ស្រ្តីជាច្រើនគាត់តែងតែយល់ថាការចុកពោះឬឈឺចាប់ពេលមករដូវ គឺមកពីទម្លាប់របស់មនុស្សម្នាក់ៗ។ ផ្ទុយទៅវិញ ការចុកពោះឬឈឺចាប់ពេលមករដូវវាមិនមែនជាទម្លាប់នោះទេ គឺវាបណ្តាលមកពីបញ្ហាខ្សោយស្បូន។ អ្នកអាចចំណាំមើលបានអំឡុងពេលមករដូវឬមុនមករដូវ២ទៅ៣ថ្ងៃអ្នកតែងតែមាន អាការចុកចង្កេះ ចុកពោះ(ថ្ងាសក្រោម) ជាប្រចាំនេះបញ្ជាក់ថាស្បូនរបស់អ្នកកំពុងតែខ្សោយខ្លាំងហើយ ប្រញាប់រកវិធីដោះស្រាយ បើទុកបែបនេះយូរវាអាចបណ្តាលទៅជាជំងឺផ្សេងៗបាន។
ជាការពិតណាស់ យោងតាមការបញ្ជាក់ពីគេហទំព័រ healthshots បានឱ្យដឹងថាស្បូនជាសារពាង្គធំនិងសំខាន់បំផុតសម្រាប់ស្រ្តីម្នាក់ៗ ពីព្រោះនៅថ្ងៃខាងមុខស្រ្តីគ្រប់រូបចៀសមិនផុតទេពីការមានកូន ស្បូនជាកន្លែងចិញ្ចឹមកូនរបស់អ្នក។ ដូច្នេះប្រសិនកាលណាស្បូនរបស់អ្នកខ្សោយ អាចធ្វើឱ្យអ្នកមានអត្រាខ្ពស់ក្នុងការគ្មានកូន ឬប្រសិនបើមានកូនក៏សុខភាពមិនល្អដែរ។ ដូច្នេះស្រ្តីត្រូវយកចិត្តទុកដាក់ថែទាំស្បូនឱ្យមានសុខភាពល្អ តាមរយៈការញ៉ាំអាហារជំនួយដូចជា បន្លែបៃតង ផ្លែឈើ ជាពិសេសរឿងដែលអ្នកមិនអាចខ្វះបាននោះគឺត្រូវមានទម្លាប់ធ្វើលំហាត់ប្រាណជំនួយឱ្យទៀងទាត់ ដើម្បីពង្រឹងសុខភាពស្បូនឱ្យរឹងមាំ និងការពារជំងឺផ្សេងៗផងដែរ។
យ៉ាងណាមិញ លំហាត់ប្រាណបែប យូហ្គា គឺជាលំហាត់ប្រាណល្អបំផុតសម្រាប់សុខភាពស្បូនរបស់ស្រ្តីគ្រប់រូប ជាពិសេសគឺហាត់ទៅតាមក្បាច់ទាំង៥ខាងក្រោម៖
១. ក្បាច់ Baddha Konasana (Cobbler Pose)៖ ក្បាច់នេះអ្នកគួរហាត់នៅពេលល្ងាច របៀបក្នុងការហាត់ ដំបូងត្រូវអង្គុយឱ្យត្រង់ខ្នង បន្ទាប់មកដាក់បាតជើងទាំង២របស់អ្នកទល់គ្នា រួចឱនមុខទៅមុខឱ្យទល់ទៅនឹងឥដ្ឋឬកម្រាលរយៈពេល១នាទី។ ក្បាច់នេះជួយឱយសាច់ដុំស្បូនរបស់អ្នកមានចលនា និងជួយឱ្យស្បូនរឹងមាំឈ្នះជំងឺផ្សេងៗផងដែរ។
