ប្រព័ន្ធរំលាយអាហារ គឺជាតួឯកសំខាន់ក្នុងកាបំបែករាល់អាហារដែលយើងញុំាចូលទៅ និងចម្រាញ់នូវសារធាតុចិញ្ចឹមផ្សេងៗ ដើម្បីបំពេញទៅតាមផ្នែកនៃសរីរាង្គកាយ។ ដោយឡែកក្នុងលក្ខខណ្ឌប្រសិនបើយើងញុំាដោយពុំមានការយកចិត្តទុក បែកចែកឱ្យច្បាស់លាស់នូវក្រុមអាហារល្អ និងមិនល្អសម្រាប់សុខភាពទេ ជាលទ្ធផលដែលទទួលរងដំបូងនោះ គឺប្រព័ន្ធនឹងរងនូវជំងឺផ្សេងៗដូចជា រលាកក្រពះពោះវៀនរុំារ៉ៃ ឬអាចឈានដល់ដំណាក់កាលមហារីកក៏មានផងដែរ។

កត្តានេះដែរ ដើម្បីបង្ការនូវកុំឱ្យកើតនូវបញ្ហាជំងឺប្រព័ន្ធរំលាយអាហារណាមួយ ប្រភព everydayhealth បានប្រាប់នូវគន្លឹះថែប្រព័ន្ធរំលាយចំនួន៥ដែលមនុស្សគ្រប់រូបគួរអនុវត្តន៍ជាប្រចាំ៖

១. ញ៉ាំអាហារមានជាតិសរសៃខ្ពស់៖ យោងតាម ​​Maria Adams ជាសាស្ត្រាចារ្យផ្នែកអាហារូបត្ថម្ភនៅមហាវិទ្យាល័យ Endicott ក្នុងទីក្រុង Beverly រដ្ឋ Massachusetts បាននិយាយឱ្យដឹងថា ការទទួលទានអាហារដែលមានជាតិសរសៃខ្ពស់ដូចជា គ្រាប់ធញ្ញជាតិ បន្លែ និងផ្លែឈើ អាចធ្វើឱ្យការរំលាយអាហាររបស់យើងប្រសើរឡើង និងមានសុខភាពល្អ។ នេះ គឺដោយសារតែរបបអាហារមានជាតិសរសៃខ្ពស់ ជួយឱ្យអាហារផ្លាស់ទីតាមបំពង់រំលាយអាហារបានល្អ សម្រួលដល់ដំណើរការំលាយ ជួយការពារកុំឱ្យកើតជំងឺក្រពះពោះវៀនផ្សេងៗ និងទប់ស្កាត់ការកើតជំងឺឫសដូងបាតផងដែរ។

២. ញុំាអាហារសម្បូរសារជាតិប្រូបាយអូទិក៖ សារជាតិប្រូបាយអូទិក គឺជាប្រភេទបាក់តេរីល្អដែលចូលទៅជួយទ្រទ្រង់សុខភាពពោះវៀន ដោយការប្រយុទ្ធប្រឆាំងនឹងផលប៉ះពាល់នៃរបបអាហារមិនល្អ ឬការប្រើថ្នាំអង់ទីប៊ីយោទិច និងភាពតានតឹង។ ជាទូទៅសារជាតិមួយប្រភេទនេះ ភាគច្រើនអាចរកឃើញនៅក្នុងអាហារមួយចំនួនដូចជា យ៉ាអួ ទឹកដោះគោ គីមឈី និង sauerkraut...ជាដើម។

៣. ញ៉ាំតាមកាលវិភាគ៖ វេជ្ជបណ្ឌិត Adams ក៏និយាយបន្ថែមដែរថា ការទទួលទានអាហារ តាមកាលវិភាគទៀងទាត់ អាចជួយរក្សាប្រព័ន្ធរំលាយអាហារឱ្យស្ថិតក្នុងទម្រង់ល្អ។ ដូច្នេះ សម្រាប់បុគ្គលគ្រប់រូបគួរមានទម្លាប់ ញុំាអាហារពេលព្រឹក អាហារថ្ងៃត្រង់ អាហារពេលល្ងាច ឬអាចបន្ថែមនូវអាហារសម្រន់តិចតួចបន្ថែមទៀត នៅចន្លោះម៉ោងអាហារទៅតាមពេល។

៤. រក្សាជាតិទឹក៖ ការផឹកទឹកច្រើន គឺល្អសម្រាប់សុខភាពរំលាយអាហារ និងជួយបន្ទន់លាមក ដោះស្រាយបញ្ហាទល់លាមក បន្ទោរបង់មិនទៀតទាត់។

៥. ធ្វើលំហាត់ប្រាណ និងបន្ធូរភាពតានតឹង៖ ការធ្វើលំហាត់ប្រាណទៀងទាត់ អាចជួយឱ្យអាហារផ្លាស់ទីតាមប្រព័ន្ធរំលាយអាហារបានល្អ កាត់បន្ថយការទល់លាមក។ ក្នុងចំណុចនេះ​ ភាគច្រើនអ្នកជំនាញណែនាំនៅពេលក្រោយញុំាអាហារ អ្នកគួរតែព្យាយាមដើរតិចៗឬធ្វើសកម្មភាពមួយចំនួនដែលជួយដល់ការរំលាយ ប្រសើរជាជាងនៅមួយកន្លែង។ បន្ថែមជាមួយគ្នានេះ ការដែលទម្លាប់ហាត់ប្រាណជារៀងរាល់ព្រឹកល្ងាច ក៏ជាផ្នែកមួយចំនួនបន្ធូរភាពតានតឹង និងជួយពង្រឹងប្រព័ន្ធភាពសុំាឱ្យរឹងមាំបន្ថែមផងដែរ។

គួរបន្ថែមនូវប្រសាសន៍របស់វវេជ្ជបណ្ឌិត អ៊ាង សុខា ឯកទេសជំងឺឈាម និងមហារីក ឱ្យដឹងទៀតដែរថា ចំពោះចំណីអាហារដែលមានជាតិប្រៃខ្ពស់ បណ្ដាលឱ្យងាយកើតហានិភ័យជំងឺពោះវៀនធំផងដែរ បើធៀបនឹងអ្នកញុំាចំណីអាហារដែលមានជាតិអំបិលទាប។

ដូច្នេះកុំចូលចិត្តពិសារអំបិលពេល ដូចជាសម្ល មានដាក់ប្រហុក អំបិលប្រៃហើយ មានទឹកជ្រលក់ទឹកត្រីម្ទេសបន្ថែមទៀត គ្រោះថ្នាក់អាចធ្វើឱ្យកោសិការបសើយើងប្រែប្រួលទៅជាកោសិកាមហារីក។ ជាក់ស្តែងបើតាមស្ថិតិនៃក្រុមមនុស្សកើតជំងឺមហារីកពោះវៀនច្រើនជាងគេនៅលើពិភព គឺប្រទេសជប៉ុនដោយសារជប៉ុនចូលចិត្តញុំាជាប្រភេទត្រីប្រឡាក់ច្រើន ដោយសារត្រីប្រឡាក់មានជាតិប្រៃ៕

អត្ថបទដោយ៖ ប៉ាវ ភក្តី