បងប្អូនច្រើនណាស់និយមញ៉ាំអាហារ និងភេសជ្ជៈផ្អែមៗច្រើនជារៀងរាល់ថ្ងៃ ដែលនេះជាហេតុមួយនាំឱ្យជាតិស្ករក្នុងឈាមកើនឡើងជាប្រចាំ បើវាកាន់តែកើនលើសកម្រិតអាចធ្វើឱ្យកើតជំងឺទឹកនោមផ្អែម ទាំងវ័យក្មេង។ ផ្អែកតាមគេហទ័ព័រ mayoclinic ជំងឺទឹកនោមផ្អែមប្រភេទទី២ មានការកើតឡើងច្រើន លើមនុស្សពេញវ័យ សូម្បីតែក្មេងក៏ដោយ ដោយសារជំងឺនេះបណ្ដាលមកពីការទទួលទានរបបអាហារមិនបានត្រឹមត្រូវ និងសកម្មភាពរស់នៅប្រចាំថ្ងៃ។

បើមិនចង់ឱ្យជាតិស្ករលើសខ្លាំង កើតជំងឺទឹកនោមផ្អែមទាំងវ័យក្មេង អ្នកគួរតែតាមដានសុខភាពខ្លួនឯងជាប្រចាំ ផ្អែកតាមប្រភពhealthshots បានឱ្យដឹង ប្រសិនបើមានសញ្ញាទាំងអស់នេះ មានន័យថាជាតិស្ករក្នុងឈាមរបស់អ្នកកំពុងតែកើនឡើងហើយ គួរប្រុងប្រយ័ត្ន។

-     នោមញឹកញាប់

-     ភ្នែកខ្សោយ មើលមិនសូវច្បាស់

-     អស់កម្លាំង

-     ឆាប់ស្រេកទឹក

-     មានអារម្មណ៍ឆាប់ខឹង

-     សម្រកគីឡូ

-     អារម្មណ៍ភ័យៗ ពិបាកដកដង្ហើម

-     អារម្មណ៍ងាយឆាប់បោះបង់

-     ឆាប់អាឡែកស៊ី ហើយមិនងាយជា

បន្ថែមពីនោះអ្នកឧកញ៉ាវេជ្ជបណ្ឌិត គួច ម៉េងលី ក៏បានចែករំលែកថាចំពោះកម្រិតជាតិស្ករ យើងអាចពិនិត្យនិងវាស់បាន ប្រសិនបើកម្រិតជាតិស្ករត្រឹម៧០ទៅ១០០ mg/dL សុខភាពនៅធម្មតា។ ចំពោះកម្រិតលើសពី១០០ទៅ១២៥ mg/dL ជាតិស្ករក្នុងឈាមអណ្តែតច្រើន បើចូលដល់លើសពី១២៦ mg/dL ឈាមចូលដំណាក់កាលទឹកនោមផ្អែមហើយ។ ចំពោះករណីក្រោយការទទួលទានបាយហើយ២ម៉ោងក្រោយមកធ្វើតេស្តឈាម មិនឱ្យលើសពី១៤០mg/dL ទេជាសញ្ញានៃទឹកនោមផ្អែម រីឯអ្នកកើតទឹកនោមផ្អែមហើយក្រោយញ៉ាំបាយ២ម៉ោង បើតេស្តឃើញលើសពី២០០mg/dL មានន័យថាពិបាកក្នុងការគ្រប់គ្រង។

ហេតុដើម្បីទប់ស្កាត់ការពារ បងប្អូនគួរកែទម្លាប់ក្នុងការរស់នៅ កុំទទួលទានជាតិស្ករច្រើន ទាំងភេសជ្ជៈផ្អែមៗ ក៏ដូចជាងអាហារមានជាតិម្សៅច្រើន ដូចជាបាយស នំបុ័ង មី គុយទាវ ដំឡូងជាដើម សូមពិសារឱ្យមានកម្រិត។ មួយវិញទៀត គួរចៀសវាងការជក់បារី កាត់បន្ថយជាតិអាល់កុល ធ្វើសកម្មភាពរាងកាយជាប្រចាំដើម្បីគ្រប់គ្រងហានិភ័យនៃជំងឺទឹកនោមផ្អែមប្រភេទទី២ទាំងវ័យក្មេង៕

អត្ថបទដោយ៖ Senghong