បញ្ហាធុំក្លិនមាត់ជារឿងមួយដែលបានជួបប្រទះជាប្រចាំក្នុងជីវភាពរស់នៅប្រចាំថ្ងៃ ហើយត្រូវបានចាត់ទុកមានសារៈសំខាន់ក្នុងការប្រាស្រ័យទាក់ទង និងជាគុណតម្លៃនៃភាពស្អាតរបស់មនុស្ស។ ៨៥% នៃបញ្ហានេះ មានប្រភពមកពីក្នុងមាត់ និងមានកត្តាផ្សេងៗគ្នាផងដែរ។

ជាមួយគ្នានេះមន្ទីរពេទ្យកាល់ម៉ែតក៏បានបង្ហាញកត្តាមួយចំនួនដែលបណ្តាលឱ្យមានបញ្ហាក្លិនមាត់៦យ៉ាងដែលកើតឡើងដោយសារបញ្ហាក្នុងមាត់។

១. ដោយសារការធ្វើអនាម័យមាត់ធ្មេញមិនបានល្អ

២. កត្តាធ្មេញ

- មានធ្មេញពុកខូច ធ្មេញពុកប្រហោង ធ្មេញសល់ឫស

- ធ្មេញថ្គាមទាល់ ដែលពិបាកសំអាត និងងាយជាប់ចំណី

- ធ្មេញមានបំណះប៉ះរយៈពេលយូរឆ្នាំ

- ធ្មេញដាក់ ឬស្រោបធ្មេញ ជ្រាបទឹក

- ធ្មេញដាក់ប្រភេទជ័រ

- ធ្មេញបង្ករោគកខ្ទុះ

៣. កត្តាអញ្ចាញ

- មានកំណកកំបោរតាមជើងធ្មេញ

- មានការរលាកអញ្ចាញ ហូរខ្ទុះ

- មានជំងឺអញ្ចាញផ្សេងៗ

៤. កត្តាធ្មេញដាក់

- ការដាក់ធ្មេញមិនត្រឹមត្រូវតាមបច្ចេកទេស

- មានដក់ចំណីក្រោមធ្មេញដាក់ជាប់

- ការប្រើសម្ភារៈធ្វើធ្មេញមិនល្អ

- ការប្រើរយៈពេលយូរ នាំឲ្យមានជ្រាបទឹក

៥. កត្តាអណ្ដាត

- មានផ្សិតលើអណ្ដាត

- មានមេរោគតោងលើអណ្តាត

៦. កត្តាផ្សេងៗក្នុងមាត់

- អ្នកជំងឺស្ងួតមាត់

- មានរលាក ឬដំបៅផ្សេងៗក្នុងមាត់

- ការពាក់ឧបករណ៍ផ្សេងៗក្នុងមាត់ដូចជា ឧបករណ៍ពត់តម្រង់ធ្មេញ ឧបករណ៍គេងស្រមុក ក្រៅពីនេះនៅមានកត្តាផ្លូវដង្ហើមនិងកត្តាផ្សេងៗទៀតផងដែរ។ យ៉ាងណាមិញខាងក្រោមនេះគឺជាវិធីសាស្រ្តក្នុងការគ្រប់គ្រងក្លិនមាត់។

ដំបូងគឺត្រូវព្យាបាលមូលហេតុពិតប្រាកដ (ការធ្វើរោគវិនិច្ឆ័យពីទន្តបណ្ឌិត), ជៀសវាងម្ហូបចំណីដែលមានក្លិនខ្លាំងដូចជា ខ្ទឹមស ខ្ទឹមបារាំង......., ជៀសវាងទម្លាប់ការជក់បារី និងការផឹកស្រា, ញ៉ាំអាហារឲ្យទៀងពេល, ដុសសម្អាតធ្មេញក្រោយបរិភោគរួច, ធ្វើការថែទាំនូវសុខភាពមាត់ធ្មេញឲ្យបានល្អជាប្រចាំ, ដុសសម្អាតធ្មេញនឹងអណ្ដាតមុនពេលចូលគេង, រក្សាសំណើមក្នុងមាត់ ញ៉ាំទឹកឱ្យបានគ្រប់គ្រាន់, ប្រសិនបើមានធ្មេញដោះដាក់ សូមដោះចេញនៅពេលយប់ និងត្រាំក្នុងទឹកខ្ពុលមាត់ Chlorhexidine, ណាត់ជួបទន្តបណ្ឌិត ២ដងក្នុង១ឆ្នាំ ដើម្បីពិនិត្យ និងសម្អាតធ្មេញលោកអ្នក។

ដូចនេះសូមបងប្អូនថែរក្សាសុខភាពមាត់ធ្មេញឱ្យបានល្អ ដោយមានការពិគ្រោះយោបល់ជាមួយនឹងគ្រូពេទ្យជំនាញ៕