បញ្ហាសុខភាពមាត់ធ្មេញរបស់មនុស្សនាសម័យបច្ចុប្បន្ន កើតមានឡើងស្ទើរតែគ្រប់គ្នាទៅហើយដោយ អ្នកខ្លះដង្កូវស៊ីធ្មេញ ឈឺអញ្ជាញធ្មេញ​​ ពុកធ្មេញ ជាពិសេសគឺកើតមានបញ្ហាក្លិនមាត់ដោយគ្មានមូលហេតុ ធ្វើឱ្យគ្មានទំនុកចិត្តក្នុងការនិយាយស្ដី​ និងប៉ះពាល់ដល់អារម្មណ៍យ៉ាងខ្លាំង។ តើកត្តាទាំងអស់នេះមកពីមូលហេតុអ្វី?

តាមការចែករំលែករបស់ អ្នកឧកញ៉ា​វេជ្ជបណ្ឌិត គួច ម៉េងលី បានឱ្យដឹងថា​ មូលហេតុនាំឱ្យខូចធ្មេញមានក្លិនមាត់មិនល្អនេះ វាមានកត្តាជាច្រើនដូចជា​ ការជក់បារី​ ផឹកកាហ្វេ មិនសូវផឹកទឹកបានគ្រប់គ្រាន់ ដំបៅអញ្ចេញធ្មេញ មិនសូវដុះធ្មេញសម្អាតធ្មេញបានល្អ ជាហេតុនាំឱ្យធ្មេញកើតទៅជាកំណកក្រាមរឹងៗបង្កពីអាហារដែលយើងញុំាចូលទៅនៅជាប់ធ្មេញ។

អ្នកឧកញ៉ាវេជ្ជបណ្ឌិតបានបន្តថា បញ្ហាមួយទៀតដែលនាំឱ្យក្លិនមាត់ គឺមកពីមានបញ្ហាក្រពះ ដូចជាញុំាអាហារចូលទៅមានភើឡើងមកវិញ ដោយសារក្រពះមានបញ្ហាមិនងាយនឹងកិន​អាហារភ្លាមៗ ពេលដែរញុំាចូលទៅ ទុកយូរៗអាស៊ីតក្នុងក្រពះក៏បញ្ចេញមក ជាហេតុធ្វើឱ្យមានការភើក៏បង្កទៅជាបញ្ហាក្លិនមាត់។ ជាងនេះទៀតសោត ប្រសិនបើយើងព្យាយាមដុះធ្មេញសម្អាតធ្មេញហើយ នៅតែមានក្លិនមាត់ទៀត​​មាន​ន័យថា អ្នកមានបញ្ហាក្រពះហើយ។

សម្រាប់ការព្យាបាលបញ្ហាមានក្លិនមាត់នេះ អ្នកឧកញ៉ាវេជ្ជបណ្ឌិតបន្ថែមថា ប្រសិនបើធ្មេញមានបញ្ហាដង្កូវស៊ីតិចតួច គួរប្រញាប់ទៅព្យាបាល ឬក៏ប៉ះធ្មេញឱ្យទាន់ពេលចៀសវាងដង្កូវស៊ីធ្មេញកាន់តែធំពុកធ្មេញ​ បង្កឱ្យមានការឈឺចាប់ ឈឺក្បាលឈានដល់ការដកធ្មេញចោលក៏មាន ហើយព្យាយាមដុះធ្មេញ៣ដងក្នុងមួយថ្ងៃ។

មួយវិញទៀតពេលដុះធ្មេញកុំដុះខ្លាំងៗពេកដុះកុំបង្ខំលឿនៗ វាមិនបានជួយឱ្យធ្មេញស្អាតទេ​ ថែមទាំងនាំឱ្យខូចធ្មេញថែម និងកុំភ្លេចឧស្សាហ៍ដូរច្រាស់ដុះធ្មេញ៣ខែម្ដងផង ដោយកុំទិញច្រាស់ដុះធ្មេញណាដែលរឹងពេក ទន់ពេក។ ជាមួយគ្នានេះ គួរព្យាយាមទៅពិនិត្យធ្មេញឱ្យបាន៦ខែម្ដង ដើម្បីដឹងថា ធ្មេញខូច រលាកអញ្ជាញ ឬប្រហោងធ្មេញ ដើម្បីងាយស្រួលព្យាបាលទាន់ពេលវេលា។

