កាលពីប្រធានបទមុខបងប្អូនបានដឹងថា បញ្ហាសុកពាំងមាត់ស្បូន គឺសំដៅទៅលើបញ្ហាសុកនៅក្នុងស្បូនស្ត្រីមានផ្ទៃពោះ ដោយមានសុកមិនទៅចាក់នៅកំពូលស្បូនទេ គឺវាចាក់ជាប់នៅក្បែរៗមាត់ស្បូន ​ឬក៏ពាំងជិតមាត់ស្បូន។ យ៉ាងណាមិញថ្ងៃនេះផងដែរ Healthy Cambodia នឹងលើកយកនូវចំណេះដឹងបន្ថែមដែលបានចែករំលែកដោយលោកវេជ្ជបណ្ឌិត ម៉ី សោភ័ណ្ឌ ឯកទេសខាងផ្នែកសម្ភព និងរោគស្ត្រី បម្រើការនៅមន្ទីរពេទ្យមិត្តភាពខ្មែរ-សូវៀត បង្ហាញពីបញ្ហាដែលស្ត្រីពពោះមានបញ្ហាសុកពាំងស្បូនអាចនឹងជួបប្រទះចំពោះសុខភាពម្តាយ និងទារកក្នុងផ្ទៃ។

ដោយលោកវេជ្ជបណ្ឌិតបានពន្យល់ឱ្យដឹងថា សម្រាប់ស្ត្រីពពោះតាមដានសុខភាពពិនិត្យឃើញថា គាត់ជិតគ្រប់ខែហើយមានបញ្ហាសុកពាំងមាត់ស្បូន គឺវាមិនបណ្ដាលឱ្យកូនមានបញ្ហាអ្វីទេ គ្រាន់តែគម្រាមកំហែងឱ្យគាត់សម្រាលកូនមុខខែ ធ្វើឱ្យកូនកើតមកមិនគ្រប់គីឡូ។

ប៉ុន្តែក្នុងករណី នៅពេលស្ត្រីមានផ្ទៃពោះមកពិនិត្យ ហើយឃើញថា មានបញ្ហានេះ ក្រុមគ្រូពេទ្យ និងព្យាយាមព្យាបាលតាមរយៈការឱ្យថ្នាំដើម្បីទប់ឱ្យកូនកើតទៅតាមពេលកំណត់។ ដោយឡែក ប្រសិនបើ ការព្យាបាលដោយថ្នាំទប់មិនជាប់ អាចនឹងឈានដល់ការវះកាត់ជួយឱ្យម្តាយសម្រាលមុនថ្ងៃខែកំណត់។

លោកវេជ្ជបណ្ឌិតក៏បានបញ្ជាក់ផងដែរថា ក្នុងករណីគ្រោះថ្នាក់ខ្លាំងបំផុតនោះគឺចំពោះស្ត្រីមានផ្ទៃពោះដែលពុំសូវយកចិត្តទុកដាក់លើការតាមដានសុខភាព មិនបានពិនិត្យអេកូអ្វីសោះ ដោយសារតែខ្លួននូវតំបន់ឆ្ងាយពេក ប្រសិនបើជួបបញ្ហាធ្លាក់ឈាមច្រើនពេក ទម្រាំបញ្ជូលមកដល់កន្លែងមានដែលសេវាសង្ក្រោះ អាចនឹងប៉ះពាល់ដល់អាយុជីវិតម្តាយ និងទារកដែរ។

យ៉ាងណាមិញ ចំពោះផលប៉ះពាល់ត្រូវគេបែងចែកចេញជា២ ដោយទី១ សំដៅទៅលើកូនអាចនឹងកើតមកមិនគ្រប់ខែ ទី២ ម្តាយប្រឈមនឹងបញ្ហាធ្លាក់ឈាមខ្លាំងពេក ពិបាកក្នុងការសង្គ្រោះរឿងដែលក្រុមគ្រូពេទ្យត្រូវជ្រើសរើសនោះ គឺជួយម្តាយមុននឹងជួយកូន ដោយត្រូវវះឱ្យកូនកើតមុនខែ ខ្ទង់ប្រហែលចន្លោះពី៣២ ទៅ៣៤សប្តាហ៍ ឬប្រសិនបើមានក៏អាចករណីសង្គ្រោះមួយ គឺក្រុមគ្រូពេទ្យត្រូវសម្រេចចិត្តសង្គ្រោះម្តាយ៕