ប្រជាពលរដ្ឋខ្មែរយើងនិយមចូលចិត្តញុំាមី និងគុយទាវជាប្រចាំទៅហើយ ហើយមានមនុស្សតិចណាស់ដែលដឹងថា វាមានផលប៉ះពាល់ខ្លាំងដល់សុខភាព។ មានគ្រូពេទ្យជំនាញជាច្រើន តែងតែហាមមិនឱ្យអ្នកជំងឺមួយចំនួនញុំាមី និងគុយទាវញឹកញ៉ាប់ពេកនោះទេ ព្រោះវាប៉ះពាល់ខ្លាំងដល់សុខភាព។
ត្រង់ចំណុចនេះ ឧកញ៉ាវេជ្ជបណ្ឌិតគួច ម៉េងលី បានថ្លែងប្រាប់ Healthy Cambodia ថា «សម្រាប់គុយទាវគេមិនសូវឱ្យញុំារាល់ព្រឹកនោះទេ ព្រោះក្នុងគុយទាវគេប្រើសារធាតុម្យ៉ាង ដើម្បីឱ្យវាស្វិតតាមរយៈអ្នកជំនាញស្រាវជ្រាវ ហើយវាមានការប៉ះទង្គិចខ្លាំងដល់សុខភាពអ្នកញុំា»។
លោកវេជ្ជបណ្ឌិតបានបញ្ជាក់ថា «បើតាមខ្ញុំចាំគេមិនសូវឱ្យញុំាទេ ព្រោះជាប្រភេទអាហារកែច្នៃ ព្រោះអាហារប្រភេទនេះ ភាគច្រើនប្រើសាធាតុគីមី ដើម្បីទុកបានយូរ ស្វិត និងមានពណ៌។ ហើយឱ្យតែរបស់កែច្នៃភាគច្រើន គេណែនាំយើងមិនឱ្យញុំានោះទេ»។
សម្រាប់លោកឧកញ៉ាយូរៗម្តង ក៏ញុំាគុយទាវដែល តែមិនញុំាទឹកវានោះទេ ព្រោះវាមានជាតិប្រៃនាំឱ្យមានបញ្ហាខ្លាំងដល់សុខភាព ពេលញុំាម្តងៗ លោកឧកញ៉ាមិនញុំាទឹកគុយទាវនោះទេ។ ទឹកគុយទាវ មានជាតិប្រៃច្រើន ហើយគេខ្លាចបំផុតរបស់បែបនេះ ព្រោះនាំទុក្ខដល់សុខភាពយើង នាំឱ្យយើងឡើងឈាម ស្ទះបេះដូង ឬអាចឈានដល់ស្ទះដាច់សរសៃឈាមផងដែរ។ ដូច្នេះគេចៀសវាងណាស់ របស់ដែលគេកែច្នៃ និងរបស់មានជាតិប្រៃខ្លាំង។
សម្រាប់ទទួលទានមីរាល់ថ្ងៃគ្រប់ពេលជួបជាប់គ្នារយៈពេល 1 ខែគឺអ្នកអាចស្លាប់បានព្រោះនៅក្នុងមីមានសារធាតុគីមីជាច្រើន។ គេរកឃើញ៦៨% នៃអ្នកចូលចិត្តទទួលទានមីពីរទៅបីដងក្នុងមួយសប្ដាហ៍ទទួលរងប៉ះទង្គិចចម្រុះទៅលើសុខភាព ហើយវាអាចវិវដ្ដទៅរកភាពធ្ងន់ធ្ងរបំផុត។ ក្នុងនោះវាបង្កទៅជាជំងឺបេះដូង ជំងឺ Stroke ជំងឺទឹកនោមផ្អែម ជំងឺលើសឈាម ជំងឺខ្លាញ់កកក្នុងឈាម និងជំងឺលើសជាតិស្ក។ ការបង្ករោគចម្រុះបែបនេះ គឺដោយសារតែសារធាតុគីមីនៅក្នុងសរសៃមី ដើម្បីរក្សាមីទុកបានយូរ និងសារធាតុបន្ថែមមួយចំនួនទៀតដែលមិនមែនជារបស់ធម្មជាតិនេះឯង។
បន្ថែមពីលើនេះបើយោងតាម លោកវេជ្ជបណ្ឌិត គួច ម៉េងលី ណែនាំថា បើការទទួលទានមីច្រើនហួសហេតុធ្វើឱ្យប៉ះទង្គិចច្រើនដល់សុខភាពយ៉ាងដូច្នេះ លោកផ្ដល់យោបល់ឱ្យចៀសវាងការទទួលទានមីជាប្រចាំ ជាពិសេសក្មេងវ័យជំទង់ សិស្ស និស្សិត និងអ្នកដែលរវល់នឹងការងារគ្មានពេលវេលាគ្រប់គ្រាន់ចម្អិនអាហារ។ ត្រង់ចំណុចនេះ លោកឪពុកអ្នកម្ដាយដែលស្រឡាញ់កូនគួរគប្បីគិតគូពីសុខភាពពួកគេ ដោយចៀសវាងកុំឱ្យពួកគាត់ទទួលទានមីញឹកញាប់ពេក។
អត្ថបទដោយ៖ម៉ន វុទ្ធា