ឪពុកម្ដាយតែងពិបាកក្នុងការចិញ្ចឹមកូន និងមានការខ្វល់ខ្វាយច្រើន ពេលខ្លះគេងមិនលក់ព្រោះខ្វល់ខ្វាយរឿងកូនៗ។ ប៉ុន្តែនេះក៏មកពីឪពុកម្ដាយមានការខ្វះចន្លោះប្រហោងក្នុងការចិញ្ចឹមកូន និងអប់រំកូន។
ជាការពិតណាស់នៅក្នុងការចិញ្ចឹមកូនជាក់ស្ដែងគឺមានការពិបាកណាស់ មិនមែនងាយស្រួលនោះទេ ដូច្នេះហើយឪពុកម្ដាយត្រូវមានការដឹងពីវិធីសាស្ត្រក្នុងការមើលថែកូន និងអប់រំកូនប្រកបដោយភាពវៃឆ្លាត និងពូកែ ហើយវិធីសាស្ដ្រ ៦ក្បាច់នេះ ដែលអ្នកត្រូវដឹងនោះរួមមាន៖
១.ផ្ដល់ពេលវេលាសម្រាប់កូនអ្នក៖ជាការពិតណាស់ពេលវេលាជាផ្នែកមួយដ៏មានសារៈសំខាន់ក្នុងការបង្កើននៅភាពស្និតស្នាលជាមួយកូនៗ ដូច្នេះនៅពេលព្រលឹមឡើងក្នុងនាមអ្នកជាឪពុកម្ដាយ អ្នកត្រូវតែចំណាយពេលវេលាដើម្បីញុំាអាហាពេលព្រឹកជាមួយកូនៗ និងក្រុមគ្រួសារជាប្រចាំ ឬពេលផ្សេងៗទៀត។ ព្រោះថានេះគឺជាចំណុចសំខាន់មួយនៃការផ្ដល់នៅភាពកក្ដៅដែលកូនៗក្នុងការលើកទឹកចិត្តពួកគេ។
២.ឪពុកម្ដាយធ្វើជាគំរូល្អសម្រាប់កូនៗ៖ក្មេងៗគឺតែងរៀនសូត្របានច្រើនពីរបៀបធ្វើសកម្មភាព ដោយការសង្កេតមើលលើឪពុកម្តាយរបស់ពួកគេ ។ ក្មេងតូចៗគឺជាវ័យមួយដែលពួកគេយកចិត្តទុកដាក់ និងសង្កេតពីសកម្មភាពរបស់អ្នក និងយកគំរូតាម។ ត្រូវចាំថាអ្នកគឺជាគំរូសម្រាប់កូនរបស់អ្នកៗ ដូច្នេះអ្នកទាំងអស់គ្នាត្រូវធ្វើទម្លាប់ល្អៗឱ្យបានច្រើន ប៉ុន្តែកុំភ្លេចពាក្យសម្ដីណាដែលអ្នកគួរនិយាយដាក់កូន។
៣.ផ្ដល់ស្រឡាញ់ដល់កូនៗ ហើយបង្ហាញពួកគេតាមរយៈសកម្មភាព៖ការស្រឡាញ់កូនរបស់អ្នកអាចមានលក្ខណៈសាមញ្ញដូចជា ការឱបពួកគេ ចំណាយពេលជាមួយពួកគេ និងស្តាប់បញ្ហារបស់ពួកគេជារៀងរាល់ថ្ងៃ។ ដែលទាំងនេះហើយគឺបង្ហាញពីសកម្មភាពរបស់អ្នកទៅកាន់ពួកគេ។
៤.បង្កើតកម្លាំងចិត្តសម្រាប់កូនអ្នក៖ឪពុកម្ដាយមានតួនាទីមួយគឺជាអ្នកគាំទ្រកូន និងផ្ដល់កម្លាំងចិត្តឱ្យកូន។ កូនមានភាពឆ្លាតវ័យក៏ពាក់ព័ន្ធនឹងកម្លាំងចិត្តដែរ ពីព្រោះថានៅពេលដែលកូនរបស់អ្នកធ្វើអ្វីមួយ មានអ្នកនៅពីក្រោយខ្នងចាំលើកទឹក និងផ្ដល់នូវកម្លាំងចិត្ត ដែលធ្វើឱ្យកូនរបស់អ្នកមានភាពតស៊ូ និងព្យាយាមធ្វើកិច្ចការរបស់ខ្លួន។
៥.ប្រាស្រ័យទាក់ទងជាមួយកូនៗរបស់អ្នក៖ជាទូទៅឪពុកម្ដាយមិនសូវស្ដាប់កូនទេ ដែលនេះហើយជាបញ្ហាធំដូច្នេះរៀនកែប្រែទម្លាប់នេះចេញ ត្រូវនិយាយជាមួយកូនរបស់អ្នក ហើយស្តាប់ពួកគេដោយយកចិត្តទុកដាក់ ដែលនេះហើយមានហេតុផលមួយសម្រាប់ការប្រាស្រ័យទាក់ទងជាមួយកូនអ្នកដើម្បជួយពួកគេរកវិធីសាស្ដ្រថ្មីៗ និងគំនិតថ្មី ដែលជាផ្នែកមួយជួយឱ្យពួកគេក្នុងការអភិវឌ្ឍខួរក្បាល។
៦.រៀបចំគោលដៅសម្រាប់ការធ្វើជាឪពុកម្តាយរបស់គេ៖មានសំណួរមួយសួរទៅកាន់អ្នកថា តើអ្វីជាគោលដៅរបស់អ្នកក្នុងការចិញ្ចឹមកូន? ចូលអ្នកឆ្លើយនឹងសួរនេះ រួចអ្នកទាំងអស់គ្នាប្រាកដជាដឹងថាអ្នកនឹងចិញ្ចឹមកូនដោយរបៀបណាដោយការបានអានចំណុចខាងលើ ហើយប្រសិនបើអ្នកជាឪពុកម្តាយភាគច្រើនអ្នកចង់ឱ្យកូនរបស់អ្នកមានលិទ្ធិល្អនៅសាលារៀន មានទំនួលខុសត្រូវ ពូកែ និងគួរឱ្យស្រលាញ់ ដូច្នេះអ្នកត្រូវមានផែនការ និងគោលដៅឱ្យបានច្បាប់លាស់។
អត្ថបទស្រាវជ្រាវដោយ៖ម៉ាង វិសិដ្ឋារតន៍