សព្វថ្ងៃនេះមានអ្នកជំងឺផ្នែកប្រព័ន្ធរំលាយអាហារដូចជាបញ្ហាក្រពះ និងពោះរៀនជាដើម ជាបញ្ហាមួយដ៏ស្មុគស្មាញសែនឈឺក្បាលណាស់។ តាមគ្រូពេទ្យជាច្រើនក៏បានបញ្ជាក់ដែរថា បញ្ហាក្រពះពោះវៀនបណ្ដាលមកពីទម្លាប់នៃញ៉ាំអាហារមិនល្អដូចជាញ៉ាំអាហារហឹរ ហឹរ ជូរ ផឹកកាហ្វេ ផឹកស្រា ជក់បារី និងតានតឹង, ថប់បារម្ភផងដែរ។ បើយោងតាមគេហទំព័រ www.pharmeasy.com បានចុះផ្សាយថាអាហារចំអិនដោយចៀន ឬបំពងងាយប៉ះពាល់ដល់ពោះវៀនណាស់។ ព្រោះតែអាហារប្រភេទនេះមិនត្រឹមតែធ្វើឲ្យឡើងទម្ងន់ទេ ប៉ុន្តែវាពិបាករំលាយទៀតផងដោយពេលខ្លះវាត្រូវបានរុញច្រានបន្តទៅដល់ពោះវៀន​ទាំងមិនទាន់រំលាយដែលបានបង្កឲ្យរាក ហើមពោះ និងទល់លាមកផងដែរ ។ បើអ្នកមានបញ្ហាក្រពះពោះវៀននោះ ហាមហូបអាហារបែបនេះច្រើនពេក។ នេះជាអាហារទី១ក្រពះពោះវៀនខ្លាច។

សម្រាប់អាហារទី២ ដែលក្រពះពោះវៀនខ្លាចនោះគឺអាហារបែបជាតិអាស៊ីត។ មានដូចជាទឹកប៉េងប៉ោះ ក្រូចឆ្មារ ក្រូចក្រហម និងក្រូចថ្លុង សុទ្ធតែត្រូវបានគេរាប់បញ្ជូលទៅក្នុងក្រុមអាហារមានជាតិអាស៊ីត និងអាចធ្វើឱ្យរលាកស្រទាប់ក្រពះ បង្កបញ្ហាដល់ប្រព័ន្ធរំលាយអាហារដែលជាទូទៅកើតមានឡើងចំពោះអ្នកមានបញ្ហាក្រពះពោះវៀនស្រាប់។ នេះជាការបញ្ជាក់ពីលោកវេជ្ជបណ្ឌិត Benjamin Krevsky។

សម្រាប់ទី៣ ដែលក្រពះវៀនខ្លាចនោះ បើផ្អែកទៅតាមប្រភពចេញផ្សាយ everydayhealth បានលើកឡើងថា សូម្បីតែជាតិកាហ្វេអ៊ីន ជួយជំរុញចលនានៃក្រពះពោះវៀន ធ្វើឱ្យមានសមត្ថភាពផ្លាស់ទីកាន់តែលឿនតាមរយៈប្រព័ន្ធសរីរាង្គ ហើយបរិមាណច្រើនហួសនៃជាតិកាហ្វេអ៊ីន ក៏ជាកត្តាអាចឱ្យកើតជាបញ្ហារាគរូសចំពោះសុខភាពបុគ្គលមួយចំនួនដូចគ្នា ជាពិសេសកើតមានចំពោះអ្នកមានរោគក្រពះពោះវៀនតែម្តង។ ដូចនេះហើយអ្នកដែលមានបញ្ហាក្រពះពោះវៀន គួរតែព្យាយាមកាត់បន្ថយ ឬអាចញុំារបបអាហារដូចដែលបានរៀបរាប់ខាងលើក្នុងបរិមាណទាប ដើម្បីចៀសវាងកុំឱ្យស្ថានភាពសុខភាពវិវត្តន៍ទៅរកសភាពកាន់តែអាក្រក់៕ អត្ថបទដោយ៖ ទ្រ​សុភាព