ផ្នែកវេជ្ជសាស្រ្ត មន្ទីរពេទ្យ ឱសថស្ថានព្រមទាំងបុគ្គលិកផ្នែកសុខាភិបាលគ្រប់ផ្នែក គឺជាតម្រូវការចាំបាច់បំផុតក្នុងអំឡុងពេលនេះ, ដោយឡែកកូវីដ១៩រាតត្បាតភ្លាមៗដែលមិនទាន់មានអ្នកអាចរកដំណោះស្រាយឃើញនៅឡើយទេ ចំណែកឯអាជីវកម្មផ្នែកសុខាភិបាលវិញក៏ត្រូវត្រៀមខ្លួនច្រើនដែរ ដើម្បីប្រយុទ្ធឱ្យឈ្នះវីរុសនេះ។ ថ្ងៃនេះក្រុមការងារចាបបៃតងនឹងលើកយកពីរបៀបនៃការធ្វើការរបស់ឱសថការីនៅក្នុងប្រទេសកាណាដា ថាតើអំឡុងកូវីដ១៩នេះគែធ្វើអ្វីខ្លះ ដើម្បីពង្រឹងវិស័យឱសថ។

ការងារចម្បងបំផុតរបស់ឱសថការីនៅប្រទេសកាណាដា គឺការបម្រើសេវាកម្មឱសថតាមរយៈ ទូរគមនាគមន៍សុខភាព(TeleHealth) និងថ្នាំអេឡិចត្រូនិច(TeleMedecine)។ ដោយសារតែកូវីដមិនអាចមានការប្រាស្រ័យទាក់ទងគ្នាបានល្អ ឱសថការីគ្រប់រូបត្រូវទុកការងារបម្រើសេវាកម្ម តាមTeleHealthជាការងារចម្បង, ដែលរួមបញ្ចូលទាំងការផ្តល់ការប្រឹក្សាយោបល់សុខភាព, ការពិគ្រោះស្ថានភាពជំងឺ និងជួយរួមចំណែកបណ្តុះបណ្តាលចំណេះដឹងជុំវិញជំងឺកូវីដ១៩ទៅកាន់ប្រជាពលរដ្ឋដើម្បីឱ្យពួកគេបានសិក្សាស្វែងយល់និងត្រៀមខ្លួនការពារ នេះបើតាមការចុះផ្សាយរបស់ Journal of Pharmaceutical Policy and Practice ។

ប្រភពដដែលបាន បង្ហាញទៀតថា បុគ្គលិកឱសថការីបានដើរតួនាទីយ៉ាងសំខាន់ក្នុងការ សម្របសម្រួលព័ត៌មានជាមួយស្ថាប័នសុខាភិបាលដែលពាក់ព័ន្ធ ដូចជាសិក្សាពីជំងឺកូវីដ១៩, ការប្រើប្រាស់ថ្នាំរបស់អ្នកជំងឺកូវីដ, ស្ថានភាពជំងឺរបស់បុគ្គលនីមួយៗ និងបញ្ជូនព៍ត៌មានទៅខាងលើដើម្បីប្រាកដចិត្តអ្នកជំងឺកូវីដដែលព្យាបាលដោយខ្លួនឯងប្រើប្រាស់ថ្នាំបានត្រឹមត្រូវនិងតាមដានសកម្មភាពៗផ្សេង ក៏ដូចជាសម្របសម្រួលឱ្យអ្នកមិនទាន់ឆ្លងប្រើប្រាស់ថ្នាំថែរក្សាសុខភាពបានត្រឹមត្រូវអំឡុងពេលជាមួយគ្នានេះ។

លើសពីនេះ ឱសថការីនិងឱសថស្ថានក៏ត្រូវបានគេចាត់ទុកជាចំណែកយ៉ាងសំខាន់ក្នុងការទ្រទ្រង់សុខភាពប្រជាជនអំឡុងពេលមានវិបត្តិសុខភាពសាកលនេះ។ ដោយឡែកប្រទេសកម្ពុជាវិញ ទោះបីមិនទាន់មានហានិភ័យធ្ងន់ធ្ងរដូចបរទេសអំឡុងពេលកូវីដ១៩នេះ តែប្រសិនបើយើងអាចរៀនសូត្រតាមប្រទេសអភិវឌ្ឍទៅលើយុទ្ធសាស្រ្តខាងលើ នោះប្រហែលជាអាចជួយប្រជាជនក្នុងការថែទាំសុខភាពបានកាន់តែច្រើន ហើយអាជីវកម្មក៏នឹងនៅតែអាចដើរទៅមុខទោះបីកូវីដរាតត្បាតក៏ដោយ៕

ចុះបងប្អូនអ្នកអានវិញយល់យ៉ាងណាចំពោះការធ្វើការរបស់ឱសថការីនៅប្រទេសកាណាដា? តើចង់ឱ្យឱសថការីកម្ពុជាយើងធ្វើបែបណាដែរ?

អត្ថបទដោយ៖ កញ្ញា​ លីហួយ