ព័ត៌មាន
ចាប់ផ្តើមចាក់ហើយ! វ៉ាក់ស៊ាំង១ប្រភេទនេះត្រូវបានអនុញ្ញាតឱ្យប្រើដើម្បីប្រឆាំងអូមីក្រុង
January 27,2022
យោងតាមការចុះផ្សាយរបស់សារព័ត៌មាន channelnewsasia បានស្តែងឱ្យដឹងថា ក្រុមហ៊ុនវ៉ាក់ស៊ាំងអាមេរិក Moderna បានប្រកាសកាលពីថ្ងៃពុធ ទី២៦ ខែមករា ម្សិលមិញនេះថា ខ្លួនបានចាប់ផ្តើមការសាកល្បងចាក់វ៉ាក់ស៊ាំង ដើម្បីពង្រឹងប្រព័ន្ធភាពស៊ាំប្រយុទ្ធប្រឆាំងនឹងវីរុសរាតត្បាតអូមីក្រុង។ ការសាកល្បងនេះ ត្រូវបានចូលរួមដោយមនុស្សពេញវ័យចំនួន ៦០០នាក់ ដែលពាក់កណ្តាលនៃក្រុមបុគ្គលទាំងនេះ ធ្លាប់ទទួលបានវ៉ាក់ស៊ាំងបង្ការប្រភេទ Moderna ចំនួន ២ដូសរួចកាលពីមុនមក។ក្រុមហ៊ុនវ៉ាក់ស៊ាំង Moderna បានរាយការណ៍ពីលទ្ធផលនៃប្រសិទ្ធភាពប្រឆាំងនឹងអូមីក្រុង ដែលត្រូវបានអនុញ្ញាតឱ្យប្រើសម្រាប់ដូសជំរុញ ដោយសង្កេតឃើញថា ក្នុងរយៈពេល៦ ខែបន្ទាប់ពីការចាក់វ៉ាក់ស៊ាំងប្រភេទនេះជាដូសជំរុញអង្គបដិប្រាណប្រឆាំងនឹងអូមីក្រុង អាចការពារកម្រិតឆ្លងនៃវីរុសបានចំនួន ៦ដង ក្រោយពីចាក់បានត្រឹមរយៈពេល ២៩ថ្ងៃ។ចំពោះទិន្នន័យដែលបានរៀបរាប់ទាំងនេះ គឺទទួលបានពីការសិក្សាទៅលើឈាមរបស់មនុស្សចំនួន ២០ នាក់ដែលបានទទួលវ៉ាក់ស៊ាំង Moderna ក្នុងបរិមាណ ៥០មីក្រូក្រាម ជាដូសជំរុញ ដោយនេះជា ចំនួនពាក់កណ្តាលវ៉ាក់ស៊ាំងដែលបានចាក់នៅក្នុងដូសទី១ និង ទី២។នាយកប្រតិបត្តិក្រុមហ៊ុន Moderna លោក Stephane Bancel បាននិយាយនៅក្នុងសេចក្តីថ្លែងការណ៍ថា "យើងត្រូវបានធានាឡើងវិញដោយភាពស្ថិតស្ថេរនៃអង្គបដិប្រាណប្រឆាំងនឹងអូមីក្រុង ក្នុងរយៈពេល៦ខែបន្ទាប់ពីការចាក់ដូសជំរុញ ខណៈពេលបច្ចុប្បន្នវ៉ាក់ស៊ាំងត្រូវបានអនុញ្ញាតឱ្យចាក់សាកល្បង" ។គូសបន្ថែមផងដែរថា នាសព្វថ្ងៃនេះមានប្រទេសច្រើនណាស់ កំពុងតែខិតខំខ្នះខ្នែងក្នុងការពន្លឿនការចាក់វ៉ាក់ស៊ាំងដូសជំរុញជូនប្រជាជន ដើម្បីពង្រឹងប្រព័ន្ធស៊ាំបន្ថែមទប់ទល់នឹងវីរុសអូមីក្រុង។ អាស្រ័យហេតុនេះ ហើយ ជាសារដាស់តឿន សូមបងប្អូនដែលបានចាក់វ៉ាក់ស៊ាំងពេញលេញបានគ្រប់៦ខែ មេត្តាអញ្ជើញទៅចាក់ដូសជំរុញបន្ថែម ក្នុងទិសដៅជួយទប់ស្កាត់ និងបញ្ចៀសនូវបញ្ហារាតត្បាតវីរុសអូមីក្រុងកាន់តែធំក្នុងសហគមន៍៕
