បញ្ហានៃការរលាក ឬឈឺចាប់នៅតាមបណ្តោយឆ្អឹងខ្នង អាចបង្កមកពីបញ្ហាគួបផ្សំជាច្រើនរួមមាន កត្តាវិវត្តន៍វ័យ កង្វះសកម្មភាពប្រចាំថ្ងៃ លើសទម្ងន់ កើតជំងឺពុកឆ្អឹង ឬអាចនឹងស្ថិតក្នុងលក្ខខណ្ឌផ្លូវចិត្ត-ល-។ ជាទូទៅក្រុមបុគ្គលដែលមានវិបត្តិឈឺខ្នងជាប់រហូត គឺគេតម្រូវ​ឱ្យ​មានការព្យាបាលស្របតាម​ទម្រង់​ថ្នាំ​វេជ្ជបញ្ជា​មួយ​ចំនួន និងគោរពតាមក្បួនខ្លះៗដែលក្រុមអ្នកជំនាញណែនាំ។

តួយ៉ាងបើផ្អែកទៅតាមប្រភព everydayhealth បានលើកឡើងនូវសម្តីរបស់វេជ្ជបណ្ឌិត Mohamad Bittar គ្រូពេទ្យជំនាញខាងជំងឺសន្លាក់ និងជាជំនួយការសាស្រ្តាចារ្យផ្នែកវេជ្ជសាស្ត្រនៅសាកលវិទ្យាល័យ Tennessee Health Center ក្នុងទីក្រុង Memphis ដោយបានណែនាំនូវគន្លឹះសាមញ្ញៗមួយចំនួនដែលអ្នកមានបញ្ហាឈឺខ្នងញឹកញាប់គួរអនុវត្តន៍ ដើម្បីបង្ការកុំឱ្យស្ថានភាពជំងឺវិវត្តន៍ទៅរកសភាពធ្ងន់ធ្ងរ អាចខូចទ្រង់ទ្រាយឆ្អឹងខ្នង ឬការបាក់ឆ្អឹង។

១. រក្សាសកម្មភាពរាងកាយ៖ វេជ្ជបណ្ឌិត Bittar កត់សម្គាល់ថា ចំពោះអ្នកមានបញ្ហាឈឺចាប់ឆ្អឹងខ្នង គួរតែបន្តសកម្មខ្លះៗជាប្រចាំថ្ងៃ ដូចជា ធ្វើលំហាត់ប្រាណ និងរក្សាឥរិយាបថឆ្អឹងខ្នងឱ្យបានល្អ"។ ឧទាហរណ៍៖ការគេងលាតសន្ធឹងលើផ្ទៃរាបស្មើ និងលើកជង្គង់មកក្តោប រក្សាក្បាលនៅឱ្យស្ងៀម និងស្របតាមតាមទម្រង់ឆ្អឹង ធ្វើរយៈពេល១០វិនាទី។ មួយវិញទៀតកុំទម្លាប់អង្គុយកោងខ្នង ឬបត់បែនខ្លួនដោយគ្មានការប្រុងប្រយ័ត្ន។

២. ដកដង្ហើមវែង ដើម្បីរក្សាសមត្ថភាពសួត៖ ដកដង្ហើមវែងៗ ជាលំហាត់ប្រាណមួយ ដែលជួយរក្សាសុខភាពសួត តែវាក៏មានពាក់ព័ន្ធនឹងជួសសម្រួល ក៏ដូចជាកាត់បន្ថយការរលាកនៅក្នុងសន្លាក់ឆ្អឹងជំនីរទៅនឹងឆ្អឹងខ្នងផងដែរ។

៣. រៀនលើករបស់ធ្ងន់ឱ្យបានត្រឹមត្រូវ៖ ​ការ​លើករបស់ធ្ងន់ដោយគ្មានការប្រុងប្រយ័ត្នគឺជារឿងមួយគ្រោះថ្នាក់ខ្លាំងណាស់ចំពោះអ្នកមានបញ្ហាសន្លាក់។ ដូច្នេះចំពោះអ្នករបស់មួយចំនួនមុននឹងលើកគួរព្យាយាមរក្សាជំហរឱ្យបានល្អជាមុន ឱនលើកឱ្យស្របត្រូវនឹងគន្លាក់ឆ្អឹងត្រឹមត្រូវ ធ្វើបែបនេះ អ្នកមិនសូវជួបបញ្ហាជាប់ចង្កេះ គឺគាំងសន្លាក់នោះទេ។

