តើអ្នកដឹងទេថា ងូតទឹកត្រូវពេលជួយសុខភាពអ្វីខ្លះ ក្រៅតែពីជួយសម្អាតរាងកាយអ្នកឱ្យស្អាតល្អ? ជាការពិតណាស់ ការងូតទឹកបានផ្ដល់ជាប្រយោជន៍យ៉ាងច្រើនមហាសាលដែលអ្នកមិនធ្លាប់បានដឹង ងូតទឹកត្រូវពេលជួយឱ្យរាងកាយមានសុខភាពល្អ ជួយដេញស្រ្តេស ព្យាបាលកាត់បន្ថយជំងឺមកយារយី ជួយឱ្យការគេងមានប្រសិទ្ធភាព រួមទាំងសុខភាពផ្នែកផ្សេងៗជាច្រើនទៀត។ នេះបើយោងតាមរយៈគេហទំព័រ bustle-com និង everydayhealthបានណែនាំអត្ថប្រយោជន៍ដល់សុខភាពចេញពីការងូតទឹកមានដូចខាងក្រោម៖
១.អត្ថប្រយោជន៍ពេកព្រឹក៖ អ្នកជំនាញBacke បាននិយាយថាមនុស្សជាច្រើនអាចមានបញ្ហាបែកញើសនៅពេលយប់ច្រើន។ ដូច្នេះការងូតទឹកនៅពេលព្រឹកបន្ទាប់ពីភ្ញាក់ពីគេង គឺអាចជួយឱ្យអ្នកមានអារម្មណ៍ស្រស់ស្រាយ ស្រស់ថ្លា ស្វាហាប់ជាងមុន រួមទាំងជួយឱ្យរាងកាយអ្នកមានអនាម័យល្អផងដែរ។
២.ងូតទឹកពេលយប់៖ អ្នកជំនាញដដែល បាននិយាយដែរថាការងូតទឹក នៅពេលពេលយប់គឺល្អសម្រាប់សុខភាពជាងគេ។ ដោយហេតុថាអាចជួយសម្អាត លាងជម្រះភាពកខ្វក់ពេញ១ថ្ងៃរបស់អ្នកការពារការឆ្លងមេរោគ រួមទាំងមានប្រយោជន៍ជួយឱ្យដំណេករបស់អ្នកឱ្យកាន់តែប្រសើរផងដែរ។ យោងតាមរយៈមជ្ឈមណ្ឌលគ្រប់គ្រងនិងបង្ការជំងឺបានឱ្យដឹងថា ២ភាគ៣នៃជនជាតិអាមេរិកគេងមិនបានគ្រប់គ្រាន់ទេ តែក្រោយពីការងូតទឹកពេលយប់បានត្រឹមត្រូវ ដោយហេតុថាគេនែនាំឱ្យងូតទឹកក្តៅ២ទៅ៣ម៉ោងមុនចូលគេង ឃើញថាការគេងបានផលល្អច្រើន។
៣.ងូតទឹកពេលស្រ្តេស៖ វេជ្ជបណ្ឌិត Bard បាននិយាយថា ស្ត្រេសគឺជាផ្នែក១នៃជីវិតរបស់មនុស្សគ្រប់រូប ដូច្នេះប្រសិនណាអ្នកកំពុងស្រ្តេសអាចសាកល្បងងូតទឹក ព្រោះការងូតទឹកនៅពេលស្រ្តេសអាចជួយឱ្យអ្នកមានអារម្មណ៍ល្អមកវិញ និងអាចជួយបំបាត់ចិត្តតានតឹងបាន មួយវិញទៀតការងូតទឹកក៏អាចជួយការពារជំងឺបេះដូង កាត់បន្ថយសម្ពាធឈាមបានផងដែរ។
៤.ងូតទឹកក្រោយហាត់ប្រាណ៖ការងូតទឹកក្រោយពេលហាត់ប្រាណបានជួយឱ្យធូរស្រាលនៃការឈឺសាច់ដុំ រលាកសន្លាក់ បង្កពីការហាត់ប្រាណបាន ។ លោកវេជ្ជបណ្ឌិត Bard បាននិយាយដូចគ្នាថាការងូតទឹកបន្ទាប់ពីហាត់ប្រាណរួច មិនថាពេលព្រឹកឬក៏ថ្ងៃនោះទេ គួរតែងូតទឹកសម្អាតខ្លួនប្រាណចេញ ព្រោះ អាចជួយការពាររោគផ្សិត មេរោគអាក្រក់ៗចេញពីរាងកាយអ្នកបានដូចគ្នា ។
សរុបមកការងូតទឹកត្រូវពេល ត្រូវវេលា បានជួយសម្អាតទាំងរាងកាយ ជួយឱ្យអ្នកមានអារម្មណ៍ល្អប្រសើរ ការពារជំងឺ ដូចជាជំងឺលើសឈាម បេះដូង រលាកសន្លាក់ ឈឺសាច់ដុំក្រោយពេលហាត់ប្រាណផងដែរ៕
អត្ថបទដោយ៖ ប៉ែត ធីតា
