មានមនុស្សជាង ៦ពាន់លាននាក់នៅទូទាំងពិភពលោកប្រើប្រាស់ស្មាតហ្វូន និងកំពុងតែលេងលើបណ្តាញសង្គមផងដែរ។ ហើយចំនួននេះ គេបានបញ្ជាក់ថា អ្នកប្រើកាន់តែកើនឡើងជារៀងរាល់ឆ្នាំថែមទៀត។ ហើយមានមនុស្សជាមធ្យមបានចំណាយពេលចាប់ពី ៥ទៅ៦ម៉ោងក្នុងថ្ងៃ ដែលមិនរាប់បញ្ចូលក្នុងការប្រើប្រាស់ទាក់ទងនឹងការងារនោះទេ។ កត្តានេះហើយវាបានជះឥទ្ធិពលអាក្រក់ដល់ផ្លូវចិត្តរបស់មនុស្សខ្លាំងណាស់។ យោងតាម Verywellmind ថា គួរតែលេងទូរស័ព្ទរបៀបនេះ កុំឱ្យប៉ះពាល់អារម្មណ៍ផ្លូវចិត្តរបស់យើង៖

តាមការសិក្សាថ្មីមួយត្រូវបានចេញផ្សាយដោយ Journal of Experimental Psychology: Applied បានរកឃើញថា អ្នកញៀនលេងទូរស័ព្ទនាំឱ្យប៉ះពាល់ផ្លូវចិត្តខ្លាំង បានប្រែក្លាយទៅជាមនុស្សឆាប់ខឹង និងអារម្មណ៍ខ្សោះៗក្នុងខ្លួន។ ដើម្បីកុំឱ្យប៉ះពាល់ផ្លូវចិត្តខ្លាំងបែបនោះ អ្នកត្រូវកាត់បន្ថយការប្រើប្រាស់លេងទូរស័ព្ទដៃដោយកំណត់ម៉ោងលេង ទើបសុខភាពអ្នកប្រសើរឡើងវិញ។ តាមលោកស្រី Yalda Safai ជាវេជ្ជបណ្ឌិតផ្នែកវិកលចរិតនៅទីក្រុងញូវយ៉ក បានមានប្រសាសន៍ថា ការផ្លាស់ប្តូរទម្លាប់ប្រើទូរស័ព្ទច្រើន អ្នកត្រូវចេះគ្រប់គ្រងពេលវេលាដោយការដាក់វិន័យលើខ្លួនឯង ដើម្បីកាត់បន្ថយការប៉ះពាល់អារម្មណ៍ផ្លូវចិត្តរបស់អ្នកដូចជា ការធ្លាក់ទឹកចិត្ត ឆាប់ខឹង និងការថប់បារម្ភជាដើម។ ហើយវាធ្វើឱ្យអ្នកចេះស្រឡាញ់ខ្លួនច្រើន និងរបៀបរស់នៅអ្នកកាន់តែច្រើនជាងមុនដែរ។”

នៅពេលយើងលេងទូរស័ព្ទមុនដំបូង ធ្វើឱ្យអារម្មណ៍សប្បាយ គ្រាន់តែរយៈពេល ១ឬ២ម៉ោងក្រោយ ធ្វើឱ្យអារម្មណ៍អ្នករាងតានតឹង ហើយអ្នកបន្តលេងលើបណ្តាញសង្គម ធ្វើឱ្យក្នុងខ្លួនអ្នកមានអារម្មណ៍ខ្សោះៗ អស់ថាមពលរលីងពីខ្លួន។ នេះដល់ដំណាក់កាលធ្វើឱ្យអ្នកញៀន គ្រាន់តែអ្នកឈប់លេងភ្លាមអារម្មណ៍អ្នកចាប់ផ្ដើមស្មុគស្មាញខ្លាំងមែនទែន។

តាមប្រសាសន៍របស់លោកស្រី Jennifer Katzenstein ជាអ្នកចិត្តវិទូបានពន្យល់ថា " ការធ្វើឱ្យសុខភាពផ្លូវចិត្តប្រសើរជាងមុន គ្រាន់តែអ្នកសម្រាករយៈពេលមួយម៉ោងដោយសម្រួលអារម្មណ៍ដកដង្ហើមមួយៗ ឬដកខ្លួនចេញពីទូរស័ព្ទសិន ការធ្វើបែបនេះ ត្រឹមតែរយៈពេលមួយសប្តាហ៍ធ្វើឱ្យអ្នកកាត់បន្ថយការធ្លាក់ទឹកចិត្ត ការថប់បារម្ភ និងធ្វើឱ្យសកម្មភាពរាងកាយអ្នកកាន់តែប្រសើរឡើង និងចេះពេញចិត្តក្នុងជីវិតរបស់ខ្លួន។ ហើយលោកស្រីបានបន្តថា គ្រាន់តែអ្នកចេះផ្លាស់ប្តូរទម្លាប់នេះ ម្តងបន្តិចៗ ជារៀងរាល់ថ្ងៃនោះ វានឹងធ្វើឱ្យអាកប្បកិរិយារបស់អ្នកកាន់តែមានការផ្លាស់ប្តូរយ៉ាងធំដល់សុខភាពផ្លូវចិត្ត និងការរស់នៅឱ្យមានក្តីសុខផងដែរ៕

អត្ថបទដោយ៖ ទ្រ សុភាព