យោងទៅតាមការចែករំលែករបស់លោកវេជ្ជបណ្ឌិត ថន វុត្ថា ជាវេជ្ជបណ្ឌិតឯកទេស ជំងឺទឹកនោមផ្អែម និងក្រពេញអ័រម៉ូន នៃមន្ទីរពេទ្យ ដឹប្រេស្ទីហ្ស៍ មកកាន់ Healthy Cambodia បានឱ្យដឹងថា អាហារដែលយើងញ៉ាំប្រចាំថ្ងៃ ពិតជាមានសារៈសំខាន់ ក្នុងការគ្រប់គ្រងកម្រិតជាតិស្ករនៅក្នុងឈាមសម្រាប់អ្នកមានជម្ងឺទឹកនោមផ្អែម។

តាមពិតទៅ ទាំងអ្នកជម្ងឺទឹកនោមផ្អែម និងមនុស្សទូទៅសុទ្ធតែមានភារៈកិច្ចក្នុងការយកចិត្តទុកដាក់លើរបបអាហាររបស់ខ្លួន ដែលធ្វើឱ្យមានសុខភាពល្អ។ ការកំណត់របបអាហារ មានភាពកម្រិតខុសៗគ្នាអាស្រ័យទៅលើ ប្រភេទនៃជម្ងឺទឹកនោមផ្អែម (ទឹកនោមផ្អែមប្រភេទទី១ ប្រភេទទី២ ឬនៅលើស្ត្រីមានផ្ទៃពោះជាដើម) និងអាស្រ័យទៅលើស្ថានភាពនៃអ្នកជម្ងឺ (អ្នកជម្ងឺកំពុងសម្រាកព្យាបាលនៅមន្ទីរពេទ្យ អ្នកជម្ងឺកំពុងប្រើប្រាស់អាំងស៊ុយលីនជាដើម)។

ខាងក្រោមនេះ គឺការណែនាំទូទៅ អំពីអាហារ ដែលនាំអោយមានសុខភាពល្អ៖

－គប្បីទទួលទានអាហារឱ្យបានទៀងទាត់ ពោលគឺទៀងទាំងពេលវេលា និងបរិមាណនៃការញ៉ាំ។ ជាពិសេសអ្នកជម្ងឺទឹកនោមផ្អែម ដែលកំពុងព្យាបាលដោយថ្នាំគ្រាប់ ឬដោយចាក់អាំងស៊ុយលីន ងាយប្រឈមទៅនឹងគ្រោះថ្នាក់នៃការធ្លាក់ចុះជាតិស្ករ ប្រសិនបើការទទួលទានមិនទៀងទាត់នោះ។

－គប្បីកាត់បន្ថយអាហារដែលសម្បូរណ៍ ជាតិស្ករ (កាបូអ៊ីដ្រាត)។ ជាតិស្ករ គឺជាប្រភពដ៏សំខាន់នៅក្នុងការផលិតថាមពលសម្រាប់រូបរាង្គកាយ។ ជាតិស្ករ (កាបូអ៊ីដ្រាត) អាចមានប្រភពពី បន្លែ ផ្លែឈើ គ្រាប់ធញ្ញជាតិ សណ្តែក និងផលិតផលទឹកដោះ (dairy products) ជាដើម។ ម្យ៉ាងទៀតជាតិស្ករ ក៏អាចមានប្រភពពី ស្ករបន្ថែម នំធុង អាហារដែលផលិតពីរោងចក្រ និងភេសជ្ជៈថាមពល កំប៉ុងៗជាដើម។ អ្នកជម្ងឺគប្បី ចៀសវាងប្រភេទស្ករចុងក្រោយនេះអោយបានច្រើនជាទីបំផុត។

－គប្បីកាត់បន្ថយខ្លាញ់គ្រប់ប្រភេទ នៅក្នុងការចំអិនម្ហូបអាហារ និងប្តូរទម្លាប់ប្រើបាស់ខ្លាញ់មិនល្អ ជំនួសដោយប្រេងរុក្ខជាតិឬប្រេងអូលីវ ជាដើម។ ខ្លាញ់ល្អសម្រាប់សុខភាព មាននៅក្នុងត្រីគ្រប់ប្រភេទនិងផ្លែបឺជាដើម។ ត្រូវជៀសវាងពិសារ ខ្លាញ់ឆ្អែត (Saturated fat) ដែលមានប្រភពពី ខ្លាញ់សត្វ (Animal source) សាច់គោ សាច់ក្រក ហតដក និងសាច់បាខុន បឺ (Butter) និងឈីស ប្រេងដូង (Coconut and palm kernel oils) ព្រមទាំង ប្រភេទខ្លាញ់ Trans fat ដែលមាននៅក្នុងអាហារកំប៉ុង អាហារបំពង ដូចជា ភីហ្សា មាន់បំពង ជាដើម។

－គប្បី ទទួលទានអាហារដែលមានជាតិសសៃច្រើន ឧទាហរណ៍ ដូចជា ស្ពៃ បន្លែបៃតង ដំឡូងឈើ និងសណ្តែក ជាដើម។ អាហារដែលមានសារជាតិសសៃច្រើននោះ ជួយកាត់បន្ថយការស្រូបជាតិស្ករលឿនចូលទៅក្នុងឈាម។

－គប្បី កាត់បន្ថយជាតិប្រៃក្នុងម្ហូបអាហារ។ មនុស្សទូទៅគប្បីកំណត់បរិមាណញ៉ាំចូល នៃសូដ្យូម (sodium intake) អោយបានតិចជាង ២,៣០០ មីលីក្រាមក្នុងថ្ងៃ ដែលប្រហាក់ប្រហែលទៅហ្នឹង មួយស្លាបព្រាកាហ្វេក្នុងមួយថ្ងៃ។

អាស្រ័យហេតុនេះហើយ ដើម្បីគ្រប់គ្រងជាតិស្ករអោយបានល្អ អ្នកជម្ងឺទឹកនោមផ្អែម ត្រូវជួបជាមួយគ្រូពេទ្យឯកទេស ឬអ្នកឯទេសខាងចំណីអាហារ ដើម្បីទទួលបានការប្រឹក្សា និងរបៀបប្រើប្រាស់តារាងអំពីចំណីអាហារផ្សេងៗទៀត ដែលសម្បូរនៅក្នុងប្រទេសកម្ពុជាយើង៕