ទឹកដោះគោ ទាល់តែច្របាច់ចេញពីដោះសត្វគោពិតៗឬយ៉ាងណា? ចម្លើយនោះគឺមិនទាំងអស់នោះទេ, បច្ចេកវិទ្យាកាន់តែទំនើប ភាពច្នៃប្រឌិតនៃអាហារក៏កាន់តែកើតមានច្រើនឡើងៗ។ កាលពីមុន យើងធ្លាប់ដឹងថាទឹកដោះគោ ទាល់តែច្របាច់ចេញពីដោះរបស់សត្វគោ ប៉ុន្តែឥលូវនេះយើងអាចរកដោះគោដែលចេញពីរុក្ខជាតិ គ្រាប់ធញ្ញជាតិ និងរបស់ផ្សេងៗជាច្រើនទៀត ដែលមានទាំងអាហាររូបត្ថម្ភ ជំនួយឆ្អឹង ជំនួយសុខភាព មិនចាញ់គោសុទ្ធៗឡើយ។
នៅក្នុងគេហទំព័រសុខភាពដ៏ល្បី Verywellfit បានឱ្យដឹងថា ទឹកដោះគោមិនមែនចេញមកពីគោ តែមួយប្រភេទនោះទេ នៅក្នុងពិភពលោកមានទឹកដោះគោជាច្រើនប្រភេទផ្សេងទៀតដូចជា ទឹកដោះគោសណ្តែក ទឹកដោះគោអាល់ម៉ុន ទឹកដោះគោដូងជាដើម។ ខាងក្រោមនេះ គឺជាអត្ថប្រយោជន៍នៃទឹកដោះគោនីមួយៗ និងចំនួនជាតិស្ករ អាហាររូបត្ថម្ភរបស់ទឹកដោះគោទាំងនោះផងដែរ។
ទឹកដោះគោដូង: ទឹកដោះគោដូង មិនមែនយកចេញពីទឹកដូងទេ, វាគឺជាភេសជ្ជៈវត្ថុរាវ១ប្រភេទដែលចេញពីដូងផ្ទាល់ ហើយវាក៏មិនមែនជាខ្ទិះដូងខាប់ៗដែលអ្នកទិញក្នុងកំប៉ុងនោះទេ។ តាមអ្នកបច្ចេកទេស គេឱ្យឈ្មោះវាថាជាភេសជ្ជៈទឹកដោះគោដូង, ដោយសារមានរសជាតិផ្អែម។ សម្រាប់ទឹកដោះគោដូងនេះ អាចមានជាតិខ្លាញ់ខ្ពស់បើធៀបនឹងទឹកដោះគោផ្សេងទៀត ដូច្នេះបើអ្នកខ្លាចធាត់សូមកុំទទួលទាន។ ប៉ុន្តែប្រសិនបើចូលចិត្តរសជាតិដូង ហើយមិនខ្វល់ពីជាតិខ្លាញ់បន្ថែមនោះ វានឹងក្លាយជាជម្រើសដ៏ល្អបំផុតមួយ ជាពិសេសបើលាយជាមួយកាហ្វេ ឬភេសជ្ជៈក្រឡុក។
នៅក្នុងទឹកដោះគោដូង១កែវ ផ្ទុកទៅដោយ ៧៤កាឡូរី, ខ្លាញ់ ៥ក្រាម, សូដ្យូម ៤៦មីលីក្រាម, កាបូអ៊ីដ្រាត ៧ ក្រាម, ស្ករ ៦ ក្រាម និងប្រូតេអ៊ីន ០,៥ក្រាម។
ទឹកដោះគោអាល់ម៉ុន: ត្បិតតម្លៃទឹកដោះគោអាល់ម៉ុនរាងខ្ពស់បន្តិច ប៉ុន្តែវាពិតជាសក្តិសមបំផុតសម្រាប់ការញ៉ាំជាប្រចាំ ព្រោះវាផ្សំឡើងពីគ្រាប់ធញ្ញជាតិអាល់ម៉ុន ដែលគ្មានជាតិផ្អែម ធ្វើឱ្យធាត់ឬឡើងគីឡូឡើយ។ វាមានរសជាតិឈ្ងុយបន្តិច ប៉ុន្តែរសជាតិស្រាលគួរសម, មានកាឡូរីទាប និងមានរសជាតិឆ្ងាញ់ពិសេស។
