Rosé (Park Chaeyoung) ដែលជាតារា Kpop ស្រីក្នុងបេះដូងយុវវ័យ ស្រលាញ់ពេញចិត្តទាំងសមត្ថភាព ពូកែទាំងច្រៀង រាំ ប្រចាំក្រុម BlackPink។ ភ្ជាប់ជាមួយជំនាញនេះដែរ Rose ត្រូវបានមហាជនជាច្រើន ស្រលាញ់ពីរូបសម្បត្តិ និងមានយុវវ័យមិនតិចទេ ដែលព្យាយាមតែងតួ ថែរូបរាងតាមនាង។ ថ្មីនេះ Rose បានលេចវត្តមាន តែម្នាក់ឯងនៅក្នុងកម្មវិធីFashionដ៏ធំលំដាប់ពិភពលោក គឺកម្មវិធីMET GALA ដែលជាកម្មវិធីដែលពោរពេញទៅដោយកំពូលតារាល្បីៗលំដាប់ប្រទេសចូលរួម។

ភាពទាក់ទាញកាន់តែពុះកញ្ជ្រោលរបស់តារា K-pop ស្រីបានឆក់យកចំណាប់អារម្មណ៍កាន់តែច្រើនឡើងពីរូបសម្រស់គ្មានទាស់ភ្នែក។ ហើយថ្ងៃនេះផងដែរ Healthy Cambodia សូមជ្រើសយកនូវរបៀបនៃការថែរូបសម្រស់របស់កញ្ញា Rose មកចែកជូនប្រិយមិត្តអ្នកអាន ដើម្បីបង្ហាញពីតិចនិកថ្មី ដើម្បីថែស្បែក និងរក្សាទម្ងន់ឱ្យបានថេរ។ យោងតាមប្រភពចេញផ្សាយ pinkvilla.com និង health-yogi.com បានលើកឡើងថា Rose មានទម្លាប់ការថែរក្សារាង និងស្បែកខុសប្លែកពីគេបន្តិច ដោយច្បិចយកតែតិចនិកបែបធម្មជាតិប៉ុណ្ណោះ៖

១.​ ក្បួនថែសម្រស់៖

ក. ជ្រើសរើសផលិតផលលាងសម្អាតមុខ៖ Rose ប្រើផលិតផលលាងមុខប្រភេទហ្វូមដែលអាចជួយជម្រះសារធាតុខ្លាញ់លើផ្ទៃមុខបានល្អ និងជែលលាងសម្អាតប្រភេទទឹកដោះគោ ដើម្បីកំចាត់ភាពកខ្វក់លើស្បែកមុខ និងគ្រឿងសម្អាងដែលនៅសល់។

ខ. ប្រើសេរ៉ូមថែរក្សាស្បែកដែលគ្មានជាតិកាត់៖ រ៉ូសប្រើសេរ៉ូម IOPE ផលិតផលនេះមានសារធាតុចិញ្ចឹមដូចជា គ្លីសេរីន, ប្រូប៉ាលីន-ហ្គីលខូល, វីតាមីនអ៊ី…គ្រឿងផ្សំទាំងនេះមានឥទ្ធិពលផ្តល់សំណើម និងប្រឆាំងអុកស៊ីតកម្មលើស្បែក។

គ.​ ឡេការពារកម្តៅថ្ងៃ៖ ឡេការពារកម្តៅថ្ងៃ នឹងការពារស្បែកពីកាំរស្មីយូវី។ ដូច្នេះអ្នកគួរតែប្រើឡេការពារកម្តៅថ្ងៃមុនពេលអ្នកចេញទៅក្រៅជាប្រចាំដើម្បីធានាបាននូវសុខភាពស្បែក។

ឃ. ជ្រើសរើសផលិតផលត្រឹមត្រូវ៖ Rose តែងប្រើផលិតផលដែលធានាបាននូវសុខភាពស្បែក និងគ្មានជាតិពុល។ ការប្រើផលិតផលទាំងនេះអាស្រ័យទៅលើស្បែកមុខរបស់មនុស្សម្នាក់ៗ។

២. ក្បួនថែរាង៖

Rose ជាទូទៅនាងតែងតែជ្រើសយកវិធីរាំបន្ថែមជាមួយការហាត់ប្រាណបែប pilate រាំ និងរៀបចំផែនការរបបអាហារជាប្រចាំ។ ជាក់ស្តែងសម្រាប់រូបរាងក្នុងវ័យ២៣ឆ្នាំនេះ Rose មានកម្ពស់ដល់ទៅ ១ម៉ែត្រ៦៨ តែទម្ងន់វិញត្រឹមតែ ៤៥គីឡូ ជាមួយនឹងចង្កេះលេខ ២៤អ៊ីញ ប៉ុណ្ណោះ។ ការហាត់រាំ យើងសង្កេតថា ជាជម្រើសល្អមួយសម្រាប់អ្នកដែលមិនសូវជាមានទំនោរទៅខាងហាត់ប្រាណ ជាងនេះទៅទៀតការហាត់រាំនេះដែរ ក៏ជួយលោកអ្នកស្រកខ្លាញ់ពេញមួយតួខ្លួនដូចគ្នា។

បន្ថែមពីនេះទៀតបើទោះបីជាត្រូវហាត់សម្រកយ៉ាងណា របបអាហារសុខភាពនៅតែសំខាន់ ហេតុនេះសម្រាប់ប្រិយមិត្តដែលមានផែនការសម្រកគួររៀបចំរបបអាហារណាមួយដែលសមស្រប និងមានផាសុខភាព ជៀសពីអាហារធ្វើឱ្យលើសទម្ងន់ផងដែរ៕