មិនមាននរណាម្នាក់គេចផុតពីការស្ដីបន្ទោស ឬនិយាយផ្លែផ្កាពីមនុស្សដែលស្គាល់នោះទេ ហើយពាក្យសម្ដីមួយចំនួនកា្លយជាអាវុធដ៏គ្រោះថ្នាក់សម្រាប់អ្នកដែលរងពាក្យសម្ដីទាំងនោះ។តែពេលខ្លះទៀតបានក្លាយជាធាតុដ៏អស្ចារ្យជំរុញឱ្យ មានភាពល្អប្រសើរ អាចថានេះគឺអាស្រ័យលើយើងមានការគិតលើវាបែបណា។
ថ្ងៃនេះHealthy Cambodia នឹងលើកយកសម្រស់សម្ដីមួយឃ្លារបស់កីឡាករល្បីរបស់ពិភពលោកគឺលោក Cristiano Ronaldo ដែលអាចជួយពង្រឹងផ្លូវចិត្តរបស់លោកឱ្យរក្សាបានភាពរឹងមាំទោះត្រូវមានការបង្ហាញភាពមិនពេញចិត្តមួយចំនួនលើរូបគាត់ក៏ដោយ។
តាមការឱ្យដឹងរបស់ motivationgrid.comបានលើកឡើងពីឃ្លាប្រចាំចិត្តរបស់រ៉ូលណាលដូថា “សេចក្តីស្រឡាញ់របស់អ្នកធ្វើឱ្យខ្ញុំរឹងមាំ ឯការស្អប់របស់អ្នកធ្វើឱ្យខ្ញុំខិតខំប្រឹងមិនឈប់ឈរ។”
បន្ថែមពីនេះតាមប្រភពដដែលបញ្ជាក់ដែរថាការខិតខំប្រឹងរបស់គាត់គឺដើម្បីជួយគ្រួសារ ដោយគាត់យល់ថាបើគាត់មិនអាចជួយគ្រួសារឱ្យល្អប្រសើរបានទេ មិនមាននរណាមកជួយគ្រួសារគាត់ឡើយ ដែលនេះជាកត្តាជំរុញមួយជួយលោកឱ្យខិតខំតាំងពីក្មេងធម្មតាក្លាយជាបុគ្គល្បីមួយរូបក្នុងពិភពលោក។
ពិតណាស់មនុស្សម្នាក់ៗត្រូវមានគោលជំហរផ្ទាល់ខ្លួន ស្គាល់ខ្លួនឯងឱ្យច្បាស់ជារឿងធំ ហើយទុកត្រូវទុកពាក្យសម្ដីអ្នកដទៃជាគ្រូ ជាថ្នាំប៉ូវសម្រាប់ផ្លូវចិត្តនោះទើប អាចបន្តដំណើរទៅមុខបាន។ប្រសិនបើយើងទោរទន់ទៅតាមពាក្យដែលគេនិយាយ ហើយទម្លាក់ស្មារតីខ្លួនឯងទៅតាមស្ថានការទៀតនោះ ជីវិតយើងនឹងមិនរឹងមាំឡើយ។
ខំថ្ងៃនេះដើម្បីមនុស្សជាទីគោរពស្រលាញ់របស់យើង ហើយឱ្យអ្នកដែលមិនចូលចិត្តយើងដឹងថាគុណភាពជីវិតយើងគឺមិនដូចអ្វីដែលគេវាយតម្លៃ និងកំណត់តាមសម្ដីដែលគេពោលចេញនោះទេ។
"ត្រូវជឿទុកចិត្តថាខ្លួនងប្រាកដជាធ្វើបាន"
អត្ថបទដោយ៖ ភោគ ម៉ារី