ប្រាកដណាស់ ទូរស័ព្ទអាចបង្រៀនកូនរបស់អ្នកឱ្យចេះបានច្រើន ប៉ុន្តែឪពុកម្ដាយត្រូវចាំថា រាល់រឿងរ៉ាវជាច្រើននៅក្នុងទូរស័ព្ទក៏មិនប្រាកដថាល្អទាំងអស់នោះដែរ។ ស្រាប់តែឪពុកម្ដាយខ្មែរមួយចំនួនមិនបានយកចិត្តទុកដាក់ខ្វល់ បែរជាយកលេសខ្ជិលមើលកូន ហុចទូរស័ព្ទឱ្យកូនហើយជាការស្រេច។
ឪពុកម្ដាយដែលកំណត់ទេថា ប្រសិនបើកូនលេងទូរស័ព្ទ តើអនាគតរបស់កូននឹងទៅជាយ៉ាងណា? ជាមួយគ្នានេះដែរ តាមការសិក្សារបស់សហរដ្ឋអាមេរិកកន្លងមកបានរកឃើញថា ការចំណាយពេលវេលាដល់ច្រើនទៅលើទូរស័ព្ទទំនើប និងអ៊ិនធឺរណែត គឺកំពុងបង្កបញ្ហាក្នុងការអភិវឌ្ឍន៍ខ្លួនរបស់កុមារ។
ជាមួយគ្នានេះ កុមារដែលវក់លេងទូរស័ព្ទច្រើនលលើសលប់នឹងបង្កឱ្យមានបញ្ហាអភិវឌ្ឍសមត្ថភាពរបស់ខ្លួនរួមមាន៖
‑ធ្វើឱ្យកុមារគេងមិនលក់ ឬរំខានដល់ការគេងរបស់កុមារ
‑ការអភិវឌ្ឍសមត្ថភាពយឺតយ៉ាវលើជំនាញនិយាយ និងសង្គម
‑សុខភាពរាងកាយចុះខ្សោយ
‑មិនមានការជឿជាក់លើខ្លួនឯង និងមានបញ្ហាថប់បារម្ភ
‑ធ្វើឱ្យកុមារមានអារម្មណ៍ឆេវឆាវ
‑ទូរស័ព្ទមានវិទ្យុសកម្មខ្ពស់ ធ្វើឱ្យប៉ះពាល់ដល់កុមារ
យ៉ាងណាមិញ បើនិយាយដល់ទូរស័ព្ទ យើងប្រាកដជានឹកឃើញដល់ Steve Jobs ដែលជាស្ថាបនិករបស់ក្រុមហ៊ុន Apple ដែល Steve Jobs មានប្រសាសន៍ថា ខ្ញុំមិនដែលអនុញ្ញាតឱ្យកូនៗរបស់ខ្ញុំលេង iPad នោះទេ ហើយហេតុផលនេះមកពីខ្ញុំដឹងថា iPad នឹងធ្វើឱ្យមនុស្សឈ្លក់វង្វេង។ នៅពេលនរណាម្នាក់យកវាតាមខ្លួនជានិច្ច នោះអ្នកនឹងញៀនជាមួយឧបករណ៍មួយនេះជាក់ជាមិនខាន ដូច្នេះហើយបានជាខ្ញុំមិនអនុញ្ញាតឱ្យកូនៗរបស់ខ្ញុំប្រើ iPad នោះទេ ព្រោះខ្ញុំដឹងថាកូនរបស់ខ្ញុំនឹងញៀននឹងឧបករណ៍ទំនើបមួយនេះ។
ដូច្នេះឪពុកម្ដាយគ្រប់រូបមិនត្រូវ ធ្វេសប្រហែសចំពោះរឿងមួយនេះទេ ចូរអ្នកត្រូវយកចិត្តទុកដាក់ក្នុងរឿងនេះជាចាំបាច់ កុំយកទូរស័ព្ទមកកំណត់ជោគវាសនារបស់កូនអ្នក។
អត្ថបទស្រាវជ្រាវដោយ៖ម៉ាង វិសិដ្ឋារតន៍