៤. ប្រយ័ត្នពេលបើកបរ៖ ការបើកបរក្នុងរយៈពេលយូរ ឬផ្លូវឆ្ងាយដោយមិនសម្រាក ដោយអង្គុយក្នុងរថយន្តរយៈពេលយូរអាចធ្វើឱ្យអាការឆ្អឹងខ្នងងាយឈឺ និងឡើងរឹង ដូច្នេះ គួរឱ្យព្យាយាមឈប់សម្រាកខ្លះប្រសិនអ្នកស្ថិតក្នុងលក្ខខណ្ឌបើកបរផ្លូវឆ្ងាយ។

៥. ជ្រើសរើសពូកគេងឱ្យបានត្រឹមត្រូវ៖ ការគេងលើពូកត្រឹមត្រូវ ក៏ជាផ្នែកមួយជួយព្យាបាលនូវបញ្ហាឆ្អឹងខ្នងដែរ ដោយអ្នកជំនាញបានណែនាំឱ្យគេងលើពូកដែលមានលក្ខណៈមិនរឹងពេក ក៏មិនទន់ពេក និងព្យាយាមគេងផ្កាប់រយៈ៣០នាទីជារៀងរាល់យប់ ដើម្បីជួយសម្រួលដល់ចលនាឆ្អឹងខ្នង ទប់ស្កាត់នូវបញ្ហាឈឺសន្លាក់ខ្នងរុំារ៉ៃ។

៦. ព្យាយាមធ្វើបង្កាន់ដៃនៅក្នុងផ្ទះ៖ បង្កាន់ដៃ ជួយរក្សាលំនឹង និងជួបទប់ខ្លួនឱ្យមានសុវត្ថិភាព ពីការដួល ឬរអិលធ្លាក់។ ដូច្នេះ គួរព្យាយាមធ្វើបង្កាន់ដៃនៅតំបន់ដែលឧស្សាហ៍ឡើង និងងើប អង្គុយ ដូចជា នៅក្នុងបន្ទប់ទឹក កាំជណ្តើរផ្ទះ និងចង្ក្រានបាយផងដែរដោយនេះ មិនត្រឹមតែជួយដល់បញ្ហាឆ្អឹងខ្នងប៉ុណ្ណោះទេ វាអាចផ្តល់នូវសុវត្ថិភាពបន្ថែម។

៧. នៅផ្ទះគួរធ្វើបង្គន់អង្គុយ៖ ចំណុចនេះ គឺចាំបាច់ណស់សម្រាប់មនុស្សចាស់ ដែលបុគ្គលខ្លះគាត់អាចនឹងមានបញ្ហាក្នុងការពិបាកបត់ជើង ឬត្រូវចំណាយពេលយូរអង្គុយក្នុងបន្ទប់ទឹក ដូច្នេះការជ្រើសរើសបង្គន់អង្គុយ អាចជួយកាត់បន្ថយហានិភ័យនៃការឈឺសន្លាក់ឆ្អឹងខ្នង និងបង្ការបញ្ហាដួល ឬសន្លាក់ឆ្អឹងត្រូវជាប់គាំងដូចគ្នា។

៨. កំណត់ពេលអង្គុយ៖ បញ្ហានេះ អាចនឹងកើតមានច្រើនចំពោះអ្នកកំពុងស្ថិតក្នុងវ័យធ្វើការ  អង្គុយនៅមួយកន្លែង ដូច្នេះគួរតែក្រោកឡើង ហើយដើរជុំវិញឱ្យបានញឹកញាប់កន្លះម៉ោងម្តង ឬអាចងើបឈរពត់ខ្លួនខ្លះ ដើម្បីបន្ធូរអារម្មណ៍៕

អត្ថបទដោយ៖ ប៉ាវ ភក្តី