ផ្អែកទៅតាមការសម្ភាសន៍របស់ក្រុមការងារចាប់បៃតងជាមួយនឹងលោកវេជ្ជបណ្ឌិត ម៉ី សោភ័ណ ឯកទេសខាងផ្នែកសម្ភព និងរោគស្ត្រី ដែលមានបទពិសោធន៍ជិត៦ឆ្នាំ បម្រើការនៅមន្ទីរពេទ្យមិត្តភាពខ្មែរ-សូវៀតបានពន្យល់បង្ហាញឱ្យដឹងថា បញ្ហាសុកពាំងមាត់ស្បូន (Placenta Previa) គឺសំដៅទៅលើបញ្ហាសុកនៅក្នុងស្បូនស្ត្រីមានផ្ទៃពោះ។ ដោយជាធម្មតាសុកត្រូវចាក់ជាប់នៅលើកំពូលស្បូន​ ក៏ប៉ុន្តែចំពោះស្ត្រីមានផ្ទៃពោះដែលកើតបញ្ហានេះ មានសុកមិនទៅចាក់នៅកំពូលស្បូនទេ គឺវាចាក់ជាប់នៅក្បែរៗមាត់ស្បូន ​ឬក៏ពាំងជិតមាត់ស្បូនតែម្ដង។

ជាមួយនឹងបញ្ហាសុកពាំងមាត់ស្បូន ត្រូវបានគេបែងចែកចេញជា ៣ប្រភេទចម្បងៗ ដោយ ប្រភេទទី១ សុកចាក់កៀកនឹងក្បែរមាត់ស្បូន មិនទាន់ចូលដល់មាត់ស្បូនទេ ចំណែកឯប្រភេទទី២ សុកចាក់ជាប់នៅផ្នែកណាមួយនៃមាត់ស្បូន និង ប្រភេទទី៣ គឺចាក់នៅពេញមាត់ស្បូនតែម្ដង (ដែលជាហេតុធ្វើឱ្យស្ត្រីមានផ្ទៃពោះមិនអាចសម្រាលកូនតាមធម្មជាតិបានទេ និងតម្រូវឱ្យវះកាត់ជាចាំបាច់)។

លោកវេជ្ជបណ្ខិតក៏លើកពន្យល់បន្ថែមទៀតថា​ ចំពោះស្រ្តីដែលងាយប្រឈមនឹងកើតបញ្ហាសុកពាំងមាត់ស្បូន ភាគច្រើនជាស្រ្តីដែលគាត់មានប្រវត្តិយកកូនចេញច្រើនដង ស្ត្រីមានផ្ទៃពោះនៅអាយុច្រើន (ចាប់ពីអាយុ ៣៥ឆ្នាំឡើងទៅ) ស្ត្រីដែលមានកូនច្រើន និងស្ត្រីដែលធ្លាប់សម្រាលកូនតាមវិធីវះកាត់។

ជាទូទៅចំពោះរោគសញ្ញាដែលអាចឱ្យដឹងថា ស្រ្តីមានផ្ទៃពោះកើតបញ្ហាសុកពាំងមាត់ស្បូន ក្រុមគ្រូពេទ្យអាចកំណត់បានជាក់លាក់នៅក្នុងពេលស្ត្រីពពោះក្នុងត្រីមាសទី៣ តាមរយៈការពិនិត្យផ្ទៃពោះជាប្រចាំទៅតាមការណាត់របស់ក្រុមគ្រូពេទ្យ។ ម្យ៉ាងទៀតអាចនឹងកើតមានករណីម្តាយជួបប្រទះរោគសញ្ញាផ្ទាល់ ដោយអាចនឹងឈឺចុកត្រង់បរិវេណពោះ មានធ្លាក់ឈាមឥតឈប់ ដោយឈាមនោះមានលក្ខណៈក្រហមស្រស់តែម្តង ដែលក្នុងករណីតម្រូវបញ្ជូនទៅមន្ទីរពេទ្យភ្លាមចៀសវាងម្តាយបាត់បង់ឈាមច្រើនពេក អាចនឹងប៉ះពេលដល់អាយុជីវិត។

អាស្រ័យហេតុនេះហើយ លោកវេជ្ជបណ្ខិតបានណែនាំ ឱ្យស្រ្តីមានផ្ទៃពោះគ្រប់រូប ត្រូវមើលថែសុខភាពផ្ទាល់ខ្លួនដោយយកចិត្តទុកដាក់ និងត្រូវទៅមន្ទីរពេទ្យពិនិត្យផ្ទៃពោះតាមការណាត់របស់គ្រូពេទ្យជាប្រចាំ ក្នុងទិសដៅថែរក្សាសុខភាពម្តាយ និងជំរុញដល់ការលូតលាស់របស់ទារកក្នុងផ្ទៃ បង្ការហានិភ័យប្រឈមផ្សេងៗដែលអាចកើតមានជាយថាហេតុកំឡុងពេលពពោះ និងពេលសម្រាល៕

អត្ថបទដោយ៖ ប៉ែត ធីតា