សុខភាពជារឿងសំខាន់សម្រាប់ការរស់នៅរបស់មនុស្សម្នាក់ៗ។ ពិសេសអ្នកត្រូវសាងទម្លាប់ល្អជាប្រចាំថ្ងៃ ដើម្បីបង្កើនឱ្យអាយុវែង និងកុំឱ្យឈឺច្រើន។ ថ្ងៃនេះ យើងសុំលើកពីទម្លាប់ល្អពីអ្នកឧញ្ញ៉ាគួច ម៉េងលី ដើម្បីបំប៉នសុខភាពឱ្យរឹងមាំ និងរស់នៅបានយូរ។ តើអ្នកចង់បានទេ? នេះជាទម្លាប់សាមញ្ញៗ ដែលធ្វើឱ្យមនុស្សគ្រប់គ្នាអាចធ្វើបាន៖

១. រក្សាជាតិទឹកឱ្យបានគ្រប់គ្រាន់ក្នុងរាងកាយ

មានមនុស្សភាគច្រើនបានមើលរំលងការញ៉ាំទឹកនេះ ការញ៉ាំទឹកមិនគ្រប់នេះ វាធ្វើឱ្យមានបញ្ហាដល់ស្បែក និងសុខភាពផងដែរ។ សូម្បីលោកវេជ្ជបណ្ឌិត គួច ម៉េងលី​ មានប្រសាសន៍ថា “អ្នកដែលខ្វះជាតិទឹក និងពិសារទឹកមិនបានគ្រប់គ្រាន់ ធ្វើឱ្យស្បែកអ្នកចាស់ជាងវ័យ និងខូចសុខភាព ហើយអ្នកគួរញ៉ាំទឹកមួយថ្ងៃបីលីត្រ ទៅបួនលីត្របានហើយ។” ទម្លាប់មួយនេះ ងាយណាស់ គ្រាន់តែអ្នកញ៉ាំទឹកឱ្យបានច្រើន អ្នកច្បាស់ជាប្លែកអារម្មណ៍ដោយខ្លួនឯង។ ពីព្រោះរាងកាយរបស់យើង ត្រូវការជាតិទឹក ៧០%ឯណោះ។

២. ពង្រឹងរាងកាយឱ្យរឹងមាំ

យើងបានឃើញថា មានប្រជាជនខ្មែរមួយចំនួនមិនសូវធ្វើលំហាត់ប្រាណទេ នេះជាហេតុឱ្យប្រជាជនខ្មែរ ឆាប់ដុះក្បាលពោះ និងឆាប់មានជំងឺ ឬខ្សោយបេះដូងក្នុងការផលិតឈាមផងដែរ។ តាមលោកវេជ្ជបណ្ឌិត គួច ម៉េងលី បានមានប្រសាសន៍ថា ពេលវេលាសម្រាប់ហាត់ប្រាណឱ្យបានល្អ នៅពេលព្រឹកម៉ោង ៥ និងម៉ោង ៦ព្រឹក ចំណែកពេលល្ងាចនៅម៉ោង ៤ ទៅដល់ ៥ ម៉ោង។ ពីព្រោះខ្លួនយើងត្រូវការបម្លែងវិតាមីនD ទៅជាកាលស្យូម ដើម្បីឱ្យឆ្អឹងរឹងមាំ។ ការហាត់ប្រាណ អ្នកអាចដើរ រត់តិចៗ... ជាវិធីល្អសម្រាប់គាំទ្រដល់សុខភាព និងចាប់ពី ៣០ ទៅ៤០ នាទីបានហើយ។”

៣. ការជ្រើសរើសអាហារ

តាមគេហទំព័រ Visit Okinawa Japan បានចុះផ្សាយថា អ្នករស់នៅឱ្យមានអាយុវែង ភូមិអូជីមីក ដែលមានរបបអាហារ ដែលមានផ្ទុកនូវសារធាតុចិញ្ចឹមជាច្រើនពីប្រភពផ្សេងៗគ្នា ដូចជាសាច់សត្វ (ប្រូតេអ៊ីនសត្វ) បន្លែ តែបៃតង និងផ្លែឈើក្រូច ហើយមានអាហារធម្មជាតិច្រើនទៀតសម្រាប់ជីវិតរសនៅទីនោះ។ ហើយពួកគាត់មានពេលវេលាហូបអាហារទៀងពេល និងមិនហូបអាហារពេលយប់ជ្រៅទេ។ តាមលោកវេជ្ជបណ្ឌិត គួច ម៉េងលី បានមានប្រសាសន៍ថា ការហូបអាហារពេលយប់ពេក ជាពេលវេលាមួយ ដែលធ្វើឱ្យអ្នកឆាប់ឡើងគីឡូ និងបង្កជំងឺ។ ពីព្រោះថា ពេលយើងហូបរួច មិនបានបញ្ចេញចលនា ហើយដេកលក់ នេះជាមូលហេតុធ្វើឱ្យអ្នកឡើងគីឡូ។ ចន្លោះពេលអ្នកគួរហូបអាហារមុនចូលដេក ចាប់ពី៣ ទៅ ៤ ម៉ោង ដើម្បីក្រពះធ្វើដំណើរការរំលាយបានល្អ។” យល់ល្អ អ្នកគួរឈប់ញ៉ាំត្រឹម៨ ឬម៉ោង៩ យប់ជាការល្អបំផុត ដើម្បីឱ្យព្រះដំណើរការបានល្អបំផុត៕

អត្ថបទដោយ៖ ទ្រ សុភាព