បច្ចុប្បន្ន ប្រភេទផលិតផលហ្វាយប័រ និងអាហារបំប៉នជាច្រើន ហាក់មានការបង្ហាញខ្លួនលើទីផ្សារ។ មានបងប្អូនមួយចំនួនធំមានការយល់ច្រលំថា ឱ្យតែមានបញ្ហាពិបាកបត់ជើង តែងតែគិតថាខ្លួនឯងមានជំងឺឫសដូងបាត។ ហេតុនេះនាំគ្នាទិញអាហារបំប៉ន ហ្វាយប័រមួយចំនួនទទួលទាន ទាំងមិនបានធ្វើរោគវិនិច្ឆ័យបានត្រឹមត្រូវពីគ្រូពេទ្យជំនាញ។

ផ្អែកតាមការចែករំលែកពី លោកវេជ្ជបណ្ឌិត ម៉ៅ ម៉េងលន់ ជាវេជ្ជបណ្ឌិតឯកទេសជំងឺទូទៅនិងឫសដូងបាត ព្រមទាំងជាប្រធានមន្ទីរពិគ្រោះនិងព្យាបាលជំងឺម៉ៅ ម៉េងលន់ បានឱ្យដឹងថា រាល់ការពិបាកបត់ជើងទាំងអស់មិនមែនសម្គាល់ថាកើតជំងឺឫសដូងបាតនោះទេ អាចមកពីបញ្ហាសុខភាពផ្សេងៗ កត្តាចំណីអាហារ កត្តាមិនសូវទទួលទានជាតិកាកសរសៃច្រើន មិនសូវទទួលទានទឹកជាដើម។

រីឯចំពោះអាហារបំប៉ន និងហ្វាយប័រចំនួន ដែលគេផលិតសម្រាប់ព្យាបាលឫសដូងបាត លោកវេជ្ជបណ្ឌិតបានពន្យល់ថា អាហារបំប៉ន និងហ្វាយប័រទាំងនោះ គេច្រើនផលិតចេញពីពពួកកាកសរសៃ ហ្វាយប័រ ឬពីគ្រាប់ធញ្ញជាតិ និងវត្ថុធាតុដើមមួយចំនួនទៀត។ ហេតុនេះពេលទទួលទាន វានឹងជួយឱ្យស្រួលបត់ជើង។ សម្រាប់អាហារបំប៉នដែលព្យាបាលឫសដូងបាត អត្ថប្រយោជន៍របស់វាមានសកម្មភាពតិចតួច ជួយធ្វើឱ្យសរសៃឈាមវៀនឫសដូងបាតរួមតូច និងងាយស្រួលបត់ជើង។

តើអាហារបំប៉នអាចព្យាបាលឫសដូងបាតឱ្យជាដាច់ដែលឬទេ? លោកវេជ្ជបណ្ឌិត សុំឆ្លើយថាការព្យាបាលរបស់វាគឺមិនច្បាស់លាស់នោះទេ។ ដោយសារអាហារបំប៉នមានសកម្មភាពតិចតួចបំផុត ដែលអាចឱ្យសរសៃវែនឫសដូងបាតរួមតូច និងងាយស្រួលបត់ជើង។ ហេតុនេះប្រសិនបើប្រើអាហារបំប៉ន ភាគច្រើនត្រូវប្រើជាប់រហូត នៅពេលញ៉ាំធូរ ពេលឈប់ញ៉ាំ ហើយ អាការពិបាកបត់ជើងងាយត្រឡប់មកវិញដដែល។ ខុសពីការព្យាបាលឫសដូងបាតតាមបែបវេជ្ជសាស្ត្រ ដូចជាការចងឱ្យជ្រុះឫសដូងបាត និងការចាក់ឱ្យជ្រុះជាដើម ដែលវាអាចព្យាបាលជា។

តើការទទួលទានហ្វាយប័រ អាចមានគ្រោះថ្នាក់ដល់សុខភាពដែរឬទេ? លោកវេជ្ជបណ្ឌិត ម៉ៅ ម៉េងលន់ បានបកស្រាយថាទទួលទានផលិតផលហ្វាយប័រក្នុងរយៈយូរជាប្រចាំ អាចធ្វើឱ្យ Prestartic ដែលមាននៅក្នុងពោះវៀនថយចុះ ។ Prestartic ជារំញ័រដែលធ្វើសកម្មភាពរុញលាមក និងផោម ឱ្យចេញមកក្រៅ។ ហេតុនេះមិនថាហ្វាយប័រ អាហារបំប៉ន និងថ្នាំពេទ្យក៏ដោយ មិនណែនាំឱ្យទទួលទានច្រើន និងយូរពេកនោះទេ បើគ្មានការគ្រប់គ្រងនិងមានវេជ្ជបណ្ឌិតត្រឹមត្រូវ។ ការដែលប្រើច្រើនពេក Prestartic រឹតតែថយនឹងធ្វើឱ្យខ្សោយពោះវៀន ប្រើកាន់តែយូរប្រៀបបានដូចជាថ្នាំញៀន បើមិនប្រើគឺមិនបត់ជើង។

ដោះស្រាយដែលល្អបំផុត គួរទទួលទានអាហារសម្បូរជាតិកាកសរសៃឱ្យបានច្រើន ប្រសិនបើមានការពិបាកបត់ជើងខ្លាំង គួរតែធ្វើការជួបគ្រូពេទ្យជំនាញដើម្បីឱ្យដឹងច្បាស់ថា មកពីកត្តាអ្វីឱ្យប្រាកដ ហើយធ្វើការព្យាបាលនិងប្រើថ្នាំឱ្យបានត្រឹមត្រូវតាមការណែនាំពីគ្រូពេទ្យជំនាញ៕

អត្ថបទដោយ៖ Senghong

ខ្វះគំនិតរកស៊ី​ ចង់បានសៀវភៅចែកជូនហ្វ្រី ចង់ជួបវាគ្មិនដែលជាសហគ្រិនល្បីៗ សូមកុំភ្លេចមកចូលរួមពិព័រណ៍​ Startup Expo 2022

សូមចូលក្នុងគ្រុបនេះ https://t.me/startupexpo2022 ​ដើម្បីទទួលព័ត៌មានបន្ថែម!