​បញ្ហាឃ្លានខ្លាំង ធ្វើឱ្យមនុស្សប្រែប្រួលអារម្មណ៍លឿនទៅជា ឆាប់​ខឹង មួម៉ៅ នៅមិនសុខ​ ជាចំណុចមួយដែលបុគ្គលគ្រប់រូបសុទ្ធធ្លាប់ជួយប្រទះ។ ជាងនេះទៀតសោត ក៏មានបុគ្គលមួយចំនួនទៀតឃ្លានរហូតដល់ងងឹតមុខតែម្តង។

ផ្សារភ្ជាប់ជាមួយនឹងបញ្ហាខាងលើ បើផ្អែកទៅតាមការលើកឡើងរបស់គេហទំព័រ clevelandclinic បានលើកឡើងពីប្រសាសន៍របស់វេជ្ជបណ្ឌិត Christine Lee, MD ឯកទេសខាងក្រពះពោះវៀន បានពន្យល់ឱ្យដឹងថា នៅពេលដែលមនុស្សមិនបានញ៉ាំអ្វីមួយរយៈធំ នោះកម្រិតជាតិស្ករ(គ្លុយកូស) នៅក្នុងឈាមនឹងត្រូវថយចុះ។ ហើយនៅពេលណាដែលជាតិស្ករក្នុងឈាមមានកម្រិតទាបពេក វានឹងបង្កឲ្យកើនឡើងនូវ អ័រម៉ូន cortisol (អរម៉ូនស្ត្រេស) និង adrenaline (អរម៉ូនដែលធ្វើឱ្យអារម្មណ៍តតាំង ឬភ័យខ្លាច...)។ អ័រម៉ូនទាំងនេះ នឹងត្រូវបានបញ្ចេញទៅក្នុងចរន្តឈាម ដើម្បីធ្វើឱ្យមានតុល្យភាពជាតិស្ករក្នុងឈាមឡើងវិញ ក៏ប៉ុន្តែនឹងធ្វើឱ្យអារម្មណ៍ និងអាកប្បកិរិយាមានការប្រែប្រួលលឿន។

វេជ្ជបណ្ឌិត Lee មានប្រសាសន៍បន្តថា ជាតិស្ករក្នុងឈាមទាប អាចរំខានដល់មុខងារខួរក្បាលខ្ពស់ ដោយសារតែកង្វះសារធាតុគ្រប់គ្រងកម្លាំងជំរុញបង្កឱ្យកើតមានជាអាការ ហត់នឿយ ញ័រដៃ ឬអាចនឹងងងឹតមុខ។

ទន្ទឹមនឹងនេះទៀតសោត ការ​ឃ្លានខ្លាំងក្នុងរយៈពេលយូរ វាមិនត្រឹមតែជះ​ផល​អវិជ្ជមានដល់អារម្មណ៍ប៉ុណ្ណោះទេ តែវាអាចបណ្តាលឱ្យមានប្រតិកម្មចេញជាអាការផ្សេងៗទៀតដូចជា៖ អស់កម្លាំង, ងងុយគេង, ការលំបាកក្នុងការផ្តោតអារម្មណ៍, ខ្សោយ, ងាយនឹងធ្វើខុស ឬកើតជាបញ្ហាផ្សេងៗទៀត ទៅតាមលក្ខខណ្ឌសុខភាពរបស់មនុស្សម្នាក់ជាពិសេសអ្នកកំពុងតែថែសុខភាពស្ថិតក្នុងលក្ខខណ្ឌវេជ្ជសាស្ត្រ អ្នកធាត់ ឬខ្វះអាហារូបត្ថម្ភ៕

អត្ថបទដោយ​៖ ប៉ាវ ភក្តី