អាហារពេលព្រឹកពិតជាមានសារសំខាន់ខ្លាំងណាស់ សម្រាប់សុខភាព អត់អាហារពេលព្រឹកអាចធ្វើឱ្យអ្នកប្រឈមនឹងជំងឺច្រើនមុខ ដូចជាជំងឺលើសឈាម បេះដូង ខ្សោយខួរក្បាល ការចងចាំចុះខ្សោយជាដើម។

អាស្រ័យហេតុនេះហើយ កុំរំលងមិនញុំាអាហារពេលព្រឹក។ ជាពិសេសត្រូវជ្រើសរើសអាហារញុំាពេលព្រឹកឱ្យបានត្រឹមត្រូវព្រោះបើអាហារមិនល្អ ក៏អាចធ្វើឱ្យអ្នកប្រឈមខូចសុខភាពវិញដូចគ្នា ជាពិសេសឡើងគីឡូតែម្ដង។

ខាងក្រោមនេះគឺជាអាហារពេលព្រឹកដែលអ្នកគួរចៀសវាងនិងកាត់បន្ថយ

១.នំបុ័ងសាច់/សាច់ក្រក៖ ​សាច់​កែច្នៃដាក់ក្នុងនំបុ័ងជាប្រភព​នៃ​ខ្លាញ់​ឆ្អែត និង​សូដ្យូម។ សូដ្យូមខ្ពស់ក្នុងសាច់ក្រកកែច្នៃខ្ពស់អាចធ្វើឱ្យសម្ពាធឈាមកើនឡើង, ប្រសិនបើអ្នកមានជំងឺលើសឈាម វាអាចបង្កើនហានិភ័យនៃជំងឺដាច់សរសៃឈាមខួរក្បាលផងដែរ។ នៅក្នុងនោះសារធាតុ Nitrates និង nitrites ដែលគេរកឃើញនៅក្នុងសាច់កែច្នៃឬសាច់ក្រក បានផ្សារភ្ជាប់ទៅនឹងការកើនឡើងហានិភ័យនៃជំងឺមហារីកមួយចំនួនផងដែរ។ សាច់កែច្នៃ សាច់ក្រក មិនមែនជាអាហារពេលព្រឹកដ៏ល្អនោះឡើយ។ជាពិសេសងាយនឹងធ្វើឱ្យអ្នកប្រឈមលើសខ្លាញ់និងជាតិស្ករក្នុងរាងកាយ ក៏ដូចជាឡើងគីឡូលឿនផងដែរ។

១.យកកាហ្វេជាអាហារពេលព្រឹក៖ ទម្លាប់ខុសដែលមនុស្សជាច្រើនធ្វើរាល់ថ្ងៃគឺទទួលទានកាហ្វេជាអាហារពេលព្រឹក ហើយជាកាហ្វេដែលបន្ថែមជាតិផ្អែមខ្លាំងថែមទៀត។ កាហ្វេល្អសម្រាប់សុខភាព ប៉ុន្តែជាប្រភេទកាហ្វេដែលមិនបន្ថែមជាតិស្ករ ទឹកដោះគោខាប់ ឬគ្រីមនោះទេ។ តាមការចែករំលែករបស់អ្នកឧកញ៉ា វេជ្ជបណ្ឌិតគួច ម៉េងលី បានណែនាំកាហ្វេដែលល្អ មិនមានហានិភ័យច្រើនដល់សុខភាព ដូចជាកាហ្វេខ្មៅ កាហ្វេអ៊ិចស្ព្រេសូ កាពូឈីណូ ដែលដាក់ប្រើស្ករឬជាតិផ្អែមទាប។ ជាពិសេសងាយនឹងធ្វើឱ្យអ្នកប្រឈមលើសជាតិស្ករក្នុងរាងកាយ ក៏ដូចជាឡើងគីឡូផងដែរ។

៣.អាហារមានជាតិផ្អែមនិងសូដា៖ យោងតាមរយៈប្រភព everydayhealth បានឱ្យដឹងថាអ្នកជំងឺទឹកនោមផ្អែមគួរតែចៀសវាងអាហារដែលមានជាតិស្ករនិងជាតិសូដាខ្ពស់ ព្រោះអាចធ្វើឱ្យលើសជាតិស្ករនៅក្នុងឈាមច្រើនអាចបង្កជាហានិភ័យដល់សុខភាព។ cជាពិសេសសម្រាប់អ្នកមានសុខភាពធម្មតាគួរតែព្យាយាមកាត់បន្ថយដូចគ្នា ព្រោះវាអាចបង្កឱ្យសុខភាពរបស់អ្នកកាន់តែខូច ជាពិសេសផឹកពេលព្រឹកងាយឡើងគីឡូផងដែរ៕