ក្រូចច្របាច់មិនថាជា ពណ៌ខៀវ ឬលឿននោះទេ សុទ្ធតែផ្ទុកទៅដោយសារជាតិវីតាមីនCយ៉ាងសម្បូរបែប ដោយសារជាតិវីតាមីន Cនេះហើយអាចអត្ថប្រយោជន៍ខ្លាំងណាស់នៅក្នុងការជួយបំប៉នសរីរាង្គកាយស្ទើរតែគ្រប់ផ្នែកទាំងអស់។

តួយ៉ាងបើផ្អែកទៅតាមប្រភពចេញផ្សាយរបស់គេហទំព័រ Healthline បានលើកឡើងឱ្យដឹងថា នៅក្នុងផ្លែក្រូចមួយផ្លែ មានផ្ទុកនៅសារជាតិប្រតេអ៊ីន វីតាមីន ជាតិសរសៃ ប៉ូតាស្យូម និងម៉ាញ៉េស្យូម ដោយសារធាតុនេះទាំងនេះអាចជំនួយដល់សរីរាង្គកាយបានយ៉ាងច្រើន។ ជាទូទៅទឹកក្រូចច្របាច់ ត្រូវបានគេណែនាំឱ្យទទួលទានក្នុងបរិមាណត្រឹមតែ១កែវក្នុង១ថ្ងៃដែលចំណុះ២៤០មីលីត្រ។ ចំពោះ ពេលវេលាសមស្របបំផុតក្នុងការផឹកទឹកក្រូចច្រកាច់ គឺចាប់ពី ១ទៅ២ ម៉ោងក្រោយអាហារពេលព្រឹក ដែលជាពេលរាងកាយមិនឆ្អែតពេក ឬឃ្លានពេក ដើម្បីធ្វើឱ្យប្រព័ន្ធរំលាយអាហារដំណើរបានល្អក្នុងការស្រូបយកសារជាតិចិញ្ចឹមទៅបំពេញសរីរាង្គកាយ។

លក្ខណៈល្អទាំងនេះ នឹងជួយជុលកោសិការាងកាយដែលខូចខាត រួមទាំងការងារកុំឱ្យកើតជំងឺចំនួន៥មុខសំខាន់ៗ៖

១. ក្រួសក្នុងតម្រងនោម៖ គ្រួសក្នុងតម្រងនោម គឺជាកំណកសារធាតុរ៉ែតូចៗដែលកកកុញនៅក្នុងតម្រងនោម ដោយជារឿយៗបណ្តាលឱ្យមានរោគសញ្ញាដូចជា ការឈឺចាប់ធ្ងន់ធ្ងរ ចង្អោរ ឬមានឈាមនៅក្នុងទឹកនោម។ ដូច្នេះ ការទទួលទឹកក្រូចច្របាច់ អាចបង្កើន pH ទឹកនោម ធ្វើឱ្យកាន់តែមានអាល់កាឡាំង អាចជួយការពារគ្រួសក្នុងតម្រងនោម។ មានការសិក្សាមួយទៅលើមនុស្សជិត ២សែននាក់ ត្រូវបានគេរកឃើញថា អ្នកដែលទទួលទានទឹកក្រូចយ៉ាងហោចណាស់ម្តងក្នុង១ថ្ងៃមានហានិភ័យនៃការវិវត្តទៅជា ជំងឺគ្រួសក្នុងតម្រងនោមត្រឹមតៗ ១២%ប៉ុនណោះ បើធៀបទៅនឹងអ្នកដែលបានផឹកម្តងក្នុងសប្តាហ៍ និងអ្នកមិនផឹកសោះគឺមានហានិភ័យកើតជំងឺប្រភេទនេះខ្ពស់ជាង។

២. រក្សាសុខភាពបេះដូង៖ ជំងឺបេះដូង គឺជាបញ្ហាធ្ងន់ធ្ងររបស់ពិភពលោកដែលមានមនុស្សស្ទើរតែជាង១៧លាននាក់ត្រូវបានស្លាប់ដោយសារជំងឺនេះជារៀងរាល់ឆ្នាំ។ ស្របជាមួយគ្នានេះ នៅក្នុងប្រធានបទសិក្សាពីការទទួលទានទឹកក្រូចស្រស់ ត្រូវបានអ្នកជំនាញរកឃើញលក្ខណៈពិសេសមួយទៀត ដោយសារធាតុក្នុងទឹកក្រូចស្រស់នេះ អាចកាត់បន្ថយកត្តាហានិភ័យនៃការកើតជំងឺបេះដូង ទប់ស្កាត់ការកើនឡើងសម្ពាធឈាម និងកូលេស្តេរ៉ុលក្នុងខ្លួន ដោយហេតុផលទាំងនេះ គឺអាចជួយរក្សាបេះដូងឱ្យកាន់តែមានសុខភាពល្អ និងរឹងមាំ។

៣. បន្ថយការរលាក៖ សារប្រឆាំងអុកស៊ីតកម្ម និងវីតាមីនC ដែលមានក្នុងផ្លែក្រូច នឹងចូលទៅជួយពង្រឹងប្រព័ន្ធភាពសុំារាងកាយឱ្យកាន់តែរឹងមាំជួសជុលកោសិកាដែលកំពុងសឹករិចរឹល ការងារកុំឱ្យរាងកាយងាយឆ្លងនូវមេរោគបាក់តេរីផ្សេងដោយងាយ។ លក្ខណៈប្រឆាំងទៅនឹងការរលាកនេះផងដែរ គឺវាអាចទប់ស្កាត់បញ្ហានៃការវិវត្តទៅជាជំងឺមហារីក និងជំងឺរលាករុំារ៉ៃផ្សេងទៀតផង។

៤. ថែរក្សាសុខភាពស្បែក៖ សុខភាពស្បែកត្រូវបានលូតលាស់យ៉ាងល្អ ដោយសារតែកម្រិតជម្រុញរបស់សារធាតុវីតាមីន C នឹងធ្វើឱ្យសារធាតុវីតាមីនE ដែលមាននៅក្នុងខ្លួនរបស់យើងដំណើរការកាន់តែប្រសើរ។ លក្ខណៈដោះណើរការនេះ នឹងថែសុខភាពស្បែកឱ្យចៀសបញ្ហារលាករោលផ្សេងៗ មិនងាយឡើងមុន ជួយជម្រុះកោសិកាងាប់ ជួយជុលកោសិកាកំពុងខូចខាត និងពន្លឿនកការលូតលាស់កោសិកាថ្មី ដើម្បីធ្វើឱ្យសុខភាពស្បែកកាន់តែល្អប្រសើរពីមួយថ្ងៃទៅមួយថ្ងៃ។

គួសបញ្ជាក់បន្ថែមផងដែរថា សម្រាប់អ្នកមានបញ្ហាក្រពះពោះវៀន គួរព្យាយាមញុំាក្នុងបរិមាណតិចតួចក្រោយពេលញុំាអាហារ។ ចំណែកឯអ្នកមានសុខភាពទូទៅវិញ គួរចៀសវាងការញុំាទឹកក្រូចច្របាច់ពេលពោះទទេរ ព្រោះអាចនឹងធ្វើឱ្យកើនឡើងជាតិអាស៊ីត ជាពិសេសនៅពេលព្រឹកតែម្តង៕

អត្ថបទដោយ៖ ប៉ាវ ភក្តី