កុំបណ្តោយឱ្យខ្លួនឯងឆ្លងអូមីក្រុងមិនដឹងខ្លួន បើលេចរោគសញ្ញា១នេះពេលយប់ ឆាប់ធ្វើតេស្តភ្លាម
January 27,2022
វីរុសបំប្លែងខ្លួនអូមីក្រុងកំពុងបន្តធ្វើឱ្យករណីឆ្លងនៅតាមប្រទេសជុំវិញពិភពលោកកើនឡើងជាបន្តបន្ទាប់។ ទោះបីជាស្ថានភាពនៃការឆ្លងមិនសូវធ្ងន់ធ្ងរដូចវីរុសដែលតាមែនពិត តែវីរុសមួយនេះនៅតែមានលទ្ធភាពអាចធ្វើឱ្យអ្នកស្លាប់បានដដែល។ ដោយសារតែវាជាវីរុសបំប្លែងខ្លួនថ្មី រោគសញ្ញារបស់វីរុសអូមីក្រុងនេះក៏ថ្មីខុសប្លែកពីវីរុសមុនៗផងដែរ។កន្លងមក វេជ្ជបណ្ឌិតណែនាំថាប្រសិនបើមានបញ្ហាក្អកស្ងួតន ក្តៅខ្លួន បាត់បង់ក្លិននិងរសជាតិត្រូវប្រញាប់ទៅធ្វើតេស្តជាបន្ទាន់។ ដោយឡែក បើឆ្លងអូមីក្រុងគឺមានលក្ខណៈខុសប្លែកជាងនេះ គឺរោគសញ្ញាចម្លែកមួយដែលត្រូវបានផ្សារភ្ជាប់ទៅនឹងការឆ្លងអូមីក្រុងគឺជាការបែកញើសពេលយប់ នេះបើយោងតាមអ្នកឆ្លើយឆ្លងព័ត៌មានវេជ្ជសាស្ត្រជាន់ខ្ពស់របស់ NBC News លោកវេជ្ជបណ្ឌិត John Torres រាយការណ៍ពី Express ។ការបែកញើសពេលយប់ត្រូវបានផ្សារភ្ជាប់ថាជារោគសញ្ញាដំបូងដែលឆ្លងវីរុសអូមីក្រុង ដោយការសិក្សាពី វេជ្ជបណ្ឌិត Unben Pillay នៅឯសន្និសីទសង្ខេបមួយដោយនាយកដ្ឋានសុខភាពអាហ្វ្រិកខាងត្បូងកាលពីដើមខែធ្នូ ឆ្នាំ២០២១កន្លងមក។ ការបែកញើសពេលយប់អាចធ្វើឲ្យមនុស្សម្នាក់បែកញើសច្រើនពេញមួយយប់អាចធ្វើឲ្យគ្រែនិងសម្លៀកបំពាក់របស់ពួកគេសើមបាន សូម្បីតែពេលគេងក្នុងបរិយាកាសត្រជាក់ក៏ដោយ។ អ្នកជំងឺដែលឆ្លងអូមីក្រុងកន្លងមកជាច្រើននាក់ក៏បានរាយការណ៍ថាពួកគេមានរោគសញ្ញានេះដែរ៕
កុំមើលងាយឱ្យសោះ! មុននេះបន្តិចថៃរកឃើញអ្នកឆ្លងអូមីក្រុងថ្មី “BA2” ស្លាប់បាត់បង់ជីវិត
January 27,2022
