថា តើសកម្មភាពអ្វីដែលល្អបំផុតក្នុងការអនុវត្ត។ កុមារដែលមានផែនការសកម្មភាពប្រចាំថ្ងៃនឹងក្លាយជាកុមារដែលត្រៀមលក្ខណៈសម្រាប់ចូលរៀន នៅសាលា ងាយសម្របសម្រួល ចូលរួមសកម្មភាពសិក្សាបានល្អ មានការផ្តោតអារម្មណ៍ បានល្អ មានទំនួលខុសត្រូវ មានឯករាជ្យភាព និងមានអាកប្បកិរិយាវិជ្ជមាន។

ជាចុងក្រោយ, លោកស្រី សែម ចាន់ថុន ក៏បានផ្ញើសារជូនឪពុកម្តាយដែលមានកូនតូចទាំងអស់ថា ២០០០ថ្ងៃដំបូងក្នុងជីវិតកុមារគឺពិតជាមានសារៈសំខាន់ណាស់សម្រាប់ពួកគេ ជាពិសេសលើការអភិវឌ្ឍកោសិកាប្រាសាទ (កោសិកាខួរក្បាល) របស់កុមាររហូតដល់ ៩០% លើគ្រប់វ័យរបស់មនុស្ស។ បរិយាកាស និងបទពិសោធន៍វិជ្ជមាន ដែលកុមារតូចជួបប្រទះ នឹងធ្វើឱ្យគេក្លាយជាមនុស្សពេញវ័យ ដែលមានភាពរីករាយ មានសុខភាពល្អ ទាំងផ្លូវកាយ និងផ្លូវចិត្ត មានភាពឆ្លាតវៃ មានទំនុកចិត្តលើខ្លួនឯង មានការតស៊ូ និងមានឯករាជ្យភាព។

សូមប្រែក្លាយឱកាសបិទខ្ទប់ អំឡុងពេលកូវីដ-១៩ (Lockdown) នេះទៅជា ពេលវេលាមាស ពេលវេលាប្រាក់សម្រាប់បង្កើត និងបង្កើនទំនាក់ទំនងល្អៗ និងជួយកុមារឱ្យអភិអឌ្ឍបានល្អ ដើម្បីត្រៀមលក្ខណៈសម្រាប់ថ្ងៃអនាគតដ៏ត្រចះត្រចង់របស់ពួកគេ។

អត្ថបទដោយ៖ម៉ាង វិសិដ្ឋារតន៍