វីតាមីនA ជាប្រភេទវីតាមីនរលាយក្នុងខ្លាញ់ ដែលមាននៅក្នុងរបបអាហារជាច្រើនដែលអ្នកទទួលទានរាល់ថ្ងៃ។ វីតាមីនA បានដើរតួនាទីយ៉ាងសំខាន់ក្នុងប្រព័ន្ធភាពស៊ាំការពាររាងកាយ មុខងារផ្សេងៗឱ្យមានសុខភាពល្អ ក៏ដូចជាការបន្តពូជផងដែរ។ រាងកាយក៏ត្រូវការវីតាមីនA ជាចាំបាច់ ដើម្បីជួយដល់មុខងារនៃ សួត បេះដូង និងតម្រងនោម ដំណើរការឱ្យបានល្អ។

ផ្អែកតាមការចែករំលែករបស់អ្នកជំនាញចំណីអាហារ អ្នកស្រី Lindsey DeSoto ឱ្យដឹងនៅក្នុងប្រភព Verywellhealth ដែរថា កង្វះវីតាមីនA បើចំពោះកុមារ ប្រឈមហានិភ័យក្រិន ពន្យារការលូតលាស់ ភាពស៊ាំចុះខ្សោយ សមត្ថភាពការមើលថយចុះ(សុខភាពភ្នែក) ជាដើម។ តាមការសិក្សាបាន ឱ្យដឹងផងដែរ ការទទួលទានវីតាមីនA មិនគ្រាប់គ្រាន់ វាបានផ្សារភ្ជាប់គ្នាជំងឺស្ទះសួត ជំងឺផ្លូវដង្ហើម និងជំងឺហឺតជាដើម។ មិនតែប៉ុណ្ណោះកង្វះ វីតាមីនA ក៏ជាមូលហេតុមួយដែលធ្វើឱ្យស្ត្រីពិបាកក្នុងការមានកូន ក៏ដូចជារលូតកូនផងដែរ។

ចំពោះរោគសញ្ញានៃការខ្វះវីតាមីនA មានដូចជា ខ្សោយៗ អស់កម្លាំង ភាពស៊ាំចុះខ្សោយ ងាយឆ្លងជំងឺ ស្បែកនិងសក់ស្ងួត ភ្នែកស្ងួត មើលឃើញមិនសូវច្បាស់ជាដើម។ បញ្ហានេះច្រើនកើតឡើងជាមួយមនុស្សដែលរស់នៅប្រទេសកំពុងអភិវឌ្ឍ មិនបានយល់ដឹងនិងទទួលបានរបបអាហារដែលសារធាតុចិញ្ចឹមគ្រប់គ្រាន់។ គេអាចព្យាបាលបានដោយការធ្វើរោគវិនិច្ឆ័យច្បាស់លាស់ជាមួយគ្រូពេទ្យ និងលេបថ្នាំឬវីតាមីនបន្ថែមតាមវេជ្ជបញ្ជា។ ចៀសវាងការលេបឬទិញថ្នាំ និងវីតាមីនដោយខ្លួនឯង ដោយមិនបានធ្វើរោគវិនិច្ឆ័យច្បាស់លាស់ ព្រោះវីតាមីនA អាចមានប្រតិកម្មមួយនឹងថ្នាំមួយចំនួន លេបខុសអាចគ្រោះថ្នាក់ដល់សុខភាព។

ក្រៅពីនោះ អ្នកក៏អាចបន្ថែមវីតាមីនA ពីធម្មជាតិតាមរយៈការទទួលទានអាហារដែលមានសារធាតុចិញ្ចឹមគ្រប់គ្រាន់ ពិសេសមាននៅក្នុងក្រុមបន្លែផ្លែឈើដែលមានពណ៌ទឹកក្រូច លឿង ក្រហម បៃតង ដូចជាស្ពៃបៃតង ម្ទេសប្លោក ការរ៉ុត ដំឡូងផ្អែមឬដំឡូងឈ្វា ប៉េងប៉ោះ ថ្លើមគោ សាច់សរីរាង្គ ស៊ុត ទឹកដោះគោ ផ្លែស្វាត ក៏ដូចជាផ្លែឈើមួយចំនួនទៀតផងដែរ៕

 អត្ថបទដោយ៖ Senghong