ផ្ទុះការភ្ញាក់ផ្អើរបន្ទាប់ពីមនុស្សចាច្រើននិយាយថា អូមីក្រុង ជាវីរុសស្រាល ថ្មីៗនេះអូមីក្រុងបានបំប្លែងខ្លួនចេញជាវីរុសថ្មីមួយប្រភេទឈ្មោះថា BA.2 ហើយបានរកឃើញនៅក្នុងប្រទេសថៃដែលមានភូមិផងរបងជាមួយនឹងប្រទេសកម្ពុជាយើងផងដែរ។ អ្វីដែលគួរឱ្យបារម្ភនោះគឺក្នុងចំណោមអ្នកឆ្លងវីរុសអូមីក្រុងពូជថ្មី BA.2 ចាប់ផ្តើមមានអ្នកស្លាប់បាត់បង់ជីវិតហើយ។យោងតាមការឱ្យដឹងរបស់ The Straits Times មុននេះបន្តិចគេរកឃើញថា ក្នុងចំណោមអ្នកជំងឺកូវីដ១៩ ចំនួន ១៤នាក់ដែលអាជ្ញាធរសុខាភិបាលថៃបានប្រកាសថាបានឆ្លងមេរោគអូមីក្រុងក្លាយពូជប្រភេទ BA.2 ពេលនេះមានអ្នកជំងឺម្នាក់បានស្លាប់បាត់បង់ជីវិតហើយនៅក្នុងថ្ងៃព្រហស្បតិ៍ ទី ២៧ ខែមករានេះ។បើតាមលោកវេជ្ជបណ្ឌិត Supphakit Siriluck ដែលជាប្រធាននាយកដ្ឋានវិទ្យាសាស្រ្តវេជ្ជសាស្រ្តថៃបានឲ្យដឹងពីការវិវឌ្ឍន៍នៃមេរោគអូមីក្រុងក្លាយពូជឬអាចហៅថាអូមីក្រុងជំនាន់ថ្មីនេះថា មេរោគប្រភេទនេះត្រូវបានរកឃើញដំបូងនៅក្នុងប្រទេសថៃកាលពីថ្ងៃទី ៦ ខែធ្នូឆ្នាំមុនម្លេះ ដោយពេលនោះមេរោគស្ថិតនៅទម្រង់ BA.1 ប៉ុណ្ណោះ។ក្រោយមកនៅក្នុងថ្ងៃទី២ ខែមករា ឆ្នាំ២០២២ អ្នកជំនាញថៃបានរកឃើញមេរោគប្រភេទក្លាយពូជនេះម្តងទៀត ហើយវាបានបំប្លែងខ្លួនបន្តទៅជា វីរុសBA.2 ហើយរហូតមកទល់ពេលនេះវាបានបំប្លែងបន្តទៀតទៅជាទម្រង់ វីរុសBA.3 ទៀតផង។ ជាមេរៀនគួរសិក្សាស្វែងយល់ គឺយើងមិនគួរមើលស្រាលវីរុសអូមីក្រុងថាវាជាវីរុសស្រាលឡើយ ខណៈពេលដែលវាកំពុងតែបំប្លែងខ្លួនឥតឈប់ឈរដើម្បីគេចពីភាពស៊ាំដែលវ៉ាក់ស៊ាំងកំពុងមាន កំពុងការពារជីវិតយើង៕
ចិនប្រើយុទ្ធសាស្ត្រ Zero-Covid ធ្វើឱ្យគ្មានចំនួនអ្នកស្លាប់ដោយសារកូវីដពេញ១ឆ្នាំ
January 27,2022
ដូចដែលបងប្អូនបានដឹងរួចមកហើយថា ចិន គឺជាប្រទេសដែលបានផ្ទុះនូវវីរុសកូវីដ១៩មុនគេបង្អស់នៅទូទាំងពិភពលោក ហើយក្រោយមកករណីឆ្លងនៅក្នុងប្រទេសនេះក៏ត្រូវបានស្ងប់ស្ងាត់ទៅវិញ ដែលមានរបាយការណ៍បង្ហាញពីទិន្នន័យឆ្លងថ្មីទាបបំផុត។ ជាមួយគ្នានេះផងដែរ គិតត្រឹមរយៈពេល១ឆ្នាំចុងក្រោយនេះ ប្រទេសចិនមិនបានរាយការណ៍ថា មានអ្នកស្លាប់ដោយសារកូវីដ១៩ឡើយ។តួយ៉ាង បើយោងទៅតាមការចុះផ្សាយរបស់គេហទំព័រ forbes បានលើកឡើងឱ្យដឹងដែរថា