ជំងឺច្រាលទឹកអាស៊ីតក្រពះកើតមានលើមនុស្សគ្រប់រូប និងគ្រប់វ័យ។ ជាទូទៅការច្រាលទឹកអាស៊ីតក្រពះម្តងម្កាលជារឿងធម្មតា។ យើងចាត់ទុកថាវាជាជំងឺក្នុងករណីដែលវាកើតឡើងច្រើនដងក្នុងមួយថ្ងៃ ជាប្រចាំហើយរំខានដល់អ្នកជំងឺ។
ទន្ទឹមនឹងគ្នានេះ លោកវេជ្ជបណ្ឌិតឯកទេស ឈាង ស៊ីដេត ឯកទេស ជំងឺ ក្រពះ ពោះវៀន ថ្លើម និងឬសដូងបាត ប្រធានប្រតិបត្តិនៃ មន្ទីរសំរាកព្យាបាល ឯកទេស អេគីប មានប្រសាសន៍ថា រោគសញ្ញាដែលអ្នកជំងឺតែងតែត្អូញត្អែររួមមាន ការក្តៅក្រហាយនៅក្រោយសន្ទះទ្រូង ក្អែលចំណីអាហារតាមមាត់ និងភើរជូរជាដើម។ មិនតែប៉ុណ្ណោះរោគសញ្ញាគ្រោះថ្នាក់រួមមាន ពិបាកលេបអាហារ លេបឈឺ ស្រកគីឡូ ស្លេកស្លាំង និងបន្ទោរបង់មានឈាម។
ជាមួយគ្នានេះ លោកវេជ្ជបណ្ឌិតឯកទេស ឈាង ស៊ីដេត បានបន្តលើកឡើងថា ផលវិបាកធ្ងន់ធ្ងររួមមាន ការរលាកបំពង់អាហារផ្នែកខាងក្រោម ត្បៀតបំពង់អាហារផ្នែកខាងក្រោម ឬអាចឈានដល់ការរលាករ៉ាំរ៉ៃដែលនឹងអាចឈានដល់មហារីកបំពង់អាហារផ្នែកខាងក្រោមទៀតផង។
ដូច្នេះរោគវិនិច្ឆ័យរួមមានការសុងក្រពះ ដើម្បីវាយតំលៃលើភាពធ្ងន់ធ្ងរនៃជំងឺ អាចរួមផ្សំជាមួយការវាស់កំរិតអាស៊ីត និងចលនាកន្ត្រាក់ក្នុងបំពង់អាហារ។
ជាចុងក្រោយ លោកវេជ្ជបណ្ឌិត ឈាង ស៊ីដេត ផ្ដាំផ្ញើរទៅអ្នកជំងឺថា ត្រូវធ្វើការព្យាបាលរួមមាន ការប្តូរទម្លាប់រស់នៅឱ្យបានប្រសើរ ការបរិភោគអាហារប្រចាំថ្ងៃ សម្រកទម្ងន់ក្នុងករណីលើសទំងន់ ការពិសាថ្នាំបន្ថយជាតិអាស៊ីតក្រពះ និងការវះកាត់ជាជំរើសចុងក្រោយសំរាប់ការព្យាបាលជំងឺនេះ។
អត្ថបទស្រាវជ្រាវដោយ៖ម៉ាង វិសិដ្ឋារតន៍