ទម្លាប់ញុំាទឹក១កែវ បន្ទាប់ពីភ្ញាក់ពីគេង គឺជារឿងចាំបាច់ អាចជួយបំពេញជាតិទឹកឱ្យសរីរាង្គភ្លាមៗក្រោយពីត្រូវគេងអស់រយៈពេល៧ ទៅ៨ម៉ោង។

ស្របជាមួយគ្នានេះដែរ នាអំឡុងពេលព្រឹកនេះ គឺជាពេលសំខាន់បំផុតដែលរាងកាយត្រូវការស្រូបយកនូវសារជាតិចិញ្ចឹមល្អ ដើម្បីទៅបំពេញសរីរាង្គទាំងមូល កត្តានេះហើយ ក្រុមការងារចាបបៃតង នឹងលើកយកនូវភេសជ្ជៈសាមញ្ញៗចំនួន៤មុខ មានប្រយោជន៍ធំក្នុងការបំពេញជាតិទឹក ថែរក្សាសុខភាពក្រពះពោះវៀន និងបំប៉នដល់ស្បែក នាពេលព្រឹកព្រលឹម ដោយផ្អែកទៅតាមប្រភព Healthline ៖

១. ទឹកដូង៖ ទឹកដូងមានផ្ទុកអាស៊ីត lauric និងជាប្រភពសារធាតុចិញ្ចឹមដូចជាវីតាមីនA K B ជាមួយនឹងសារធាតុប្រឆាំងអុកស៊ីតកម្មផងដែរ ដោយសារធាតុទាំងនេះ មានប្រសិទ្ធភាពក្នុងការទាញយកជាតិពុលចេញពីរាងកាយ ជួយដល់ការលូតលាស់នៃកោសិកាស្បែក បង្កើនដល់ប្រព័ន្ធភាពសុំារាងកាយ ជួយប្រព័ន្ធរំលាយអាហារ។

២. ទឹកឪឡឹក៖ ក្នុងផ្លែឪឡឹកមានជាតិទឹករហូតទៅដល់៩២% ដែលអាចជួយទប់ស្កាត់អ្នកពីការខ្វះជាតិទឹកបានយ៉ាងល្អ។ ការទទួលទានទឹកឪឡឹកនាពេលព្រឹក ធ្វើឲ្យរាងកាយមានសំណើមគ្រប់គ្រាន់ នជួយឲ្យស្បែកមានសភាពស្រស់ថ្លា និងធ្វើឱ្យដំណើររំលាយអាហារកាន់តែប្រសើរឡើង។

៣. ទឹកប្រទាលកន្ទុយក្រពើ៖ ជាតិទឹកក្នុងទឹកប្រទាលកន្ទុយក្រពើ អាចជួយកាត់បន្ថយការលេចឡើងនៃមុនលើផ្ទៃមុខ ខ្នង ឬស្បែកក្បាល និងព្យាបាលស្លាកស្នាមឱ្យប្រែប្រួលពណ៌ពី១ថ្ងៃទៅ១ថ្ងៃ និងអាចជួយកាត់បន្ថយបញ្ហាស្បែកឡើងជាំក្រហម ពន្យារភាពចាស់ បង្ការកុំឱ្យកើតជំងឺរលាកស្បែក។ ទឹកប្រទាលកន្ទុយក្រពោះ ក៏ជួយបង្កើនបរិមាណទឹកនៅក្នុងពោះវៀន និងកម្ចាត់នូវបាក់តេរីអាក្រក់ដែលនូវតោងជាប់នឹងពោះវៀន ជួយឱ្យសុខភាពពោះវៀនល្អ និងមានតុល្យភាពផងដែរ។

៤. ទឹកបន្លែផ្លែឈើក្រឡុក៖ សាឡាត់+ប៉ោមខៀវ+ចេក+ត្រសក់+ទឹក+ទឹកឃ្មុំ...ផ្សំចូលគ្នានឹងក្លាយជាភេសជ្ជៈល្អបំផុតសម្រាប់អ្នកស្រលាញ់សុខភាព ដោយភេសជ្ជៈមួយមុខនេះ មិនត្រឹមតែជួយបំប៉នស្បែក ថែសុខភាពក្រពះពោះវៀន ប៉ុនណោះទេ គឺវាអាចជាភេសជ្ជៈ១មុខមួយកម្ចាត់នូវសារជាតិពុលមិនល្អ បង្ការបញ្ហាលើសជាតិខ្លាញ់ សម្រួលទៅដល់ប្រព័ន្ធឈាមរត់ និងទប់ស្កាត់ការលើសជាតិស្ករក្នុងខ្លួន។

ជារួមមកវិញ ថ្វីត្បិតតែភេសជ្ជៈខាងលើពិតជាមានប្រយោជន៍នៅក្នុងការជួយទ្រទ្រង់សរីរាង្គកាយទាំងមូលក៏ពិតមែន តែបងប្អូនគួរតែញុំានូវប្រភេទអាហារនាពេលព្រឹកបន្ថែម និងព្យាយាមញុំាឱ្យទៀងពេល ដើម្បីផ្តល់នូវសារជាតិចិញ្ចឹមឱ្យបានគ្រប់គ្រាន់ដល់សរីរាង្គកាយ៕

អត្ថបទដោយ៖ ប៉ាវ ភក្តី