២. ក្បាច់ Hanumanasna (Front Split Pose)៖ ក្បាច់នេះគួរហាត់ពេលល្ងាច របៀបក្នុងការហាត់ ដំបូងត្រូវអង្គុយឱ្យត្រង់ខ្នង រួចសណ្ដូកជើងត្រង់ ហើយកន្ធែកចេញពីគ្នាឱ្យតឹងសរសៃរយៈពេល១នាទី។ ហាត់ដំបូងៗអ្នកមិនគួរព្យាយាមកន្ធែកជើងធំពេកទេ តែព្យាយាមកន្ធែកទៅតាមសរសៃរបស់អ្នកដែលអាចយឺតបាន។
៣. ក្បាច់ Paschimottanasana (Seated Forward Fold)៖ ក្បាច់នេះហាត់ពេលល្ងាចដូចគ្នា របៀបក្នុងការហាត់ ដំបូងត្រូវអង្គុយឱ្យត្រង់ខ្នង រួចសណ្ដូកជើងទៅមុខ បន្ទាប់មកយកដៃទាំងពីររបស់អ្នកទៅឈោងកាន់ប្រអប់ជើងរយៈពេល១នាទី។
៤. ក្បាច់ Setu Bandhasana (Bridge Pose)៖ ក្បាច់នេះហាត់ពេលល្ងាច របៀបក្នុងការហាត់ ដំបូងត្រូវដេកឱ្យត្រង់ខ្លួន រួចបញ្ឈរជង្គង់ទាំង២ បន្ទាប់មកពើងផ្នែកខ្លួនឡើងទៅលើ(ធ្វើដូចរូប) ចំណែកដៃទាំង២ត្រូវដាក់នៅពីក្រោមខ្លួនដែលពើង ធ្វើបែបនេះរយៈពេល២០វិនាទី។
៥. ក្បាច់ KapalBhati Pranayama៖ ហាត់ពេលល្ងាច ក្បាច់នេះហាត់ចុងក្រោយគេក្នុងចំណោមក្បាច់ទាំង៥ ជាក្បាច់សម្រួលអារម្មណ៍និងសរសៃឱ្យដើរស្រួលបន្ទាប់ពីយើងហាត់ក្បាច់ទាំង៤ខាងលើរួច។ របៀបក្នុងការហាត់ ដំបូងអ្នកអង្គុយឱ្យត្រង់ខ្នង ដាក់ជើងដូចរូប រូចដាក់ដៃទាំង២លើជើង បិទភ្នែក តាំងអារម្មណ៍ឱ្យស្ងប់ ដកដង្ហើមចូលចេញឱ្យវែងៗ ធ្វើបែបនេះរយៈពេល១នាទីជាការស្រេច។
សរុបមកក្បាច់ទាំង៥នេះ អ្នកចំណាយពេលហាត់ត្រឹមតែ៤:២០នាទីប៉ុណ្ណោះ ត្រូវហាត់ឱ្យបានទៀងទាត់រាល់ថ្ងៃ ពេលវេលាដែលល្អគឺហាត់នៅពេលល្ងាចចន្លោះម៉ោង៥ដល់ម៉ោង៨គឺទទួលបានលទ្ធផលល្អបំផុត។
គូសបញ្ជាក់ផងដែរថា ក្បាច់ទាំង៥ខាងលើវាអាចមើលទៅសាមញ្ញ ប៉ុន្តែអ្នកត្រូវចាំថា គ្រប់លំហាត់ប្រាណទាំងអស់ ក្បាច់នីមួយៗនៅក្នុងលំហាត់ប្រាណនោះសុទ្ធតែមានប្រយោជន៍ផ្សេងៗ។ លើសពីនេះទៀត លំហាត់ប្រាណស្បូនគឺមិនតម្រូវឱ្យអ្នកហាត់បែបធ្ងន់ៗឬបញ្ចេញញើសខ្លាំងនោះទេ ប៉ុន្តែទាមទារឱ្យអ្នកធ្វើកាយវិការច្រើនពាក់ព័ន្ធទៅនឹងតំបន់ស្បូន និងក្បាលពោះ៕
អត្ថបទដោយ៖ មឿន គន្ធា