ក្រោយពីការពពោះ៩ខែ១០ថ្ងៃ គឺជាពេលវេលាមួយដែល ម៉ាក់ប៉ាទន្ទឹមរងចាំមើលមុខកូនជាទីស្រឡាញ់​ចាប់ផ្ដើមចេញមកឃើញពន្លឺថ្ងៃ ហើយក៏ជាពេលវេលាមួយដែលម្តាយ ត្រូវប្តូរ ឈាម ប្ដូរកម្លាំង ប្ដូរការឈឺចាប់ ប្តូរជីវិត ឈាមស្រស់ក៏មិនខ្លាចដើម្បីកូនចេញមក។

ផ្សារភ្ជាប់ជាមួយចិត្តផ្ដាច់ប្តូររបស់ម្ដាយ ជាទូទៅការសម្រាលកូនតាមរយៈសម័យថ្មីនេះគឺមានដូចជាការវះកាត់ និងការសម្រាលកូនដោយធម្មជាតិតែម្ដង ​អាស្រ័យលើការសម្រេចចិត្តរបស់ស្រ្តីក៏ដូចជាស្វាមី​ ថាតើ គួរជ្រើសរើសយកវិធីវះកាត់ឬក៏សម្រាលដោយធម្មជាតិ? មួយវិញទៀតគឺអាស្រ័យលើសុខភាពស្រ្តីរួមទាំងកូនក្នុងផ្ទៃដូចគ្នា បើកាលណាមានបញ្ហាណាមួយ ទាក់ទងនិងការសម្រាលក្រុមគ្រូពេទ្យក៏ធ្វើការពន្យល់ហេតុផលទៅក្រុមគ្រួសារ ដើម្បីជ្រើសរើសវិធីសាស្រ្តណាមួយដើម្បីសម្រាលចៀសវាងមានបញ្ហាណាមួយដល់អាយុជីវិត ម្តាយរួមទាំងកូនដូចគ្នា។

តើសម្រាលកូនដោយធម្មជាតិនិងវះកាត់មួយណាល្អជាង??

ជាការពិតណាស់សម្រាលកូនដោយវិធីទាំង២នេះ គឺមានទាំងគុណសម្បត្តិនិងគុណវិបត្តិដូចគ្នា អ៊ីចឹងក្រុមការងារចាបបៃតង សូមលើកយកគុណសម្បត្តិនិងគុណវិបត្តិ នៃការសម្រាលកូនដោយធម្មជាតិ ចែកជូនឱ្យស្រ្តីគ្រប់រូបបានដឹងនេះបើយោងតាមរយៈគេហទំព័រ apollocradle ។

គុណសម្បត្តិ

-ចៀសវាងការបញ្ចូលឈាម ៖ សម្រាប់ស្រ្តីដែលសម្រាលកូនដោយធម្មជាតិគឺមានប្រភេទអរម៉ូន Oxytocin ដែលអរម៉ូននេះមានសមត្ថភាពជួយការពារស្រ្តីពីជំងឺរលាកសួត និងកាត់បន្ថយការបញ្ចូលឈាម

-ជួយពង្រឹងការអភិវឌ្ឍន៍ខួរក្បាលទារក៖ ការសម្រាលកូនដោយធម្មជាតិអាចជួយបង្កើនការផលិត ប្រូតេអ៊ីន ក្នុងខួរក្បាលទារក ដើម្បីអភិវឌ្ឍខួរក្បាលទារក ។ ដូច្នេះការសម្រាលកូនដោយវះកាត់ រាងកាយមិនបានបញ្ចេញ ប្រូតេអ៊ីននេះទេ ជាហេតុនាំឱ្យកុមារបាត់បង់អត្ថប្រយោជន៍ទាំងនេះ

-សម្រាលកូនធម្មជាតិល្អសម្រាប់សុខភាពទារក៖ ជាធម្មតា ទារកដែលកើតដោយការវះកាត់ គឺងាយមានបញ្ហាអាឡែហ្សី ជំងឺហឺត និងងាយឆ្លងរោគជាងទារកកើតដោយធម្មជាតិ

-ទារកដែលសម្រាលចេញដោយធម្មជាតិ មិនសូវមានបញ្ហាផ្លូវដង្ហើម និងប្រព័ន្ធភាពសុំារឹងមាំ និងមិនសូវមានបញ្ហាស្បែក

គុណវិបត្តិ

-ម៉ាក់ៗអាចប្រឈមនឹងការឈឺពោះយូរ​

-ទ្វារមាសអាចមានបញ្ហារហែងក្រោយសម្រាល

-ទារកសម្រាលមកអាចមានការប៉ះទង្គិច ដោយសារការប្រើឧបករណ៍ជំនួយជួយម្ដាយដើម្បីសម្រាល (បូម)

ជារួមមក ការសម្រាលកូនដោយធម្មជាតិគឺមានអត្ថប្រយោជន៍ជួយដល់សុខភាពទារកដែលកើត ជួយឱ្យរាងកាយរឹងមាំ មិនអាចមានបញ្ហាអាឡែហ្សីស្បែក ឬក៏បញ្ហាផ្លូវដង្ហើម រួមទាំងជួយដល់ការអភិវឌ្ឍន៍ខួរក្បាលទារក ជាពិសេសក៏ល្អសម្រាប់សុខភាពរបស់ម្ដាយក្រោយសម្រាលដូចគ្នា គឺឆាប់ចេញពីការសម្រាកនៅមន្ទីរពេទ្យលឿនជាងស្រ្តីសម្រាលដោយវះកាត់ ៕

អត្ថបទដោយ៖ ប៉ែត ​ធីតា