មូលហេតុដែលប្រទេសចិនអាចគ្រប់គ្រងនូវការរាតត្បាតយ៉ាងគំហុកនៅប្រទេសឱ្យត្រលប់មកសភាពស្ងប់ស្ងាត់បែបនេះ គឺដោយសារតែប្រទេសចិនប្រកាន់យកយុទ្ធសាស្រ្ត « Zero-Covid»។ទន្ទឹមនឹងយុទ្ធសាស្ត្រ « Zero-Covid» នេះផងដែរ គឺការអនុវត្តតាមគោលការណ៍ក្នុងការលុបបំបាត់ទាំងស្រុងនូវការចម្លងមេរោគនៅខាងក្នុងប្រទេសតែម្តង ដោយមិនមែនឱ្យប្រជាពលរដ្ឋរៀនរស់នៅជាមួយនឹងប្រភេទវីរុសនេះឡើយ។ ហើយចំពោះសមកម្មភាពនៃយុទ្ធសាស្ត្រ (Zero-Covid)មានដូចជា៖១. បិទខ្ទប់នៅតំបន់ដែលរកឃើញករណីឆ្លង និងធ្វើតេស្តគ្រប់អ្នកពាក់ព័ន្ធទាំងអស់២. ជើងហោះហើរអន្តរជាតិទៅកាន់ប្រទេសចិនត្រូវបានរឹតបន្តឹងយ៉ាងខ្លាំង ហើយអ្នកដំណើរដែលចូលមកគឺតម្រូវឱ្យឆ្លងកាត់ការធ្វើតេស្ត PCR និងដាក់ឱ្យនៅដាច់ពីគេនៅក្នុងសណ្ឋាគារ ឬកន្លែងដែលបានកំណត់ រហូតទាល់តែទទួលបានលទ្ធផលអវិជ្ជមាន។៣. តាមដានក្រុមបុគ្គលដែលត្រូវបានយកទៅដាក់នៅដាច់ដោយឡែក និងសង្ស័យថាមានជាប់ពាក់ព័ន្ធជាមួយនឹងអ្នកជំងឺកូវីដ១៩ក្នុងរយៈពេល ១៤ថ្ងៃ និងតម្រូវឱ្យធ្វើតេស្ត PCR ជាច្រើនជុំ។៤. ធ្វើតេស្តជាប្រចាំ ដោយនៅក្នុងប្រទេសចិន ការធ្វើតេស្ត PCR ជាប្រចាំត្រូវបានអនុវត្តលើអ្នកជំងឺទាំងអស់ដែលមានគ្រុនក្តៅ ឬរោគសញ្ញាផ្លូវដង្ហើម ក៏ដូចជាបុគ្គលិកពេទ្យ និងកម្មករដែលគ្រប់គ្រងទំនិញនាំចេញនាំចូល។ ៥. ការចុះត្រួតពិនិត្យក្នុងសហគមន៍ ដោយនៅក្នុងប្រទេសចិន ការធ្វើតេស្ត PCR ទូទាំងសហគមន៍ត្រូវបានអនុវត្តតាំងកំឡុងពេលផ្ទុះឡើងខ្លាំងនៃវីរុស ដើម្បីកំណត់អត្តសញ្ញាណអ្នកឆ្លង រួមទាំងអ្នកដែលមិនមានរោគសញ្ញា។ ការត្រួតពិនិត្យទូទាំងសហគមន៍ គឺអាជ្ញាធរមានបំណងដាក់ឱ្យប្រជាជនរស់នៅដាច់ដោយឡែកពីអ្នកឆ្លងមេរោគយ៉ាងឆាប់រហ័ស និងដើម្បីអនុញ្ញាតឱ្យមានសកម្មភាពសេដ្ឋកិច្ចធម្មតាឡើងវិញបានលឿនជាងមុន។គូសបន្ថែមផងដែរថា ប្រទេសចិន គឺជាប្រទេសមួយដែលមានប្រជាជនទទួលបានវ៉ាក់ពេញលេញ ប្រមាណជាង ៨៤,៧៨% ឯណោះ ហើយចំពោះវិធានការដែលក្រសួងសុខាភិបាលបានដាក់ទៀតសោតនោះ ប្រជាជនចិនក៏បានអនុវត្តន៍បានយ៉ាងល្អ និងខ្ជាប់ខ្ជួនផងដែរ៕
