បច្ចុប្បន្នមានប្រជាជនកម្ពុជាជាច្រើននាក់ស្ទើគ្រប់វ័យបានកើតជម្ងឺក្រពះពោះវៀន ដោយអ្នកខ្លះត្រឹមរលាក អ្នកខ្លះឈានដល់ដំបៅក្រពះពោះវៀន ធ្ងន់ធ្ងរជាងនេះទៀតមានអ្នកខ្លះបានកើត​ជម្ងឺមហារីកក្រពះពោះវៀនក៏មាន ។ ថ្ងៃនេះ Healthy Cambodia នឹងដកស្រង់ចេញពីគេហទំព័រ www.doctorfamily.com ស្ដីពីអ្វីទៅជាឧស្ម័នក្នុងក្រពះពោះវៀន ? មកជម្រាបជូនលោកអ្នកទុកជាចំណោះដឹង ។

ការកើនឡើងនៃឧស្ម័នក្នុងក្រពះពោះវៀន ភាគច្រើនកើតឡើងក្រោយពេលលោកអ្នកញ៉ាំសាច់ ។ ឧស្ម័នទាំងនេះត្រូវបានបញ្ចេញតាមរយៈមាត់ដែលនាំឲ្យលោកអ្នកភើ និងត្រូវបានបញ្ចេញតាមរន្ធគូទ (ផោម) ។

រោគសញ្ញា៖ ភាគច្រើននាំឲ្យហើមប៉ោងនៅត្រង់ពោះ ធ្វើឲ្យមានអារម្មណ៍មិនសុខស្រួល មានអារម្មណ៍ច្រាលឡើងត្រង់ចំណុចពោះរបស់លោកអ្នក ។

មូលហេតុ៖ ការជញ្ជក់ស្ករគ្រាប់ ឫទំពាស្ករកៅស៊ូ (នាំឲ្យកើនខ្យល់ក្នុងក្រពះពោះវៀន) ញ៉ាំ soda ឫភេសជ្ជៈមានជាតិ carbonated ជក់បារី និងទម្លាប់ញ៉ាំអាហារលឿនពេក ។  ពេលខ្លះប្រភេទចំណីអាហារមួយចំនួនដូចជា fibers និងអាហារមានជាតិស្ករ មិនត្រូវបានរំលាយក្នុងក្រពះ ឬពោះវៀនតូចទេ ប៉ុន្តែត្រូវបានរំលាយក្នុងពោះវៀ​នធំ ដែលជាមូលហេតុនាំឲ្យកើនឡើងឧស្ម័នផងដែរ ។

ការការពារ៖ ប្រសិនបើលោកអ្នកមានការកើនឡើងឧស្ម័នក្នុងក្រពះពោះវៀនញឹកញាប់ លោកអ្នកគប្បីជៀសវាងការញ៉ាំអាហារដែលនាំឲ្យកើនឡើងឧស្ម័ននេះ និងញ៉ាំអាហារយឺតៗដោយទំពារឲ្យម៉ត់ល្អ ។

ការព្យាបាល៖ បញ្ហាឧស្ម័នក្នុងក្រពះពោះវៀនច្រើនពាក់ព័ន្ធនឹងទម្រាប់ក្នុងការរស់នៅប្រចាំថ្ងៃ លោកអ្នកអាចសាកល្បងផ្លាស់ប្ដូរទម្លាប់មួយចំនួនដូចជា៖ ញ៉ាំអាហារយឺតៗ ទំពាឲ្យល្អិត ឈប់ជក់បារី ដើររយៈពេល១៥នាទីក្រោយញ៉ាំអាហាររួច ក្រៅពីនេះលោកអ្នកអាចប្រឹក្សាជាមួយគ្រូពេទ្យជំនាញក្នុងការប្រើប្រាស់ថ្នាំបន្ថែម ៕

អត្ថបទដោយ៖ ហួ​ ភារ៉ា