កន្លងមកឃើញថាផលិតគ្រឿងសម្អាតនិងថែរក្សាសម្រស់ច្រើនប្រេនមែនទែនដែលបាននាំចូលមកពីក្រៅប្រទេសដើម្បីបំពេញតម្រូវការប្រជាជនកម្ពុជា ដោយហេតុថាប្រជាជនយើងជាច្រើនបានងាកមកចាប់អារម្មណ៍និងយកចិត្តទុកដាក់ខ្លាំងទៅលើការថែរក្សាសម្រស់ ហើយក៏ចង់រក្សាក្បួនថែរក្សាសម្រស់ពីបុរាណផងនោះ សហគ្រាសពេញហឫទ័យ ប៉ែន ក៏សម្រេចបង្កើតផលិតផលថែរក្សាសម្រស់ចេញមកពីវត្ថុធាតុដើមក្នុងស្រុករួមទាំងគ្រឿងទេសខ្មែរផងដែរ។
លោក ប៉ែន ប៉ូលី ជាម្ចាស់សហគ្រាស ពេញហឫទ័យ ប៉ែន ដែលជាសហគ្រាសកែច្នៃផលិតផលថែរក្សាសម្រស់ តែ សាប៊ូដុសខ្លួន ឡេលាបស្បែក និងទឹកអប់(រថយន្ត)... ចេញមកពីគ្រឿងទេសខ្មែររួមមានដូចជាស្លឹកគ្រៃគ្រឿង រមៀត ពន្លៃ និងខ្ញីខ្មៅជាដើម។ លោក ប៉ែន ប៉ូលី បានប្រាប់មកក្រុមការងារចាបបៃតងថា មូលហេតុដែលលោកសម្រេចចិត្តបើកសហគ្រាសផលិតគ្រឿងថែរក្សាសម្រស់ តែ និងសាប៊ូនេះឡើង ពីព្រោះលោកឃើញពីទីផ្សារក្នុងប្រទេសកម្ពុជាបច្ចុប្បន្នប្រជាជនទាំងប្រុសនិងស្រីបានងាកមកយកចិត្តទុកដាក់ទៅលើការថែរក្សាសម្រស់ ហើយលោកក៏ចង់ថែរក្សាក្បួនពីដូនតាទុកផងដែរ។ មួយវិញទៀត លោកបានស្រាវជ្រាវឃើញថា គ្រឿងទេសខ្មែរ រួមមានដូចជាស្លឹកគ្រៃគ្រឿង រមៀត ពន្លៃ ខ្ញីខ្មៅ... វាមានអត្ថប្រយោជន៍ច្រើនណាស់។ វាមិនត្រឹមតែអាចយកទៅប្រើប្រាស់ជាគ្រឿងទេសចម្អិនម្ហូបតែប៉ុណ្ណោះទេ ប៉ុន្តែវាមានគុណសម្បត្តិជួយទៅដល់សម្រស់ ព្រមទាំងសុខភាពបានច្រើនថែមទៀតផង។
មួយវិញទៀត លោក ប៉ែន ប៉ូលី បានសិក្សាទៅលើទីតាំងភូមិសាស្រ្តដីនៅក្នុងប្រទេសកម្ពុជាឃើញថាមានសក្តានុពលខ្លាំងសម្រាប់ដំណាំ ស្លឹកគ្រៃគ្រឿង រមៀត ពន្លៃ និងខ្ញីខ្មៅ លោកក៏សម្រេចចិត្តដាំដុះវត្ថុធាតុដើមទាំងនេះ ហើយមួយផ្នែកទៀតលោកក៏បានទទួលទិញវត្ថុធាតុដើមពីប្រជាកសិករខ្មែរដើម្បីមកផលិតផងដែរ។ កាលពីបើកសហគ្រាសដំបូងលោកបានផលិតសាប៊ូដុសខ្លួនដែលកែច្នៃមកពីរមៀត និងស្លឹកគ្រៃ ដោយលោកបានសិក្សាជាមួយអ្នកជំនាញជណជាតិខ្មែរដែលមានការសិក្សានិងបទពិសោធន៍មកពីក្រៅប្រទេសជាច្រើនឆ្នាំ។ ក្រោយមកទៀត លោកក៏បានកែច្នៃផលិតផលថ្មីៗជាបន្តបន្ទាប់ដែលមានដូចជា ឡេលាបស្បែកផលិតពីប្រេងពន្លៃ ស្រ្កាប់ស្បែក ឡេលាបមុខ តែខ្ញីខ្មៅ តែផ្កាស្លឹកគ្រៃ ទឹកអប់សម្រាប់ដាក់ក្នុងរថយន្ត ជាដើម។
ទន្ទឹមនឹងនេះដែរលោក ប៉ែន ប៉ូលី បានរៀបរាប់លម្អិតអំពីផលិតផលដែលកែច្នៃពីគ្រឿងទេសខ្មែររបស់លោកថា ស្រ្កាប់ស្បែក ឡេលាបមុខ ជាមួយនិងឡេលាបស្បែកប្រេងពន្លៃ គឺវាមានអត្ថប្រយោជន៍ជួយចិញ្ចឹមនិងបំប៉នស្បែក ជួយអោយស្បែកមានសំណើមនិងគ្រប់គ្រងជាតិខ្លាញ់ កាត់បន្ថយភាពក្រហមនៃស្បែក ជួយស្រូបជាតិពុលចេញពីស្បែក ជួយប្រឆាំងការរលាកស្បែកដោយសារកំដៅថ្ងៃ ទប់ស្កាត់ភាពជរានៃស្បែក និងប្រឆាំងការកើតមុន អ្វីដែលកាន់តែពិសេសគឺ ពេញហឫទ័យបានបានផលិតគ្រឿងថែរក្សាសម្រស់នេះចេញពីរូបមន្តដើមពីបុរាណមក។
សហគ្រាសខ្មែររូបនេះបានបញ្ជាក់មកកាន់ក្រុមការងារយើងថា បើទោះជាពេលនេះសហគ្រាសពេញហឫទ័យប៉ែនរបស់លោកមិនទាន់ជោគជ័យជាដុំកំភួន ប៉ុន្តែលោកមានមោទនភាពខ្លាំងទៅលើការកែច្នៃគ្រឿងខ្មែរដែលប្រជាជនភាគច្រើនគិតថាគ្មានប្រយោជន៍ឱ្យក្លាយទៅជាផលិតផលដែលមានប្រយោជន៍ មានការទទួលស្គាល់។ ហើយសព្វថ្ងៃនេះលោកមិនត្រឹមតែបានធ្វើឱ្យប្រជាជនខ្មែរស្គាល់ពីគុណភាណផលិតខ្មែរប៉ុណ្ណោះទេ ប៉ុន្តែលោកថែមទាំងបាននាំចេញផលិតផលដែលលោកកែច្នៃទៅក្រៅប្រទេស ហើយមានការសរសើរជាច្រើនទៀតផង។
ជាចុងក្រោយ លោក ប៉ែន ប៉ូលី មានឆន្ទៈយ៉ាងមុតមាំក្នុងការផលិតនិងកែច្នៃគ្រឿងតេសខ្មែរចេញជាផលិតផលថែរក្សាសម្រស់ និងសុខភាព។ ហើយលោកជឿថាប្រជាជនខ្មែរនឹងងាកមកស្វែងយល់កាន់តែច្បាស់ពីការថែរក្សាសម្រស់បែបធម្មជាតិ ផលិលផលខ្មែរ និងគាំទ្រផលិតផលក្នុងស្រុកកាន់តែច្រើនផងដែរ៕
