មនុស្សម្នាក់ៗតែងមានភាពឈឺចាប់តាមបែបផែនផ្ទាល់ខ្លួន ជាហេតុត្រូវការការព្យាបាល ក៏ដូចជាបន្ធូរបន្ថយអារម្មណ៍តានតឹងដែលរងទុក្ខនោះ។ហើយថ្ងៃនេះចាបបៃតងនឹងប្រាប់បងប្អូនពីវិធីឱបខ្លួនឯង ដើម្បីស្អំចិត្តរបស់បងប្អូនឱ្យបានធូរស្រាលពីរបួសដែលកំពុងឈឺផ្សារនោះ។

មុននឹងទៅដល់របៀបឱបសូមបងប្អូនមកដឹងពីអត្ថប្រយោជន៍ខ្លះៗនៃការឱបខ្លួនឯងនេះ។តាមការឱ្យដឹងពីគេហទំព័រសុខភាពHealthlineបានប្រាប់ឱ្យដឹងថាការឱបខ្លួនឯងឱ្យណែន អាចជួយ កាត់បន្ថយការឈឺចាប់ បង្កើនចិត្តសណ្ដោសប្រណីលើខ្លួនឯង ស្រលាញ់ខ្លួនឯងជាងមុន ធ្វើឱ្យអ្នកមានអារម្មណ៍ថាសុវត្ថិភាព និងកាត់បន្ថយភាពភ័យខ្លាច ភាពឯកា រំសាយអារម្មណ៍ស្រ្តេស និសសម្ពាធមួយចំនួនផងដែរ។

ចំពោះរបៀបឱប

-អាចយកដៃអ្នកឱបស្មារបស់អ្នកទាំងសងខាង តាមបែបធម្មជាតិ ហើយដាក់ដៃដែលខ្វែងឱបខ្លួនឯងនោះបាននៅលើទ្រូងរបស់អ្នក។ហើយបន្ថែមកម្លាំងដៃឱបបន្តិចដើម្បីទទួលបានអារម្មណ៍កក់ក្ដៅពីទម្ងន់នៃការឱបនោះ។

-អ្នកអាចប្រើអារម្មណ៍ដែលអ្នកចង់បានពីការឱបបែបណាមួយ ហើយអនុវត្តការចង់បានការឱបបែបនោះមកជាមួយខ្លួនឯងវិញ។ធ្វើបែបនេះអារម្មណ៍អ្នកនឹងបានស្ងប់ច្រើន។

-អ្នកក៏អាចប្រើដៃឱ្យសម្រូតចុះឡើងតិចៗលើដៃនិងស្មារបស់ខ្លួន ធ្វើបែបនេះក៏ជួយអារម្មណ៍ឱ្យល្ហែល្ហើយខ្លះដែរ។

-អ្នកអាចឱបបែបនេះឱ្យបានយូរតាមដែលអ្នកធ្វើទៅបាន។

ការឱបខ្លួនឯងស្ដាប់ទៅដូចរាងចម្លែកតែនេះគឺជាវិធីមួយដ៏ល្អសម្រាប់អ្នកពិសេស ដែលកំពុងមានអារម្មណ៍ឯកា ខ្វះភាពកក់ក្ដៅ ព្រួយបារម្ភពីអ្វីមួយ។ស្រលាញ់ខ្លួនឯងថែខ្លួនឯងឱ្យបានច្រើន មិនថាអ្នកអាចធ្វើរឿងតូចតាចតិចតួចអ្វីទេ ឱ្យតែអាចឱ្យខ្លួនឯងរីករាយចូលធ្វើវាទៅ ឱ្យតែអ្នកមានអារម្មណ៍ថាអ្នកចង់បានវា ហើយវាត្រឹមត្រូវមិនបង្កទុក្ខលំបាកឱ្យអ្នកបន្ថែម។



 អត្ថបទដោយ៖ ភោគ ម៉ារី