ជាមួយគ្នានេះដែរ ទឹកដោះគោអាល់ម៉ុនម៉ាកមួយចំនួន អាចមានជាតិកាល់ស្យូម និងប្រូតេអ៊ីនទាប អ៊ីចឹងពេលទិញបងប្អូនត្រូវមើលលើសំបកដបផង ថាប្រូតេអ៊ីន និងកាល់ស្យូមរបស់វាខ្ពស់ដែរឬទេ? ជារួម ទឹកដោះគោអាល់ម៉ុនអាចជម្រុញការជំនួយឆ្អឹងបានខ្ពស់, ជំនួយដល់សុខភាពបេះដូង, ជំនួយសុខភាពស្បែកភ្លឺ ពន្យារភាពចាស់ពីខាងក្នុងដោយវីតាមីនអ៊ីនៅក្នុងអាល់ម៉ុន ព្រមទាំងការពារជំងឺAutoimmune ថែមទៀតផង។
ទឹកដោះគោ អ៊ូត (Oat Milk): ទឹកដោះគោ Oat បានក្លាយជាជម្រើសទឹកដោះគោថ្មីមួយទៀតកំពុងផ្ទុះប្រជាប្រិយភាពជុំវិញពិភពលោក ដោយសារតែវាត្រូវបានផលិតចេញពីoats ដែលល្អបំផុតដល់សុខភាពបេះដូង និងពោះវៀន។ វាមានជាតិសរសៃធម្មជាតិច្រើនជាងជម្រើសទឹកដោះគោផ្សេងទៀត។ លើសពីនេះ វាផ្ទុកទៅដោយសារធាតុចិញ្ចឹម និងមានកាល់ស្យូមដល់ទៅ២៥% នៃបរិមាណដែលរាងកាយយើងត្រូវការជាប្រចាំថ្ងៃ។
ប៉ុន្តែ ប្រសិនបើអ្នកកំពុងសម្រកគីឡូ បរិមាណoat ដែលមាននៅក្នុងទឹកដោះគោនេះអាចនឹងមានជាតិកាបូអ៊ីដ្រាតខ្ពស់ជាងទឹកដោះគោគ្រាប់ធម្មតា ដែលអ្នកអាចញ៉ាំទឹកដោះគោនេះរួចមិនគួរញ៉ាំប្រភេទកាបូអ៊ីដ្រាតប្រភេទផ្សេងៗទៀតឡើង ដើម្បីកុំឱ្យកើនឡើងកាបូអ៊ីដ្រាតឌុប ងាយឱ្យមានបញ្ហាពិបាកសម្រកគីឡូ ឬគាំងគីឡូជាដើម។ ប៉ុន្តែបើអ្នកមិនមែនជាអ្នកសម្រកគីឡូទេ ទឹកដោះគោ១ប្រភេទនេះ គឺល្អបំផុតសម្រាប់ការបំពេញកាល់ស្យូមឱ្យរាងកាយ។
តើបងប្អូនចូលចិត្តទឹកដោះគោ១ប្រភេទណាក្នុងចំណោមទឹកដោះគោទាំង៣ប្រភេទខាងលើ? អាចចែករំលែកឱ្យអេតមីនដឹងផងបានទេ? បើស្រលាញ់សុខភាពឆ្អឹង ស្រលាញ់ខ្លួនឯង កុំភ្លេចមើលថែរបបអាហារ ហាត់ប្រាណ ការគេង និងគ្រប់គ្រងផ្លូវចិត្តឱ្យបានល្អជាប្រចាំណា៕
អត្ថបទដោយ៖ កញ្ញា លីហួយ