បើយោងតាមការសិក្សាថ្មីមួយអំពីការហាត់ប្រាណចុះផ្សាយនៅលើCNAបានឱ្យដឹងថា ជំងឺសាហាវៗក្នុងករណីអ្នកជំងឺមហារីកច្រើនជាង 46,000ករណីនៅសហរដ្ឋអាមេរិកអាចនឹងត្រូវបានកាត់បន្ថយជារៀងរាល់ឆ្នាំ ប្រសិនបើអ្នកជំងឺបានដើរធ្វើលំហាត់ប្រាណប្រមាណប្រហែល 45 នាទីក្នុងមួយថ្ងៃ ស្មើរនឹង៥ម៉ោងក្នុង១សប្តាហ៍ ។
ការសិក្សាមួយដែលបានវិភាគលើឧប្បត្តិហេតុនៃជំងឺមហារីក និងទម្លាប់នៃសកម្មភាពរាងកាយរបស់បុរសនិងស្ត្រីជនជាតិអាមេរិកជិត 600,000 នាក់នៅគ្រប់រដ្ឋ និងស្រុកកូឡុំប៊ី បានរកឃើញថា ប្រហែល 3 ភាគរយនៃជំងឺមហារីកទូទៅនៅក្នុងសហរដ្ឋអាមេរិកត្រូវបានផ្សារភ្ជាប់យ៉ាងខ្លាំងទៅនឹងភាពអសកម្ម។ ការធ្វើអ្វីមួយដែលសាមញ្ញដូចជាការក្រោកឡើង និងធ្វើចលនាបន្តិចបន្តួច ត្រូវបានគេរកឃើញថា អាចជួយមនុស្សរាប់ម៉ឺននាក់នៃអ្នកឱ្យជៀសផុតពីការវិវត្តនៃជំងឺមហារីកនៅក្នុងប៉ុន្មានឆ្នាំខាងមុខនេះ។
តាមពិតទៅវាមានភ័ស្តុតាងជាច្រើនរួចហើយដែលថាការធ្វើលំហាត់ប្រាណអាចជួយកាត់បន្ថយហានិភ័យនៃជំងឺមហារីក។ នៅក្នុងការពិសោធន៍កន្លងមក សកម្មភាពរាងកាយបានផ្លាស់ប្តូរប្រព័ន្ធភាពស៊ាំតាមរបៀបដែលបង្កើនសមត្ថភាពរាងកាយក្នុងការប្រឆាំងនឹងការលូតលាស់ដុំសាច់។ ជាឧទាហរណ៍ លំហាត់ប្រាណអាចបង្កើនសកម្មភាពនៃកោសិកាភាពស៊ាំមួយចំនួនដែលគេស្គាល់ថាជាកោសិកាមហារីក។
ហើយការធ្វើលំហាត់ប្រាណនេះទៀតសោតក៏ត្រូវបានផ្សារភ្ជាប់ជាមួយនឹងការរស់រានមានជីវិតបានយូរ ចំពោះអ្នកដែលមានជំងឺមហារីកស្រាប់ តាមរយៈការបង្កើនកម្រិតនៃសារធាតុរលាកដែលរារាំងការលូតលាស់កោសិកាមហារីក។ ការពិនិត្យវិនិច្ឆ័យនៅឆ្នាំ 2016 នៅក្នុងឱសថផ្ទៃក្នុងរបស់JAMA បានសន្និដ្ឋានថា ហានិភ័យរបស់យើងចំពោះជំងឺមហារីកយ៉ាងហោចណាស់ 13 ប្រភេទ រួមទាំងមហារីកសុដន់ ប្លោកនោម ឈាម និងរន្ធគូថ ធ្លាក់ចុះយ៉ាងខ្លាំង ប្រសិនបើយើងសកម្មផ្នែករាងកាយ ហើយរបាយការណ៍ឆ្នាំ 2019 ដាច់ដោយឡែកបានគណនាថា ការកាត់បន្ថយទាំងនោះអាចមានកម្រិតខ្ពស់ដល់ទៅ៦៩ ភាគរយ។
អាស្រ័យហេតុនេះហើយ ប្រសិនបើមិនចង់ជួបជាមួយនឹងជំងឺមហារីកនៅថ្ងៃអនាគតនោះទេ គប្បីហាត់ប្រាណឱ្យបានយ៉ាងតិចណាស់៥ម៉ោងក្នុងមួយសប្តាហ៍។ ហើយការហាត់ប្រាណទៀតសោត មិនចាំបាច់ទាល់តែទៅក្លឹបឬហាត់ធ្ងន់ៗនោះទេ ត្រឹមមានសកម្មភាពដូចជាដើរ រត់ ជាដើមនោះក៏រាប់ចូលជាលំហាត់ប្រាណដែរ៕
អត្ថបទដោយ៖ កញ្ញា លីហួយ