ទន្ទឹមនឹងនេះផងដែរ តាមរយៈប្រភពបន្ថែម colgate បានលើកយកអាហារដែលជួយធ្មេញឱ្យរឹងមាំល្អ ចៀសវាងជំងឺផ្សេងៗដោយអាហារទាំងនោះមានដូចជា៖

១. ផ្លែប៉ោម៖​ យើងបានដឹងហើយថា ការញុំាអាហារដែលមានជាតិផ្អែម ​វាបណ្ដាលឱ្យខូចធ្មេញ ប៉ុន្ដែផ្លែឈើដូចជាផ្លែប៉ោមនេះ មានសារជាតិស្ករធម្មជាតិ ជាតិសរសៃ និងជាតិទឹកខ្ពស់ ហេតុនេះការញ៉ាំផ្លែប៉ោមមួយផ្លែក្នុងមួយថ្ងៃ គឺវាជួយផលិតទឹកមាត់ លាងជម្រះបាក់តេរី និងភាគល្អិតដែលបង្កពីការញុំាអាហារ។

២. ការ៉ុត៖ ការទទួលទានការ៉ុតឆៅមួយមើមតូចមួយ វាជួយបង្កើនការផលិតទឹកមាត់ កាត់បន្ថយហានិភ័យនៃប្រហោងធ្មេញ។ ទន្ទឹមនឹងជាតិសរសៃខ្ពស់ដែលមានក្នុងការ៉ុតផ្ទាល់ គឺជាប្រភពដ៏ប្រសើរនៃវីតាមីន អេ ជួយពង្រឹងទៅដល់សុខភាពធ្មេញ។

៣.ទឹកដោះគោជូរ៖ ទឹកដោះគោជូរមានជាតិកាល់ស្យូម និងប្រូតេអ៊ីនខ្ពស់ ដែលក្លាយជាជម្រើសដ៏ល្អជួយឱ្យមានថាមពល និងសុខភាពធ្មេញ។ ជាងនេះទៀត ប្រូបាយអូទិក ឬបាក់តេរីល្អ មានប្រយោជន៍ ដែលមាននៅក្នុងទឹកដោះគោជូរ ក៏ផ្តល់អត្ថប្រយោជន៍ដល់អញ្ចាញធ្មេញ។ ដូច្នេះ ប្រសិនបើអ្នកជ្រើសទឹកដោះគោជូរញុំា សូមជ្រើសរើសប្រភេទធម្មតាដែលគ្មានជាតិស្ករបន្ថែម។

៤.ស្លឹកបៃតង៖ ខាត់ណា ស្ពៃ ត្រសក់… ពោរពេញដោយវីតាមីន សារធាតុរ៉ែ និងមានកាឡូរីទាប។ វាជួយដល់សុខភាពមាត់ និងជាតិកាល់ស្យូម ជួយឱ្យអញ្ចាញធ្មេញរបស់អ្នករឹងមាំ។

៥.ឈីស៖ ការសិក្សាមួយដែលត្រូវបានចេញផ្សាយនៅក្នុងខែឧសភា ឆ្នាំ ២០១៣ បានរកឃើញថាការញ៉ាំឈីស បង្កើន pH នៅក្នុងមាត់ និងកាត់បន្ថយហានិភ័យនៃការពុកធ្មេញ។ សារធាតុនៅក្នុងឈីស ជួយបង្កើនទឹកមាត់ និង​ពង្រឹង​ស្រទាប់​ធ្មេញផងដែរ៕

អត្ថបទដោយ៖ ប៉ែត ធីតា