តៃវ៉ាន់បិទអគារខ្នាតយក្សរបស់ខ្លួន ដោយសារមូលហេតុនេះ
January 27,2022
យោងតាមប្រភពចេញផ្សាយដោយ taiwannews ចុះនាថ្ងៃទី ២៦ ខែមករា ឆ្នាំ២០២២ បានបង្ហាញថា សំណង់អគារខ្នាតយក្សឈ្មោះ ១០១ ក្នុងទីក្រុងតៃប៉ិ នៅកោះតៃវ៉ាន់ ត្រូវអាជ្ញាធរចុះបិទភ្លាមៗក្រោយពីរកឃើញមានករណីជាប់ពាក់ព័ន្ធទៅនឹងអ្នកជំងឺកូវីដ១៩។ ប្រភពដដែលបានបន្ថែមថា សំណង់អគារ ១០១ ដែលមានកម្ពស់ ៥០៨ ម៉ែត្រ ត្រូវបានបិទនៅថ្ងៃពុធ ទី២៦ ម្សិលមិញនេះ បន្ទាប់ពីមានសេចក្តីរាយការណ៍ថាមានអ្នកជំងឺកូវីដ បានទៅលេងហាងលក់ទំនិញដ៏ល្បី Louis Vuitton។សារព័ត៌មាន CNA បានរាយការណ៍ថា នៅថ្ងៃទី 21 ខែមករា ក្រុមហ៊ុន Louis Vuitton បានបើកសម្ពោធហាងរបស់ខ្លួន ដែលមានតារាល្បីចំនួន៩ រូប រួមទាំងតារាសម្តែង Chen Bolin (陳柏霖) អ្នកលេងវីយូឡុង Richard Lee (李齊) និងម្ចាស់មេដាយប្រាក់កីឡាកាយសម្ព័ន្ធអូឡាំពិក Lee Chih-kai (李智凱) បានចូលរួមក្នុងព្រឹត្តិការណ៍នេះ។រដ្ឋាភិបាលទីក្រុងតៃប៉ិ ក្រោយមកបានលាតត្រដាងថា បុរសដែលឆ្លងមេរោគនេះបានទៅលេងផ្សារទំនើប ហាងលក់ទំនិញ និងភោជនីយដ្ឋានជាច្រើននៅក្នុងតំបន់ផ្សេងៗគ្នានៃរដ្ឋធានី ចាប់ពីតំបន់ Xinyi រហូតដល់ស្រុក Wanhuaផងដែរ ។ អត្ថបទដោយ៖ ប៉ាវ ភក្តី
ប្រយ័ត្នមានគ្រោះថ្នាក់! លោកជំទាវឱ វណ្ណឌីន ហាមមនុស្ស២ក្រុមនេះលេបថ្នាំព្យាបាលកូវីដ១៩ដាច់ខាត
January 27,2022
លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួង សុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្របខណ្ឌទូទាំងប្រទេស មិនអនុញ្ញាតឱ្យ ស្រ្តីមានផ្ទៃពោះ និងស្រ្តីបំបៅកូនដោយទឹកដោះ ដែលមានវិជ្ជមានកូវីដ១៩ ប្រើប្រាស់ឱសថប្រភេទ«ម៉ូលណាទ្រីស» ឬ ម៉ូលនូពីរ៉ាវា (Molnupiravir) ឡើយខណៈដែលមកដល់ពេលនេះ មិន ទាន់មានការបញ្ជាក់ត្រឹមត្រូវ ក្នុងការអនុញ្ញាតឱ្យប្រើប្រាស់សម្រាប់ស្រ្តី មានផ្ទៃពោះ និងស្រ្តីបំបៅកូនដោយទឹកដោះនៅឡើយទេ។ នេះបើយោងតាមការដកស្រង់ពីក្រសួងព័ត៌មាន នៅថ្ងៃទី២៦ ខែមករា ឆ្នាំ២០២២។លោកជំទាវ បន្ថែមថា ការប្រើប្រាស់ឱសថនេះ គឺសម្រាប់អ្នកមានតេស្តវិជ្ជមានវីរុសកូវីដ១៩ និងជាពិសេសគួរប្រើចំពោះបុគ្គល ដែលមានហានិភ័យក្នុងការវិវឌ្ឍទៅជាជំងឺធ្ងន់ធ្ងរ។ លោកជំទាវបន្តថា ចំពោះស្ត្រីមានផ្ទៃពោះ និងស្រ្តីបំបៅកូនដោយទឹកដោះ ទោះ បីជាមិនមានទិន្នន័យពីការប្រើឱសថនេះ លើស្ត្រីមាន ផ្ទៃពោះក៏ដោយ ប៉ុន្តែការ សិក្សាលើសត្វបានបង្ហាញពីការពុលលើភាពបង្កកំណើត។ដូច្នេះឱសថ ម៉ូលនូពីរ៉ាវា មិនត្រូវបានណែ នាំឱ្យប្រើក្នុងអំឡុងពេលមានផ្ទៃពោះទេ និងក្នុងពេលបំបៅកូនដោយដោះនោះទេ។ដូចហេតុនេះ លោកជំទាវ អំពាវ នាវដល់ស្រ្តីមានផ្ទៃពោះ និងស្រ្តីបំបៅកូនដោយទឹកដោះ ដែលមានវិជ្ជមានកូវីដ១៩ មិនត្រូវប្រើប្រាស់ឱសថប្រភេទ«ម៉ូលណាទ្រីស» ឬ ម៉ូលនូពីរ៉ាវា ដើម្បីជៀសវាងនូវគ្រោះថ្នាក់ណាមួយកើតឡើងជាយថា ហេតុ។លោកជំទាវបញ្ជាក់ថា សម្រាប់អ្នកដែលមានវិជ្ជមានកូវីដ១៩ មុននឹងមានការប្រើ ប្រាស់នូវឱសថនេះ គឺត្រូវមាន ការពិគ្រោះយោបល់ពីក្រុមគ្រូ ពេទ្យជាមុនសិន ដើម្បីឱ្យក្រុមគ្រូពេទ្យធ្វើការពិនិត្យវាយតម្លៃ ពីស្ថានភាពសុខភាព មុននឹងមានការសម្រេចឱ្យប្រើប្រាស់នូវពពួកឱសថ ម៉ូលនូពីរ៉ាវា នេះ។គួរជម្រាបថា បើតាមការឱ្យដឹងរបស់ក្រុមការងារចំពោះកិច្ចគ្រប់គ្រង បែងចែក និងផ្គត់ផ្គង់ឱសថយុទ្ធសាស្ត្រសម្រាប់ប្រយុទ្ធនឹងជំងឺកូវីដ ១៩ បានឱ្យដឹងថា ឱសថព្យាបាលជំងឺកូវីដ-១៩ «ម៉ូលណាទ្រីស» ឬម៉ូលនូពីរ៉ាវា នេះសម្រាប់ព្យាបាលជំងឺកូវីដ- ១៩ ចាប់ពីកម្រិតស្រាលទៅមធ្យម ចំពោះមនុស្សពេញវ័យ ។ឱសថនេះ ត្រូវលេប១ថ្ងៃ២ ដង ម្ដង៤គ្រាប់ ក្រោយពេលទទួលទានអាហាររួច ឬពេលពោះទទេ និងគួរលេបទាំង មូលជាមួយទឹកមួយកែវ ដោយមិនត្រូវបើកគ្រាប់ កិន បំបែក ឬទំពារឡើយ។ បើយោងតាមទិន្នន័យតាម ដានសិក្សាបង្ហាញថា ឱសថនេះអាចបណ្តាលឱ្យមានផលរំខានតិចតួច ដូចជា រាគ ចង្អោ រ ក្អួត ធីងធោង ឈឺក្បាល និងអាចមានកន្ទួលលើស្បែក កន្ទាលត្រអាកជាដើម ។ ឱសថនេះ មានអាយុកាលប្រើប្រាស់ ២៤ ខែ បន្ទាប់ពីកាលបរិច្ឆេទផលិត ដូចនេះត្រូវពិនិត្យមើលថ្ងៃខែឆ្នាំផលិត និងផុតកំណត់ឱ្យបានច្បាស់មុនពេលប្រើប្រាស់៕
